Ngimbo
Gudi mutuameji wa miziki. Lungimbo lua Davidi.
139 Oo Yehowa, aye wangusandele muabonga mu mutshima, wana gungujiya.
2 Wana jiya tangua ngana khala hashi nu tangua ngana zuga.
Wana kotelesa matangi ami ikhale udi gualeha.
3 Wana gungutala* muabonga tangua ngana wenda nu tangua ngana banda;
njila jiami jiagasue wajijiya gale.
4 Gutuama egi ngukangule kano diami nguzuele,
Oo Yehowa, aye wana dianga gujiya mbimbi yene muabonga.
5 Udi yagungujieta gutuama nu gungima;
wahaga koko diaye holu diami.
6 Ngajiyilego diago gukotelesa luholo wana gungujiya.*
Ujiyi waye udi diago wavula mukunda nu ame ha gukotelesa.
7 Gui ngajiya gudisuega hagula nyuma yaye ingumonyigo,
gui ngajiya gulenga hagula phala yaye ingumonyigo?
8 Gula ngakanduga mu dilu, aye mbawukhala guene,
tala! Gula ngahaga gitanda giami mu Malumba,* aye mbawukhala guene.
9 Gula ngazuga nu mahambu a gimenegena
ngaya mukhala hehi nu kianga gia gualeha,
10 ikhale ngaya guene, koko diaye mbadingutuameza;
koko diaye dia madia mbadingukuata.
11 Gula ngazuela egi: “Phipha mbayidi diago gungusuega!”
Ngenyi phipha yagasue idi mu khulo yami mbayibua muanya.
12 Ikhale yene phipha yakola, mbayishigo mukhala yabuita mukunda nu aye,
uvi phipha mbayikhala yaphelegeta gifua muanya;
gutuama diaye phipha yakola yana khala gifua kiajiji.
13 Handaga aye walondele jiso jiami;
aye wangubambele* muabonga mu vumo dia mama.
14 Ngudi gugutumbuisa, handaga ngalondewe mu luholo lua gushimana ludi muhana woma.
Midimo yaye idi ya gushimana,
ngana jiya ndaga eyi muabonga.
15 Mifiya yami yakhalelego ya gudisuega gutuama diaye
tangua ngakhalele mulondewa mu gisuegi,
tangua ngakhalele mutungiwa gifua mulele goshi’a mavu.
16 Meso aye angumonele tangua ngasendesele mu vumo;
itshinyi ya muila wami yagasue yakhalele ya gusonega gu mukanda waye
mu gudivua nu masugu yakhalele naye gulondewa,
gutuama egi ilondewe.
17 Matangi aye adi diago nu ndando yavula mukunda nu ame!
Oo Nzambi, matangi aye adi diago avula!
18 Ngajiyilego gulola guatanga, handaga adi avula gifua gishegele gu khulo ya muta.
Ngana khala nu aye, ikhale tangua ngana zuga gu tulo.
19 Oo Nzambi, shiya athu abola,
hagula enya khuta* angubembe,
20 athu agasue ana zuela ndaga mukunda nu aye nu matangi abola;*
adi mbalagaji jiaye jinyi jidi mukalegela jina diaye mu luholo luabola.
21 Oo Yehowa, ngana zumba ndo athu anyi ana tuna guguzumba,
ngana sanyigiga athu anyi ana gugulumbugila.
22 Ngana guazumba ndo nga hazonda;
ene abua mbalagaji jiami jiakola.
23 Oo Nzambi, ngusande muabonga ujiye mutshima wami.
Ngutale muabonga, ujiye ndaga idi gungusagesa mu matangi.
24 Ngutale muabonga ha gujiya gula ngudi nu ndaga imoshi yabola.
Ngutuameze mu njila ya mayilago.