Isona gu Gibayi

Mu tangua dimoshi ngenyi, Beleshazale wabuile fumu gu Babilona. Lusugu lumoshi mu phipha, watamegele athu avula a ndando mu gifutshi ha gutshita wano. Wawambele enya mudimo wenji ha guza nu makhopho a wolo anyi Nebukadenezale wazudile mu tempelo ya Yehowa. Beleshazale nu ngenji jienji anuile mu makhopho ene, gungima atumbuishile nzambi jiawo. Sagumugu, koko dia muthu diazogele gu muila gibayi, diasendesele gusonega isona imoshi ya gushimana gu gibayi gia ha fundo ana dia.

Beleshazale wavile woma. Watamegele nganga-ngombo jienji, waalayele egi: ‘Gula muthu mumoshi wangukotelesela mbimbi eji, mbangumubuisa muthu wa thathu wa ngolo jiavula gu Babilona.’ Akambele gukotelesa mbimbi jiene, uvi gushigo nga muthu mumoshi mukatshi diawo wabingile. Fumu mukhetu wanginyile, wazuelele egi: ‘Gudi nu yala mumoshi jina dienji Danyele, muene wakhalele mukotelesela Nebukadenezale ndaga. Wajiya nji gugukotelesela mbimbi eji.’

Danyele wajile gutuama dia fumu Beleshazale. Fumu wamuwambelele egi: ‘Gula watanga mbimbi eji nu wajikotelesa, mbanguguhana musanga wa wolo nu mbangugubuisa muthu wa thathu wa ngolo gu Babilona.’ Danyele wazuelele egi: ‘Ngushigo nu funu ya bakado aye, uvi ngudi gugukotelesela mbimbi jiene. Sh’aye wakhalele muenya lulendo, hene Yehowa wamubulumuishile. Aye mujiya ndaga jiagasue jiamubuidile, uvi wanemeselego Yehowa luholo wanui matombe mu makhopho akatugile mu tempelo yenji. Hene Nzambi wasonega mbimbi eji gu gibayi: Mene, Mene, Tekel, nu Parsin. Mbimbi eji jidi mukotelesa egi Mede nu Phelese mbaabinga dimbo dia Babilona, aye mbawushigo luko mukhala fumu.’

Yakhalele mumonega gifua gushigo nga muthu mumoshi wajiya gubinga Babilona. Dimbo dia Babilona diakhalele dia gutunga nu ibayi yakola, diakhalele nji nu muta wakoma wakhalele gudibamba. Uvi enya Mede nu enya Phelese aluishile dimbo dia Babilona mu phipha yene. Fumu Siluse wa gu Phelese, walondele njila ha gubalegesa meya a muta gu khanda iko, hagula masuta enji ajiya gunginyila ha mufulo wa dimbo. Tangua ahetele ha mufulo, awusangele wa uhululu! Masuta anginyile mu dimbo, aditambudile, ashiyile fumu. Gungima Siluse wabuile fumu wa Babilona.

Gungima dia mbeji, Siluse wazuelele egi: ‘Yehowa wanguwambela ha gutunga luko tempelo yenji gu Yelusalema. Athu enji agasue adi mutshigina guya mutshita mudimo wene, ajiya guya.’ Gifua luholo Yehowa walayele, tangua ivo 70 yataganele enya Yuda avula avutugile gu Yelusalema. Siluse waahanele makhopho a wolo nu a utadi wa siliva nu ikadigilo iko inyi Nebukadenezale wazanguile mu tempelo. Wamona luholo Yehowa wakalegele Siluse ha guhuluisa akombedi enji?