Yehowa Wabamba Yesu

Guakhalele nu athu amoshi ana tala temua ha guphonga gu khanda ya mazogele a kumbi. Lusugu lumoshi mu phipha, amonele themua imoshi yakhalele muhenya muya nu guwenda. Asendesele guyilandula. “Themua” yene yaatuamezele gu Yelusalema. Athu ene akhalele muhula athu egi: ‘Mona mbawubua fumu wa enya Yuda udi gui? Tuaji ha gumufugamela.’

Tangua Helode fumu wa gu Yelusalema wavile ndaga yene, wadisagesele muavula. Wahudile mafumu a nganga-nzambi egi: ‘Muthu udi naye gubua fumu udi naye guvualewa gui?’ Amuwambelele egi: ‘Baprofete azuelele egi udi naye guvualewa gu Beteleheme.’ Hene Helode watamegele athu ana tala themua anyi akatugile gu khanda ya mazogelo a kumbi, waawambelele egi: ‘Ndenu gu Beteleheme mukambe mona. Gula muamumona muze munguwambele fundo didi muene. Ame nji ngudi mutshigina guya mufugama gutuama dienji.’ Uvi wakhalele mumba mambo.

“Themua” yene yasendesele guwenda luko. Athu ene ayilanduile uu nu gu Beteleheme. “Themua” yamagenele holu dia inzo imoshi, athu ene anginyile mukatshi dia inzo yene. Asangele Yesu nu gin’enji Madiya. Afugamele phala mu mavu gutuama dia mona nu amuhanele bakado: wolo, uhafu ulaphe nu mula. Idi Yehowa watumile athu ene ha gukamba Yesu ba? Ndo.

Mu phipha yene, Yehowa wawambelele Yozefe gu nzoji egi: ‘Helode udi mutshigina gushiya Yesu. Zangula mukaji’aye nu mun’aye muye gu Ejipitu. Khalenu guene uu nu tangua mbangumiwambela ha guvutuga.’ Yozefe nu fami yenji ayile mbala imoshi gu Ejipitu.

Yehowa wawambelele mala akatugile gu khanda ya mazogelo a kumbi egi ashigo naye guvutuga luko gudi Helode. Tangua Helode wajiyile egi athu ene amuhuigile, wavile khabu jiavula. Luholo gahetelego Yesu, watumile athu ha gushiya ana agasue a mala akhalele mu gindongo gia Yesu gu Beteleheme. Uvi Yesu wakhalele mu ubambi gu Ejipitu.

Gungima, Helode wafile. Yehowa wawambelele Yozefe egi: ‘Henyaha wajiya giwa guvutuga.’ Yozefe nu Madiya nu Yesu avutugile gu Isalele. Ayile mukhala mu dimbo dia Nazaleta.