Mukunda natshi udi naye gulandula gulonguga Biblia?

1. Ndaga jitshi jia bonga mba uheta ha gulandula gulonguga Biblia?

Maya ndo, gutalela malongi agishina a Biblia adi mu gamukanda gaga akudisa guzumba guaye gudi Yehowa. Uvi tudi naye gukolesela ha gukudisa guzumba guene tangua diagasue. (1 Phetelo 2:2) Gula walandula gusetuka gua Nzambi ha gulonguga Biblia, mba uheta felela dia ye dia monyo wa ivuo nu ivuo.​—Tanga Yone 17:3; Yuda 21.

Gula walandula gujiya Nzambi, gutshigina guaye gudi gudikolesa. Gutshigina mba gugukuatesa ha gusuanguluisa Nzambi. (Hebelu 11:1, 6) Mba gugutuma ha gubalumuna mutshima enji mba gubalumuna khalelo diaye.​—Tanga Makalegelo 3:19.

2. Luholo lutshi lua guguatesa athu ako nu gujiya guaye gua Nzambi?

Ya diago, wajiya gudijiga athu ako ndaga jiji walonguga; etue agasue tuazumba guta mene jiabonga. Gula walandula gulonguga Biblia, mba ujiya guyikalegela ha gukotelesa gutshigina gua ye gua Yehowa enji nu mene jiabonga adi najo mukunda nu athu.​—Tanga Loma 10:13-15.

Athu avula adi gudihana ha guta mene jene gua mafuta awo nu fami jiawo. Khala nu ndunge. Hafundo dia gudijiga muthu egi gikombelelo giaye gidi gia mambo, mudijige felela dia Nzambi. Enji wunguluga egi mbala jiavula, makalegelo aye abonga abalega mbimbi wajiya guzuela.​—Tanga 2 Timote 2:24, 25.

3. Gudivua gutshi wajiya gukhala nago nu Nzambi?

Gulonguga gua Mbimbi ya Nzambi mba gugukuatesa ha gukula mu nyuma. Gungima dia masugu, wajiya gukhala nu gudivua gua bonga muavula nu Yehowa. Wajiya kukhala muthu wenji enji gukhala muthu wa fami yenji.​—Tanga 2 Kolinto 6:18.

4. Luholo lutshi wajia gulandula gukula?

Wajiya gulandula gukula mu nyuma gula umuhata gulonguga Biblia. (Hebelu 5:13, 14) Toga Themua wa Yehowa mungoshi agukwatese ha gulongoga Biblia nu mukanda Itshi Biblia Yajiya Gutulongesa? Gula wadihana mu gulonguga Mbimbi ya Nzambi, monyo waye mba ukhala nu gusuanguluga.​—Tanga Lungimbo 1:1-3; 73:27, 28.

Mene jiabonga tuazuelela mu gamukanda gaga jiakatuga gua Yehowa, Nzambi wa gusuanguluga. Wajiya gumusetuga gula wasetuga akombeledi enji. (Hebelu 10:24, 25) Gula wakolesela ha gusuanguluisa Yehowa, udi gudituameza gu monyo wa matshidia, monyo wa ivuo nu ivuo. Gusuena gua Nzambi gudi diago ndaga ya gubalega gubonga wajiya gukalagala.​—Tanga 1 Timote 1:11; 6:19.