Ufumu Umoshi Mbawuhinyina Mayilago

Lusugu lumoshi mu phipha, Fumu Nebukadenezale walotele nzoji. Nzoji yene yamusagesele muavula, tulo tuamutotele gu meso. Watamegele nganga-ngombo jienji, waawambelele egi: ‘Ngukoteleselenu nzoji ngalotshi.’ Amuwambelele egi: ‘Oo fumu, tuwambele nzoji yene.’ Uvi Nebukadenezale waawambelele egi: ‘Ndo! Nguwambelenu nzoji ngalotshi, gula ndo ngudi gumishiya.’ Amuwambelele luko egi: ‘Tuwambele nzoji walotshi hagula tuguhane ukoteleshi wenji.’ Wazuelele egi: ‘Mukut’enu agasue mudi mutshigina gunguhuiga. Nguwambelenu nzoji ngalotshi!’ Awambelele fumu egi: ‘Gushigo nga nu muthu mumoshi wajiya gutshita ndaga ya luholo elu. Ndaga udi gututoga idi yakola.’

Nebukadenezale wavile khabu jiavula diago, wazuelele egi athu agasue atema adi mu gifutshi adi naye gushiyiwa. Yakotelesa egi akhalele naye nji gushiya Danyele nu Shadrake nu Meshake nu Abedenego. Danyele watogele fumu ha guabembela ndambo ya tangua. Gungima muene nu mafut’enji akombelele Yehowa, amutogele ha guakuatesa. Aye mujiya ndaga Yehowa wakalegele?

Wamonesele Danyele mu visio nzoji yalotele Nebukadenezale nu wamuhanele ukoteleshi wa nzoji yene. Mu lusugu lualanduile, Danyele wayile muwambela muenya mudimo wa fumu egi: ‘Ushiyi gale ndo athu atema. Ngajiya gukotelesela fumu nzoji yenji.’ Muenya mudimo muene wayile nu Danyele gutuama dia fumu. Danyele wawambelele Nebukadenezale egi: ‘Nzambi wa gumonesa ndaga mbajibua mu masugu adi muza. Nzoji walotshi yene eyi: Wamonyi gisongo gimoshi gialeha, muto wenji wakhadi wa wolo, thulo nu mago enji akhadi a utadi wa siliva, vumo nu mashin’a malu enji akhadi a kuivre, malu enji akhadi a utadi, ikanzo yenji yakhadi ya utadi wa gubungisa nu wuma. Gungima wamonyi seso dimoshi mukatuga gu mulundu, diawashi gisongo giene gu ikanzo. Gisongo giatshatshumuga, giabui fuphi, gungima fuphi yene yamuangana mu muhehe. Seso diene diabui mulundu wakoma, diazadi ha mavu agasue.’

Gungima Danyele wazuelele egi: ‘Ukoteleshi wa nzoji yaye wene wuwu: Ufumu waye udi muto wa wolo. Utadi wa siliva udi ufumu unu mbawuhinyina gungima diaye. Gungima mbagukhala nu ufumu uko mbawukhala gifua kuivre; ufumu wene mbawuhinyina ha mavu a mudidi. Gungima dienji mbagukhala nu ufumu uko mbawukhala wakola gifua utadi. Gugisugishilo, ufumu mbawudikhapha mu itshinyi mbadi, gitshinyi giko mbagikhala giakola gifua utadi, giko gialeba gifua wuma. Seso dinyi diabui mulundu, idi Ufumu wa Nzambi. Mbawumuanga mawufumu agasue nu mbawuhinyina mayilago.’

Nebukadenezale wafugamele phala mu mavu gutuama dia Danyele. Wazuelele egi: ‘Nzambi waye waguwambela nzoji yiyi. Gushigo nu Nzambi muko gifua muene.’ Ha fundo dia gushiya Daniele, Nebukadenezale wa muhagele fumu wa athu agasue atema, nu ha guhuinyina ba provense agasue a gu Babilona. Wamona luholo Yehowa wahanele mvutu gu gisambu gia Danyele?