Longi dia 11
Tuna Dibundu Dia Mambo!
Satana nu ndele jienji ashi mutshiginago egi usalele Nzambi. Amutshigina egi gula luholo ludi gwene, akatule athu agasue gudi Nzambi. Anumega guikita luholotshi? Njila ingoshi idi dibundu diamambo. (2 Korinto 11:13-15) Dibundu dianukhala diamambo gula dishigo mulonga giamatshidia gidi mu Bibila. Dibundu diamambo didi gifua falanga jia mambo—wajiya gujimona gifua jiabonga, uvi jishi nu funu ndo. Jia lenda gugubatela malamba.
Mabundu a mambo ajiilego ata hazonda gusuanguluisa Yehowa, Nzambi wa giamatshidia. Kumbi diakhalele Yesu hamavu, guakhalele nu gimvuga gimoshi gia dibundu giatshiginyine gomushiya. Akhalele mutangiza egi mutshindo wawo wa gukombelela wakhalele wabonga. Azuelele egi: “Tudi nu Tata mumoshi, muene Nzambi diago.” Yesu watshiginyine ba? Ndo! Wawambelele egi: “Enue mudi an’a Diabulu.” (Yone 8:41, 44) Mangino, athu avula anutangiza egi anukombelela Nzambi, uvi anusalela diago Satana nu ndele njenji!—1 Korinto 10:20.
Luholo mutshi wabola wanubuta mbuma jiabola, dibundu diabola dianubuta athu anutshita ima yabola. Gifutshi gidi giazala nu mavuanga mukunda nu ima yabola imukita athu. Athu amukita ndaga jia sonyi, amulua, amukuiya, amumwenesa ako dilamba, amushiya athu, nu gubandesa akhetu gu ngolo. Athu avula anutshita ima ii yabola adi nu dibundu diawo, uvi dibundu diawo dianuguahua ngolo ndo jiagukita ndaga jiabonga. Ajiilego gukhala mafuta a Nzambi gula abembele ndo gukita ima yabola.—Matayo 7:17, 18.
Mabundu a mambo anulonga athu hagukombelela ikhokho. Nzambi umutumbula egi gukombelela ikhokho ndo. Guhata longi didi gudi, gutema. Walenda gutshigina gula muthu mumoshi ganuguuzuelesa ndo, uvi umuzuelesa khuta foto yaye? Muthu yonyi walenda gukhala futa diaye dia giamatshidia ba? Ndo. Yehowa wanutshigina egi athu amuzuelese, uvi gunyima dia ikhokho nga foto ndo, ima yakonda monyo.—Guzoga 20:4, 5.
Dibundu dia mambo dianulonga egi idi muabonga sha hagushiya athu ako mu tangua dia ita. Yesu wazuelele egi mafuta a Nzambi mbadizumba ene ene. Tanushiyago athu tuanuzumba. (Yone 13:35) Idi muabola nji gula tashiya athu abola. Mu kumbi mbenyi jia Yesu jiajile gumukwata, gabembelego alandudi enji egi amuluile hagumubamba.—Matayo 26:51, 52.
Dibundu dia mambo dianulonga egi athu abola mbaamona lamba mu milungi ya tshiya. Uvi, Bibila dimulonga egi masumu anubata gu gufua. (Lomo 6:23) Yehowa udi Nzambi waguzumba. Nzambi waguzumba walenda guhua athu dilamba ivo nu ivo ba? Ata habiyo ndo! Mu Phaladisu, dibundu diabonga mbadikhala khuta dimoshi dinyi dianu tshigina Yehowa. (Yatuwuwe 15:4) Mabundu agasue anusalela mambo a Satana mbaashiiwa.