Estere Wahuluisa Akuaku’enji

Estere wakhalele muenya Yuda, wakhalele mujinga gu Phelese mu dimbo dia Suse. Enya fami yawo akhalele mukatshi dia athu anyi Nebukadenezale wakuatele gu Yelusalema. Gisonyi gienji Mordekayi wamusasele. Mordekayi wakhalele muenya mudimo wa Fumu Aseluse wa gu Phelese.

Fumu Aseluse wakhalele mukamba mukhetu wa guzula mu ulo. Muenya mudimo wenji wayile nu akhetu abalega gubonga a mu gifutshi gutuama dienji; Estere nji wakhalele mukatshi diawo. Fumu watombele Estere mukatshi dia akhetu agasue ha gubua mukaji’enji. Mordekayi wawambelele Estere egi gashigo naye guwambela athu egi udi muenya Yuda.

Muthu mumoshi wakhalele nu lulendo luavula, jina dienji Amana wakhalele fumu wa manene agasue. Wakhalele mutshigina egi athu agasue akhale mufugama gutuama dienji. Uvi Mordekayi watunyile, hene Amana wavile khabu jiavula, wakhalele mukamba luholo lua gumushiya. Tangua Amana wajiyile egi Mordekayi wakhalele muenya Yuda, wayile giphungi ha gushiya enya Yuda agasue mu gifutshi. Wawambelele fumu egi: ‘Enya Yuda adi gingoza mukunda nu aye, udi naye guashiya.’ Aseluse wazuelele egi: ‘Tshita yagasue watshigina.’ Wamuhanele njila ya gumba mukhuala. Amana wambile mukhuala egi athu agasue adi naye gushiya enya Yuda mu lusugu lua 13 lua mbeji ya Adale. Uvi Yehowa wakhalele mumona ndaga jiagasue.

Estere gakhalelego mujiya egi ambi gale mukhuala. Hene Mordekayi wamutumidile kopi ya mukhuala wene, wamuwambelele nji egi: ‘Nda, ute maga nu fumu.’ Estere wazuelele egi: ‘Gula muthu waya gutuama dia fumu, uvi fumu nu gumutamega ndo, udi naye gushiyiwa. Ngatshita gale masugu 30, fumu khenji gangutamegelego! Uvi ngudi muya. Gula wangusunuina muhango wenji mbangusala nu monyo, uvi gula ndo mbangumushiyiwa.’

Estere wayile mu inzo ya ufumu ha gumona fumu. Tangua fumu wamumonele, wamusunuine muhango wenji. Estere wasuenele hehi, fumu wamuhudile egi: ‘Estere, itshi udi mutshigina?’ Estere wazuelele egi: ‘Ngudi mutshigina egi aye nu Amana muze gu wano.’ Gungima waatamegele luko gu wano wa mbadi. Tangua akhalele gu wano wene, fumu wahudile luko Estere egi: ‘Itshi udi mutshigina egi ngugukalegele?’ Estere wazuelele egi: ‘Muthu mumoshi udi mutshigina gungushiya, udi mutshigina nji gushiya akuaku’ami. Ngabuba tuhuluise.’ Fumu wamuhudile egi: ‘Nanyi muene udi mutshigina gugushiya?’ Wamuwambelele egi: ‘Idi Amana, muthu yowu wabola.’ Aseluse wavila khabu jiavula, washiyile Amana.

Uvi guakhalelego nga muthu mumoshi wajiya gukatula mukhuala wambile Amana, ikhale muene fumu. Gungima fumu wabuishile Mordekayi fumu wa manene agasue, wamuhanele njila ya gumba mukhuala uhe-uhe. Mordekayi wambile mukhuala wakhalele muhana enya Yuda njila ya gulua nu mbalagaji jiawo tangua mbajialuisa. Mu lusugu lua 13 lua mbeji ya Adale, enya Yuda abingile mbalagaji jiawo. Sendese mu tangua diene, enya Yuda asendesele gutshita wano givo nu givo ha gusuanguluga mu luholo abingile mbalagaji jiawo.