Longi dia 1

Nzambi Udi Gugulomba Egi Ubwe Futa Dienji

Nzambi umutshigina ukhale futa dienji. Watangijiile gale hagukhala futa dia Muthu mungoshi wabalegela gukoma hashi nu mu dilu? Abalahami, muthu you wajingile mualeha sha, wakhalele mutamegewa egi futa dia Nzambi. (Yakoba 2:23) Athu ako adi muzwela Bibila atshitile nji ufuta nu Nzambi nunji azanguile gusuanguluga guavula sha. Mangino, athu a iphuta yagaswe ya hamavu abwa mafuta a Nzambi. Naye nji wajiya gubwa futa dia Nzambi.

Gukhala futa dia Nzambi guabalega sha gukhala futa dia muthu muko. Nzambi gonuhua mafuta enji a masonga sonyi ndo ata hazonda. (Ngimbo 18:25) Gukhala futa dia Nzambi guabalega sha gukhala nu gimvwama. Gula mvwama wafwa, falanga jienji jianoya gua athu ako. Uvi, gimvwama gia mafuta a Nzambi, ata muthu mumoshi gajiile guatambula nagio ndo.​—Matayo 6:19.

Athu ako alenda gumega gugutunyisa hagula ubembe gulonguga ndaga jia Nzambi. Ata mafuta aye nu enya giphuta giaye alenda gutshita ngenyi. (Matayo 10:36, 37) Gula athu ako adi gogulela nga gugusebulula, dihule egi, ‘Ngatshigina gusuanguluisa nanyi​—athu nga Nzambi?’ Tangiza ndaga ii: Gula muthu mungoshi waguleza egi bemba gudia, wajia gumuvila ba? Ya diago wajiile gumuvila ndo! Udi nu funu ya gudia hagujinga. Uvi, Nzambi wajiya gugujingisa ivo nu ivo! Nunji uhuigo ata muthu mumoshi njila ya gogutunyisa hagulonguga luholo wajiya gubwa futa dia Nzambi.​—Yone 17:3.