Enya Ndunge Ayile Mutala Yesu

Mala akatugile gu khanda ya mazogelo a kumbi. Akhalele ba astrologues: athu ana gulonguga jithemua nu mafundo jiana gumagana. Ana gumona egi gukalagala ngenyi guajiya guaakuatesa ha guwambela athu ndaga mbajabuila mu lujingu luawo. (Yeshaya 47:13) Hakhalele ene gumbo diawo, gu Esti, amonele “themua” imoshi. Ayilanduile ba kilometre avula. Ha fundo egi themua yene yaabate gu Beteleheme, yaabatele gu Yelusalema.

Hahetele ene gu Yelusalema, ahudile egi: ‘Gui guavalewa mona mbawukhala fumu wa enya Yuda? Handaga tuamonyi themua yenji gu Esti, hene tuaza ha gumutumbuisa.’—Matayo 2:1, 2.

Helode, Fumu wa Yelusalema wavuile ndaga yene, enji wavuile khabu jiakola. Hene, watamegele mafumu a nganga-nzambi nu alongeshi a mikhuala a enya Yuda, waahudile egi, ‘gui Klisto adi naye guvalewa?’ Atangijile ndaga jiasonegele ba profete, amuwambelele egi: ‘Gu Beteleheme.’ (Matayo 2:5; Mika 5:2) Tangua Helode wavuile ngenyi, watamegele enya ndunge mu gisuegi, wawambelele egi: ‘Ndjenu mukambe mona muabonga. Gula muamumona, zenu munguwambele hagula ame nji nguye ngumutumbuise.’ (Matayo 2:8) Uvi muguzuela guabonga, Helode wakhalele mukamba mona muene hagula amushiye!

Hakatugile enya ndunge, ndaga imoshi ya gushimana yakalegewe. “Themua” amonele ene tangua akhalele gu khanda ya Esti, yakhadile muya luko gutuama diawo. Yadiago, themua eyi yakhalelego gifua themua jiagasue, uvi yakhadile phamba mukunda nu guaatuameza. Enya ndunge alanduile themua yene uu nu tangua yamaganele holu dia inzo yakhalele Yozefe nu Mariya nu mun’awo.

Tangua enya ndunge anginyine monzo, asangele Mariya nu mun’enji Yesu. Gungima, ashiwugile ha gutumbuisa Yesu. Luko, amusomuene kado: utadi wa wolo, mananashi nu mula. Gungima, akambele guvutuga gudi Helode, uvi Nzambi waadijigile mu nzoji egi avutugago gudi Helode. Hene, azangudile njila iko, avutugile gumbo diawo.

Watangiza egi nanyi wahagele “themua” yatuamezele enya ndunge? Jiya egi themua yene yaatuamezelego giphungu gimoshi uu nu gudi Yesu gu Beteleheme. Uvi, yaatuamezele thomo gu Yelusalema, fundo adimonene nu Fumu Helode, yonyi wakambele gushiya Yesu. Yadiago, Helode watshiginyile gumushiya lume. Nzambi wamukangele njila nu wawambelele enya ndunge egi amudijigago fundo Yesu adi. Idi mumonega haphelo egi Satana, mbalagaji wa Nzambi watshiginyile egi Yesu ashiyiwe. Wakadigile enya ndunge hagula ataganese matangi enji.