Longi dia 3

Udi Nu Funu Ya Gulonguga Ndaga Jia Nzambi

Ha gukhala futa dia Nzambi, udi nu funu ya gulonguga ndaga jienji. Mafuta aye ajiya jina diaye nunji anudisadila ba? Ayi. Nzambi umutshigina egi aye ujiye nunji usadile jina dienji. Jina dia Nzambi didi Yehowa. (Ngimbo 83:18, NW; Matayo 6:9, NW) Nunji udi naye diago gulonguga hagujiya ndaga jianutshigina nu jianutuna. Udi naye gujiya mafuta enji nu mbenyi jienji. Yanulomba tangua diavula hagujia muthu. Bibila didi muzuela egi tudi naye gukhala nu ndunge jia guheta kumbi dia gulonguga ndaga jia Yehowa.​—Efeso 5:15, 16.

Mafuta a Nzambi anukita ndaga jia numusuanguluisa. Tangiza gale mafuta aye. Gula wanuguakitshila ndaga jiabola nu ndaga jianutuna ene, ufuta wenu mbaumujinga luko ba? Ndo sha! Giteso gingoshi, gula watshigina gukhala futa dia Nzambi, udi naye gukita ndaga jidi gumusuanguluisa.​—Yone 4:24.

Ikombelelo yagasue yanubatago gu ufuta nu Nzambi. Yesu, muthu udi futa diakoma dia Nzambi, watumbudile njila jiyadi. Njila ingoshi idi yakoma nunji idi yazala athu. Njila yene yanubata gu gufwa. Njila iko idi ya yazonda nunji athu anoilandula ashi avula ndo. Njila yene yanubata gu lujingu lua ivo nu ivo. Ngenyi idi mudijiga egi gula watshigina gukhala futa dia Nzambi, udi naye gulonguga njila yabonga ya gumukombelela.​—Matayo 7:13, 14.