Mukhetu Mumoshi udi gu Wina dia Meya

Gungima dia wano wa Pake, Yesu wayile nu alandudi enji gu Samaliya, gungima avutugile gu Galileya. Tangua ahetele hehi nu dimbo dia Sishale, Yesu wamaganele ha fundo dimoshi diana tamegewa egi wina dia meya dia Yakoba. Tangua diakhalele muene muhululuga, alandudi enji ayile mu dimbo ha gusumba ima ya gudia.

Mukhetu mumoshi wajile muthaya meya mu wina diene. Yesu wamuwambelele egi: “Nguhane meya a gunua.” Uvi mukhetu muene wamuvutudile egi: ‘Mukunda natshi udi gunguzuelesa? Ame ngudi muenya gu Salimaya. Enya Yuda ana gudivua ndo nu enya Samaliya.’ Yesu wamuwambelele egi: ‘Nga wajiyi muthu udi gugutoga meya, nga aye wamutogi nawo; nga ngaguhanyi meya a monyo.’ Mukhetu muene wahudile egi: ‘Idi mukotelesa itshi?’ ‘Ushigo nga nu kantine ga guthayela meya.’ Yesu wamuwambelele egi: ‘Muthu wagasue mbawunua meya mbangumuhana, mbagashigo luko muvua luhungu.’ Mukhetu muene wazuelele egi: “Fumu, nguhane meya ene.”

Yesu wamuwambelele egi: “Nda utamege mulumi’aye, uze n’enji haha.” Uvi mukhetu muene wazuelele egi: “Ngushigo nu yala.” Yesu wazuelele egi: ‘Wazuela giamatshidia, handaga wazudile gale mala thano, uvi yala udi n’enji henyaha gashigo mulumi’aye.’ Mukhetu muene wazuelele egi: ‘Ngudi mumona egi aye udi profete. Akhakh’etu akombelele ha mulundu wuwu; uvi enue mudi muzuela egi fundo athu agasue adi naye gukombelela Nzambi didi gu Yelusalema. Ngudi mujiya egi Masiya udi muza. Tangua mbadiza muene mbawutuwambela luholo lua gukombelela.’ Gungima Yesu wamuwambelele ndaga imoshi inyi gakhalele khenji gawambela galego nga muthu mumoshi. Wazuele egi: ‘Ame, Ngudi Masiya.’

Mukhetu muene wayile muphushi mu dimbo, wawambelele enya Samaliya n’ako egi: ‘Ngumutangiza egi ngamona Masiya. Udi mujiya ndaga jiami jiagasue. Tuyenu, mumumone!’ Alanduile mukhetu muene gu wina, ategelele luholo Yesu wakhalele mulongesa.

Enya Samaliya awambelele Yesu ha gukhala mu dimbo diawo. Yesu walongesele masugu mbadi mu dimbo diene; athu avula ashile gutshigina gudi muene. Athu ene awambelele mukhetu wa gu Samaliya egi: ‘Gungima dia gutegelela muthu yowu, tuakotelesa egi muene udi diago muhuluishi wa mavu.’