Yehowa Watuma Yelemiya ha Gulongesa

Yehowa watombele Yelemiya ha gukhala profete wa enya gu Yuda. Wamuwambelele ha gulongesa athu nu guatemesa ha gubemba gukalagala ndaga jiabola. Yelemiya wazuelele egi: ‘Yehowa, ngudi mona wazonda. Ngushigo mujiya luholo lua guzuela gutuama dia athu.’ Yehowa wamuwambelele egi: ‘Uvigo woma, mbangugukuatesa. Mbanguguwambela ndaga jia guzuela.

Yehowa wawambelele Yelemiya egi, bungisa akulu a athu, ubule bungu dia wuma gutuama diawo, waawambele egi: ‘Yelusalema mbayisasumuiwa gifua bungu edi.’ Tangua Yelemiya wakalegele ndaga jiamuwambelele Yehowa, akulu avila khabu jiavula. Nganga-nzambi mumoshi jina dienji Phashehule wawasele Yelemiya, wamumbile mago nu malu mu mululu. Yelemiya gakhalelego nu luholo lua gukatuga fundo diene phipha ya mudidi. Mu gimenegena gia lusugu lualanduile, Phashehule wamukatuile mu mululu. Yelemiya wazuelele egi: ‘Ngahuila gami, ngumubemba gulongesa.’ Uvi wabembele diago mudimo wa gulongesa ba? Ndo sha. Tangua Yelemiya wazudile tangua dia gutangiza luko muavula mukunda nu ndaga yene, wazuelele egi: ‘Mbimbi ya Yehowa idi gifua tshuya mukatshi diami. Ngajiyilego gubemba gulongesa.’ Yelemiya walanduile gulongesa athu.

Gungima dia ivo, fumu muhe-muhe wasendesele guhinyina gu Yuda. Nganga-nzambi nu baprofete a mambo akhalelego musuanguluga nu ndaga jiakhalele mulongesa Yelemiya. Awambelele mafumu egi: ‘Muthu yowu udi naye gushiyiwa.’ Yelemiya wazuelele egi: ‘Gula muangushiya, mualaba genu gungushiya. Ndaga ngudi muzuela jidi mukatuga gudi Yehowa, uvi gudi ame ndo.’ Tangua mafumu avile ndaga yene, azuelele egi: ‘Muthu yowu gashigo naye gushiyiwa.’

Yelemiya walanduile gulongesa, uvi mafumu akhalele gumuvila khabu. Atogele fumu ha gumushiya. Fumu waawambelele egi, mutshitenu yagasue muatshigina. Akuatele Yelemiya, amubishidile mu wina dialeha diakhalele nu ithotho, akhalele mutangiza egi udi mufua muene. Yelemiya wasendesele gudivumbiga mu ithotho.

Muthu mumoshi wakhalele mutshita mudimo gu inzo ya fumu, jina dienji Ebede-meleke, wawambelele fumu egi: ‘Mafumu abishila Yelemiya mu wina, gula tuamubemba muene, udi mufua.’ Hene, fumu wawambelele Ebede-meleke ha guzula mala 30 ha guya muzola Yelemiya mu wina. Esue nji tudi naye gukhala gifua Yelemiya, tushigo naye gubemba nga ndaga imoshi itukange njila ya gulongesa.