Ufumu wa Nzambi udi itshi?

1. Ufumu wa Nzambi udi itshi?

Ufumu wa Nzambi udi guvernema umoshi udi mudilu. Mba uzula fundo dia baguvernema ako agasue enji Nzambi mba ukitshila guvernema wene ha gutagenesa matangi enji mu dilu nu ha mavu. Wava lumene lua bonga! Gualeha ndo, Ufumu wene wa Nzambi mba ulungisa nzala ya athu ya kukhala nu guvernema wabonga. Mba ubungisa athu agasue adi mujinga ha mavu.​—Tanga Danyele 2:44; Matayo 6:9, 10; 24:14.

Ufumu wagasue wanukhala nu fumu. Ha muto wa Ufumu wenji, Yehowa washile Mun’enji Yesu Klisto.​—Tanga Yatuwuwe 11:15.

2. Mukunda natshi Yesu udi Fumu wa gutagana?

Muna Nzambi udi Fumu wa gutagana mukunda udi muthu wabonga, wanaguluila ndaga jidi jia bonga, udi diago nu ngolo jia gukuatesa athu. (Yone 1:14) Yesu mba wuhinyina mavu uvi muene mudilu. Hene, gu ngima dia gutugumushiwa guenji mu gufua, wayile mu dilu enji wakhalele gu koko dia madia dia Yehowa ha gunengenena Ufumu. (Hebelu 10:12, 13) Gu gisugishilo, Nzambi wamuhuile ngolo jia guhinyina.​—Tanga Danyele 7:13, 14.

3. Akuatshi ako mba hinyina nu Yesu?

Hungu di’athu dianatamegewa “a gijila” mbahinyina nu Yesu mu dilu. (Danyele 7:27) A gijila a thomo akhalele atumiwi a Yesu akhalele ajinginyina. Gu ngima, Yehowa walundile athu ajinginyina ako mala nu akhetu tii nu mu tangua dietu. Gifua Yesu, adi mutugumushiwa nu muila wa nyuma.​—Tanga Yone 14:1-3; 1 Kolinto 15:42-44.

Athu gutshi adi naye guya mu dilu? Yesu waatamegele “thundu yazonda.” (Luka 12:32) Gu gisugishilo, mbakhala guvula guawo 144 000. Mbahinyina nu Yesu mavu.​—Tanga Yatuwuwe 14:1.

4. Ndaga jitshi jabuile tangua Yesu wasendesele guhinyina?

Ufumu wa Nzambi wasendesele guhinyina mu 1914.a Ndanga ya thomo yakalegele Yesu hazanguile Ufumu yakhalele gubishila Satana nu bademo enji ha mavu. Satana wavile khabu jia vula enji wasendesele guzola malamba avula mu ifutshi yagasue. (Yatuwuwe 12:7-10, 12) Sendesa tangua dinyinyi, malamba a athu adi gudilunda. Ita, nzala, misongo ya bola enji kushiya mikhuala idi mu katshi dia “ijiyilo” idi mumonegesa egi gindongo gigi gia bola giaheta mu masugu enji a suga.​—Tanga Luka 21:7, 10, 11, 31.

5. Ufumu wa Nzambi udi mukalagala itshi?

Mu njila ya gulonga Biblia ha mavu agasue, Ufumu wa Nzambi udi mubungisa gale thundu yakoma y’athu ya ifutshi yagasue. Inunu y’athu agudibulumuna atshigina gu hinyinyiwa gua Yesu. Ufumu wa Nzambi mbawaabamba tangua mbadishiyiwa gindongo gigi gia bola gia tangua dietu. Ngenyi, athu agasue atshigina guheta gubonga gua Ufumu wene adi na ye gulonguga luholo lua gukhala athu anatumagela Yesu.​—Tanga Yatuwuwe 7:9, 14, 16, 17.

Musungi dia ivuo 1 000, Ufumu mbautagenesa matangi a gisendeselo a Nzambi mukunda nu athu. Mavu agasue mbaadimuvutuga paladiso. Gu suga yenji, Yesu mbauvutula Ufumu gua Shenji. (1 Kolinto 15:24-26) Umujiya ata muthu mungoshi wajiya gumudijiga ndaga jia Ufumu wa Nzambi ba?​—Tanga Lungimbo 37:10, 11, 29.