Ngimbo
Lungimbo lua Davidi.
35 Oo Yehowa, nguzuelele gutuama dia mbalagaji jiami;
luisa athu adi gunguluisa.
2 Zula gatshibu gaye gazonda* nu tshibu yaye yakoma,
zuga, uze unguluile.
3 Thuphula mulumbu waye nu giphangu* giaye gia ita, uluise athu adi gungulandula.
Nguwambele egi: “Ngudi muhuluishi waye.”
4 Athu adi gungukaya ha gungushiya avue musonyi.
Athu adi muya giphungi ha gungushiya avutuge nu musonyi.
5 Ahehumuge gifua isusu mu muhehe;
muanjelo wa Yehowa a akaye.
6 Njila jiawo jibuite, jibue diadiadia
hadi muanjelo wa Yehowa guakaya.
7 Handaga ngaakalegelego nga gima, uvi ene atele wanda ha gungukuata;
ngaakalegelego nga gima, uvi ene ahagele wina hagula ngubue muene.
8 Lamba diaabuile mu gisagumuisa;
akuatagane mu wanda atele ene;
abue mu wina didi nu wanda, afue.
9 Uvi ame, mbangusuanguluga mukunda nu Yehowa;
mbangusuanguluga mukunda nu ndaga jiakalagala muene ha gunguhuluisa.
10 Ngudi muhula nu mutshima wami wagasue egi:
“Oo Yehowa, nanyi udi gifua aye?”
Aye wana huluisa athu aleba ha mago a enya ngolo,
aye wana huluisa athu aleba nu phutu ha mago a athu ana guakuiya ima.
11 Athu anguzogela uthemua wa mambo,
adi gunguhula ndaga jinyi ngushigo mujiya.
12 Ngaakalegele ndaga jiabonga, uvi ene anguvutuila gubola,
anguhana gikenene giavula.
13 Tangua akhalele mukata, ngasudigile sagi ya ngombo;
ngadisagesele, ngatunyile gudia.
Tangua ngakhalelego muheta mvutu gu isambu yami,
14 ngakhalele muwenda nu gudila gifua muthu wafuisa futa dienji nga phangi’enji;
gikenene giangubuishile gifua muthu udi mudila gin’enji wafui.
15 Uvi tangua ngakhakhugile asuangulugile, adibungishile hamoshi;
mukut’awo agasue angubandemene ha gunguluisa;
angukaluile itshinyi-itshinyi, ahenelego tedie.
16 Athu anyi ana tuna gunemesa Nzambi adi gungulela,*
adi gudidia mazo handaga adi gunguvila khabu.
17 Oo Yehowa, mbawulandula gutala ngenyi uu nu tangua tshi?
Nguhuluise ha mago a athu adi gunguluisa,
nguhuluise* ha mago a mitumba ya khoshi.
18 Ngenyi mbanguguhana mersi mukatshi dia athu avula;
mbangugutumbuisa mukatshi dia thundu ya athu.
19 Ubembigo egi athu anyi alabi gudibuisa mbalagaji jiami, asuanguluge mukunda nu lamba diami.
Ubembigo egi athu adi mulaba gungutuna, angukamuine meso mu luholo luabola.
20 Handaga ana zuelago mbimbi jia guhuima mu makano awo,
ana guya giphungi ha guzuela ndaga jia mambo mukunda nu athu ahuima a mu gifutshi.
21 Akangula makano awo ha gungufunda,
adi muzuela egi: “Aha! Aha! Tuamonyi ndaga watshitshi.”
22 Oo Yehowa, wamonyi ndaga eyi. Uhenyigo tedie.
Oo Yehowa, ukhadigo gualeha nu ame.
23 Zuga, unguzuelele,
Nzambi wami, Yehowa, batula mulonga wami mu luholo luabonga.
24 Oo Yehowa Nzambi wami, ngusophese gifua mudi mikhuala yaye yatagana;
ubembigo egi asuanguluge mukunda nu lamba diami.
25 Waahanyigo njila ha guzuela egi: “Aha! Tuaheta ndaga tuakhala mukamba.”
Waahanyigo njila ha guzuela egi: “Tuamuminya kubu.”
26 Mukut’awo agasue sonyi jiaakuate, abue tunga-tunga,
athu agasue anyi adi musuanguluga mukunda nu lamba diami.
Athu agasue adi mutangiza egi angubalega, musonyi wakola waakuate, aseguluge.
27 Uvi athu ana suanguluga nu ndaga jiabonga ngana tshita, ambe miyelele ya gusuanguluga;
akhale muzuela tangua diagasue egi:
“Yehowa atumbuishiwe, handaga wana suanguluga tangua mukombeledi wenji wana khala mu guhuima.”
28 Ngenyi kano diami mbadizuelela ndaga jiabonga wana kalagala
nu mbadigutumbuisa masugu agasue.