LONGO DIA 61
Atuna Gufugama
Gungima dia gulota nzoji ya gisongo gialeha, Fumu Nebukadenezale walondele gisongo gialeha gia wolo. Wagimagenesele mu temu dia Dula, watamegele athu agasue a ndando a mu gifutshi nu Shadrake nu Meshake nu Abedenego. Waawambelele ha gumagana gutuama dia gisongo. Gungima wazuelele egi: ‘Gula muavua matululu a phungi nu gitare nu mbinga, mudi naye gufugama phala mu mavu gutuama dia gisongo! Muthu wagasue watuna gufugama phala mu mavu, udi naye gumbiwa mu fure ya tshuya.’ Itshi mavuala thathu a enya Hebelu atshitshile? Ene nji afugamele phala mu mavu gutuama dia gisongo nga akombelele phamba Yehowa?
Gungima fumu wahanele njila egi asendese gushiga mizike. Tangua ashigile mizike athu agasue afugamele phala mu mavu, asendesele gukombelela gisongo; uvi Shadrake nu Meshake nu Abedenego asalele ya gumagana. Athu a amonele, awambelele fumu egi: ‘Enya Hebelu wawa thathu adi mutuna gukombelela gisongo giaye.’ Nebukadenezale waatamegele, waawambelele egi: ‘Ngudi gumihana okazio uko, gula ashiga luko mizike, mudi naye gukombelela gisongo. Uvi gula muatuna, ngudi gumibishila mu fure ya tshuya. Gushigo nga nu nzambi mumoshi wajiya gumihuluisa ha mago ami.’ Uvi azuelele egi: ‘Tushigo nu funu egi utuhane okazio uko. Nzambi wetu wajiya gutuhuluisa. Uvi ikhale gatuhuluishilego, tushigo mukombelela gisongo.’
Nebukadenezale wavila khabu jiavula. Wawambelele athu enji egi: ‘Hagenu tshuya tuavula mu fure mbala 7, gubalega luholo muana haga!’ Gungima wawambelele masut’enji egi: ‘Jitshigenu mala wawa, muabishile ha tshuya!’ Fure yene yakhalele nu tshuya tuavula diago; hene masuta anyi asuenele ha guabishila afile mbala imoshi. Uvi enya Hebelu thathu abuile hakatshi dia tshuya. Tangua Nebukadenezale watalele, wamonele mala nguana muwenda hakatshi dia tshuya. Wavile woma wavula, wasendesele gudigita, wahudile enya mudimo wenji egi: ‘Muabishila mala thathu ha tshuya? Ame ngudi mumona athu nguana, muthu mumoshi udi mumonega gifua muanjelo!’
Nebukadenezale wasuenele hehi nu fure ya tshuya, watamegele egi: ‘Enya mudimo wa Nzambi wa Gudinyinyiga, zogenu!’ Tangua Shadrake nu Meshake nu Abedenego azogele ha tshuya, athu agasue adihudile ha gumona egi ahilego tshuya. Ilema yawo nu sanga nu milele yawo yahilego nji tshuya; akhalelego nji muzoga vumba dia mishi.
Nebukadenezale wazuelele egi: ‘Nzambi wa Shadrake nu Meshake nu Abedenego udi wakoma diago. Watumi muanjelo wenji ha guahuluisa. Gushigo nu nzambi muko udi gifua Nzambi wawo.’
Aye nji wazula desizio dia gusala ya gujinginyina gudi Yehowa gifua enya Hebelu thathu, ikhale watagana nu ndaga ya luholo lutshi ba?
“Udi naye gukombelela phamba Yehowa Nzambi waye, muene hakhenji udi naye gukalegela mudimo wa gijila.”—Matayo 4:10