Yesu Wakaya Enya Mungenda mu Tempelo

Mu mbeji ya Avril ya givo 30 G.Y., Yesu wayile gu Yelusalema. Mu tangua diene athu avula akhalele muza guene mukunda nu wano wa Pake. Mu tangua dia wano wene, athu akhalele muhana milambu ya shitu mu tempelo. Athu ako akhalele mubata shitu, uvi ako akhalele gujisumba gu Yelusalema.

Tangua Yesu wanginyile mu tempelo, wasangele athu mudiga shitu. Akhalele mutshita mungenda mu inzo ya Yehowa! Itshi Yesu watshitshile? Walondele fimbo nu ngonji, wakayele athu akhalele musumbisa imeme nu ngombe mu tempelo. Wamuangele mesa a athu akhalele musombegesa makuta, wabishidile makut’awo mu mavu. Yesu wawambelele athu akhalele musumbisa pijio egi: ‘Katulenu ima eyi haha! Mubuisago inzo ya Tata wami, inzo ya mungenda!’

Athu akhalele mu tempelo adihudile diago mukunda nu ndaga jiakalegele Yesu. Alandudi enji awungulugile profesi yakhalele muzuela mukunda nu Masiya egi: ‘Mbangumonesa gikhesa giavula mukunda nu inzo ya Yehowa.’

Gungima, mu givo 33 G.Y., Yesu wabuishile luko tempelo yaphelegeta mu mbala ya ngiadi. Gabembelego egi athu atshite ndaga jidi mumonesa egi ashigo munemesa inzo ya Sh’enji.