Longi dia 10
Luholotshi Wajiya Gujiya Dibundu Dia Giamatshidia
Gula watshigina gukhala futa dia Nzambi, udi naye gusadila ukombelelo wanutshigina Nzambi. Yesu wazuelele egi “akombeledi a giamatshidia” mbakombelela Nzambi mu mitshima yawo nu mu “giamatshidia.” (Yone 4:23, 24) Njila yabonga ha gukombelela Nzambi idi khuta ingoshi. (Efeso 4:4-6) Dibundu dia giamatshidia dianu bata gu lujingu lua ivo nu ivo, uvi dibundu dia mambo dianu bata gu lufua.—Matayo 7:13, 14.
Hagujiya dibundu dia giamatshidia udi naye gutala athu adi mu dibundu diene. Mukunda Yehowa udi muthu wabonga, akombeledi enji a giamatshidia adi naye gukhala athu abonga. Luholo mutshi wa malala wabonga wanubuta khuta malala abonga, dibundu diabonga dianubuta athu abonga.—Matayo 7:15-20.
Mafuta a Yehowa anujitisa Bibila muavula. Anujiya egi Bibila diakatugile gua Nzambi. Anubemba ndaga jianuzuela mbimbi yene hagutuameza lujingu luawo, hagulonda ndaga jiawo, nunji ha guakwatesa ha gulonguga ndaga jimutala Nzambi. (2 Timote 3:16) Anukolesela hagusalela ndaga jianu longa.
Mafuta a Yehowa anudizumba ene nu ene. Yesu walongele athu ndaga jia Nzambi, wasagele enya misongo, hagumonese guzumba guenji. Athu adi mu dibundu dia giamatshidia anuzumba nji athu ako. Gifua Yesu, anumonago athu ako phamba mukunda ashi nu gimvuamago nga ndo mukunda adi ndinga iko. Yesu wazuelele egi athu mbajiya alandudi enji mukunda nu gudizumba guawo.—Yone 13:35.
Mafuta a Nzambi anujitisa jina dia Nzambi, Yehowa. Gula muthu umutuna gusalela jina diaye, wajiya gukhala futa diaye diakoma ba? Ndo! Gula tudi nu futa dietu, tuanusalela jina dienji nunji tuanuzuela ima yabonga ya futa dietu gudi athu ako. Hene, athu adimutshigina gukhala mafuta a Nzambi, adi naye gusalela jina dienji nu guleza athu ako ndaga jienji. Yehowa umutshigina egi tutshite ngenyi.—Matayo 6:9; Lomo 10:13, 14.
Gifua Yesu, mafuta a Nzambi anulonga athu ndaga jimutalele Ufumu wa Nzambi. Ufumu wa Nzambi udi uhinyinyi wa mu dilu mbaubalumuna mavu phaladisu. Mafuta a Nzambi anuleza athu ako lukuma luabonga lua Ufumu wa Nzambi nu athu ako.—Matayo 24:14.
Mathemua a Yehowa anukolesela hagukhala mafuta a Nzambi. Anu jitisa Bibila nunji anudizumba ene nu ene. Anusalela nunji anujitisa jina dia Nzambi. Anulonga nji athu ako ndaga jia Ufumu wa Nzambi. Mathemua a Yehowa adi mu dibundu dia giamatshidia holu dia mavu mangino.