LONGO DIA 64
Danyele Wambiwa mu Wina dia Khoshi
Fumu muko wa gu Babilona wakhalele Daliyuse, wakhalele muenya Mede. Daliyuse wamonele egi Danyele wakhalele muthu wabonga. Wamuhagele fumu wa athu agasue a ndando mu gifutshi. Uvi athu ene akhalele muvila Daniele ginjiongo, akhalele mukamba luholo lua gumushiya. Akhalele mujiya egi Danyele wakhalele mukombelela Yehowa mbala thathu mu lusugu; hene awambelele Daliyuse egi: ‘O fumu, mba mukhuala egi athu agasue adi naye gugukombelela phamba aye. Muthu wagasue watuna gutumagela mukhuala wene udi naye gumbiwa mu wina dia khoshi.’ Daliyuse watshiginyile matangi ene, gungima wambile mukhuala.
Tangua Danyele wavile mukhuala wene uhe-uhe, wayile gumbo dienji. Wamaganele ha fenetre yenji yakhalele ya gukangula, wafugamele, wakombelele Yehowa. Hanginyile mbalagaji jienji monzo, jiamusangele nu gusamba. Ayile muphushi gudi Daliyuse, azuelele egi: ‘Danyele wa gulumbugila. Udi musamba Nzambi wenji mbala thathu mu lusugu.’ Daliyuse wakhalele muzumba Danyele, gatshiginyilego gumushiya. Wakhalele mutangiza lusugu lua mudidi luholo luajiya muene guhuluisa Danyele. Uvi guakhalelego nga nu muthu mumoshi wajiya gusombegesa mukhuala wahagewe nga muene fumu. Daliyuse wawambelele athu enji ha gumba Danyele mu wina dia khoshi jiabala.
Mu phipha yene Daliyuse gabandelego, wakhalele gudisagesa mukunda nu Danyele. Wazugile nu gimenegena giagasue, wayile muphushi gu wina, watamegele Danyele egi: ‘Nzambi waye wa guhuluisa ba?’
Daliyuse wavile dijui dia muthu muzuela. Yakhalele Danyele! Wawambelele Daliyuse egi: ‘Muanjelo wa Yehowa wakangi makano a khoshi. Jiangutshitshilego nga gima.’ Daliyuse wasuangulugile muavula! Wawambelele athu ha guzola Danyele mu wina. Danyele gakhalelego nga nu phuta imoshi gu muila. Gungima fumu wazuelele egi: ‘Bishilenu mala agasue afundi Danyele mu wina.’ Tangua ambile athu ene mu wina, khoshi jiaakaluile.
Daliyuse wahanele athu enji mukhuala egi: ‘Athu agasue adi naye guvila Nzambi wa Danyele woma, handaga wahuluisa Danyele mu wina dia khoshi.’
Aye nji wana kombelela Yehowa lusugu nu lusugu gifua Danyele ba?
“Yehowa wana jiya luholo lua guhuluisa athu adi a gujinginyina gudi muene tangua adi mutagana nu malamba.”—2 Phetelo 2:9