Ufumu udi Gifua Mutshi Wakoma

Lusugu lumoshi mu phipha, Nebukadenezale walotele nzoji imoshi yamuhanele woma. Watamegele enya ndunge ha gumukotelesela nzoji yene. Uvi nga muthu mumoshi gahanelego ukoteleshi wenji. Gungima fumu watele maga nu Danyele.

Nebukadenezale wawambelele Danyele egi: ‘Ngamonyi mutshi umoshi mu nzoji. Mutshi wene wasendesa gukula uu nu mu dilu. Athu agasue a ha mavu akhadi mumona mutshi wene. Wakhadi nu mayiji abonga nu mabundu avula. Shitu jiakhadi muza mukhala ha mushin’a mutshi wene. Tunjila tuakhadi muhaga yanzu mu thango jienji. Gungima muanjelo wakatuga mu dilu, wabulumuga. Wazuedi mu dijui diakola egi: “Kokenu mutshi wuwu, batulenu nji thango jienji. Uvi mbembenu shin’a dia mutshi wene nu miji yenji mu mavu, muyilange shinga jia utadi nu jia kuivre. Mutshima wa mutshi wuwu usombegesewe, ukhadigo luko mutshima wa muthu uvi ubue mutshima wa shitu jia mu foto; matangua 7 adi naye gubalega. Athu agasue mbaajiya egi Nzambi udi Fumu; mbaajiya nji egi wajiya guhana ufumu gudi muthu wagasue yatshigina muene.”’

Yehowa wahanele Danyele ukoteleshi wa nzoji yene. Tangua Danyele wajiyile ukoteleshi wa nzoji yene, wavile woma. Wazuelele egi: ‘O fumu, ngudi mutshigina egi nzoji yiyi ikhale mukunda nu mbalagaji jiaye; uvi idi mukunda nu aye. Mutshi wakoma unu wabuishiwa, idi aye. Mbawutotesa ufumu waye, mbawudia muangu mu temu gifua shitu ya mu foto. Uvi mbawubua luko fumu, handaga muanjelo wazuedi egi bembenu shin’a dia mutshi nu miji yenji mu mavu.’

Givo gimoshi giabalegele sendese tangua amuhanele ukoteleshi wa nzoji yenji. Lusugu lumoshi Nebukadenezale wakhalele muwenda mu veranda ya inzo yenji ya ufumu, wakhalele mushimana dimbo dia Babilona. Wazuelele egi: ‘Dimbo edi didi diabonga diago, ame ngaditungile. Ngudi diago muthu wakoma!’ Hakhalele muene muzuela, dijui dimoshi diakatugile mu dilu, diazuelele egi: ‘Nebukadenezale! Henyaha ufumu wa gutambudiwa.’

Mu tangua diene, Nebukadenezale wabuile muenya malui, wabuile gifua shitu ya mu foto. Amukayele mu inzo yenji ya ufumu, wasendesele gujinga nu shitu jia mu foto. Sanga dia Nebukadenezale diakudile gifua sala jia njila ya khuyi; mbonde jienji jiabuile gifua jia njila.

Gungima dia ivo 7, Nebukadenezale wavile muabonga. Yehowa wamubuishile luko fumu gu Babilona. Gungima Nebukadenezale wazuelele egi: ‘Ngudi mutumbuisa Yehowa, Fumu wa dilu. Hanyaha ngajiya egi Yehowa udi Fumu. Wabulumuisa enya lulendo, wajiya guhana ufumu gudi muthu wagasue watshigina muene.’