Mavuala a Mala Nguana Atumagela Yehowa

Tangua Nebukadenezale wabatele manene a gu Yuda gu Babilona, waahanele ha mago a muenya mudimo wenji mumoshi ha guabamba, jina dienji Ashipenaze. Wawambelele Ashipenaze ha gumukambela mavuala a mala atema, adi nu ngolo mukatshi dia enya Yuda. Mavuala ene akhalele naye guzula formasio mu ivo thathu. Formasio yene yakhalele naye guakuatesa ha guheta inemo yakoma gu Babilona. Mavuala ene akhalele naye gulonguga gutanga, gusonega nu guzuela Akkadien zuelelo dia enya gu Babilona. Akhalele naye gudia ima inyi fumu wana dia nu enya inzo yenji. Majina a mavuala ene nguana akhalele: Danyele, Hananiya, Mishaele, nu Azariya. Ashipenaze waahanele majina a gu Babilona: Beleteshazale, Shadrake, Meshake, nu Abedenego. Formasio yene yakhalele naye guakanga njila ha gukombelela Yehowa ba?

Mavuala ene nguana azudile desizio dia gutumagela Yehowa. Akhalele mujiya egi ashigo naye gudia ima yana dia fumu handaga ima iko mukashi dia ima yene yakhalele ya usale; mukhuala wa Yehowa wakhalele mutunyisa gudia ima yene. Awambelele Ashipenaze egi: ‘Tuabuba, utuhanyigo ima yana dia fumu.’ Ashipenaze waawambelele egi: ‘Gula muatuna gudia ima yana dia fumu, gungima muakhuwa, fumu mbawungushiya!’

Danyele wahanele matangi abonga. Wawambelele muthu wakhalele guabamba egi: ‘Tuabuba, khala gutuhana phamba mayiji nu meya masugu kumi. Gungima utufuanese nu mavuala ako adi mudia ima yana dia fumu.’ Muthu wakhalele guabamba watshiginyile.

Gungima dia masugu kumi, Danyele nu mafut’enji thathu akhalele nu sante yabonga gubalega mavuala ako. Yehowa wasuangulugile luholo amutumagele. Wahanele Danyele ndunge jia gukotelesa vizio nu nzoji.

Tangua formasio yahuile, Ashipenaze wabatele mavuala ene gutuama dia Nebukadenezale. Fumu wasendesele guta nawo maga, wakotelesele egi Danyele nu Hananiya nu Mishaele nu Azariya akhalele nu ndunge jiavula gubalega mavuala ako. Waatombele ha gutshita mudimo mu inzo yenji ya ufumu. Gula gudi nu mulonga umoshi wakoma, fumu wakhalele guatoga malongo. Yehowa waahanele ndunge jiavula gubalega ahanyi a malongo a fumu nu nganga-ngombo jienji.

Ikhale Danyele nu Hananiya nu Mishaele nu Azariya akhalele mu gifutshi giko, uvi ajimbidilego egi akhalele akombeledi a Yehowa. Aye nji mbawulandula guwunguluga Yehowa ikhale ushigo fundo dimoshi nu mvuaji jiaye ba?