Yelusalema Yashiyiwa

Enya gu Yuda alanduile gutshita ndaga jiabola, abembele Yehowa, akhalele mukombelela nzambi jia mambo. Yehowa wakhalele guakuatesa ivo yavula. Waatumidile baprofete avula ha guatemesa, uvi atunyile guategelela. Akhalele mulela baprofete. Luholo lutshi Yehowa wasugishile gikombelelo giawo gia mambo?

Nebukadenezale fumu wa gu Babilona wakhalele mubinga ifutshi yavula. Mbala ya thomo yabingile muene dimbo dia Yelusalema, wakuatele Fumu Yoyakine nu manene nu masuta nu mbembo, wayile nawo gu Babilona. Wazanguile nji umonyi wagasue wakhalele mu tempelo ya Yehowa. Gungima Nebukadenezale wabuishile Sedesiase fumu gu Yuda.

Thomo, Sedesiase wakhalele mutumagela Nebukadenezale. Uvi gungima ifutshi ya hehi nu baprofete a mambo amuwambelele ha gulumbugila fumu wa gu Babilona. Yelemiya wamutemesele egi: ‘Gula wamulumbugila, gufua nu nzala nu misongo mbayikhala gu Yuda.’

Sedesiase wahinyine ivo 8, gungima wazudile desizio dia gulumbugila fumu wa gu Babilona. Watogele masuta a gu Ejipitu ha guza gumukuatesa. Gungima Nebukadenezale watumine masuta enji ha guluisa Yelusalema. Ahagele phundo yawo hehi nu Yelusalema. Yelemiya wawambelele Sedesiase egi: ‘Gula wadihana ha mago a enya Babilona, mbaashigo gugushiya nga gushiya Yelusalema. Uvi gula watuna, enya Babilona mbakonda dimbo dia Yelusalema, mbaagukuata, mbaagubata mu uhiga.’ Sedesiase wazuelele egi: ‘Ngajiyilego gudihana ha mago awo!’

Gungima dia givo gimoshi nu ndambo, masuta a gu Babilona amuangele ibayi ya Yelusalema, akondele dimbo tshuya. Akondele tempelo, ashiyile athu avula, abatele nji athu avula mu uhiga.

Sedesiase wazogele gu Yelusalema, walengele. Uvi enya Babilona amuhatele. Amukuatele hehi nu dimbo dia Yeliko, amubatele gutuama dia Nebukadenezale. Fumu Nebukadenezale washiyile ana a Sedesiase ha meso enji. Gungima wamubudile meso, wamumbile mu bologo, guene guafidile muene. Uvi Yehowa walayele enya Yuda egi: ‘Mbangumivutula gu Yelusalema gungima dia ivo 70.’

Ndaga itshi yakhalele naye gubuila mavuala anyi abatewe mu uhiga gu Babilona? Mbaasala yagujinyina gudi Yehowa ba?