Diskur Holu dia Mulundu

Gungima dia gutomba apostolo 12, Yesu wakatugile gu mulundu wabulumugile fundo athu akhalele avula. Athu ene akatugile gu Galileya, gu Yudea, gu Tile, gu Sidona, gu Siliya nu mu mafundo adi ha sambua dia muta wa Yordane. Abatele athu akhalele nu misongo nu athu akhalele musagesewa gudi bademo. Yesu waasagele mukut’awo agasue. Gungima wakhalele hashi holu dia mulundu, wasendesele gulongesa. Wamonesele ndaga tudi naye gutshita ha gubua mafuta a Nzambi. Tudi naye gujiya egi tudi nu funu ya Yehowa mu monyo wetu nu tudi naye gumuzumba. Uvi tuajiyilego guzumba Nzambi gula tushigo muzumba athu ako. Tudi naye gumonesa gisemo nu gukalagala ndaga jiabonga gudi athu agasue, ikhale mbalagaji jietu.

Yesu wazuelele egi: ‘Ushigo naye guzumba phamba mafut’aye. Udi naye nji guzumba mbalagaji jiaye nu gutotesela athu nu mutshima umoshi. Gula muthu mumoshi wa guvila khabu, nda umumone, umutoge pardon. Kalegela athu ako ndaga gifua luholo udi mutshigina egi agukalegele.’

Yesu wahanele nji athu malongo abonga atadila ima ya gujingila. Wazuelele egi: ‘Gukhala futa dia Yehowa gudi nu ndando yavula gubalega gukhala nu makuta avula. Nzangi yajiya gukuya makuta aye uvi gushigo nu muthu wajiya gukuya ufuta waye nu Yehowa. Mudisagesago egi itshi mbatudia, itshi mbatunua nga itshi mbatusudiga. Talenu tunjila. Nzambi wana gutuhana ima ya gudia yavula. Gushigo nga nu muthu wajiya gulehesa monyo wenji gula udi gudisagesa. Mujimbilago egi Yehowa udi mujiya ndaga mudi najio funu.’

Athu akhalele khenji avile gale ndo muthu muzuela gifua Yesu. Mafumu a ikombelelo akhalelego gualongesa ndaga jiene. Mukunda natshi Yesu wakhalele mulongeshi wakoma? Handaga ndaga jiagasue jiakhalele mulongesa muene jiakhalele mukatuga gudi Yehowa.