Yesu Wawenda Holu dia Meya

Yesu wakhalele nu ngolo jia gusaga athu adi nu misongo, gufuzumuna athu a gufua, guhenesa muhehe nu gukanga mvula. Tangua Yesu wakatugile gu mulundu fundo diayile muene musamba, wamonele funji yakola mubunda mu Kianga gia Galileya. Apostolo akhalele mu wato, akhalele muluga khayi nu ngolo jiagasue uvi funji yakhalele yakola diago. Yesu wabulumugile gu muta, wasendesele guwenda holu dia meya ha guya ha fundo diakhalele wato. Tangua apostolo amonele muthu muwenda holu dia meya, avile woma wavula. Uvi Yesu waawambelele egi: ‘Muvigo woma, idi ame.’

Phetelo wazuelele egi: ‘Fumu gula idi diago aye, nguwambele nguze gudi aye.’ Yesu wawambelele Phetelo egi: ‘Iza.’ Mu tangua diene funji yakhalele yakola diago, uvi Phetelo wazogele mu wato, wawendele holu dia meya uu nu ha fundo diakhalele Yesu. Uvi tangua Phetelo wasuenele hehi nu Yesu, watalele funji, wavile woma. Wasendese gushuwuga mu muta. Phetelo wakalulugile egi: ‘Fumu, Nguhuluise!’ Yesu wamukuatele mu koko, wazuelele egi: “Aye muenya gutshigina guazonda, mukunda natshi udi muvua woma?”

Tangua Yesu nu Phetelo anginyile mu wato, funji yahuile mbala imoshi. Tangiza luholo apostolo adivile. Azuelele egi: “Giamatshidia aye udi Mun’a Nzambi.”

Yakhalelego mbala ya thomo Yesu wahenesele muhehe. Lusugu lumoshi, Yesu nu apostolo akhalele muzawuga ha guya gu sambua diko dia kianga, Yesu wabandele mu wato. Tangua diakalele muene gu tulo, funji yakola yabundjile. Matshipha-tshipha a meya asendesele gungina mu wato, meya azalele mu wato. Apostolo asendesele guzugisa Yesu, akalulugile egi: ‘Mulongeshi, tufua! Tukuatesa!’ Yesu wazugile wawambelele kianga egi: “Hena tedie!” funji nu kianga yahenele mbala imoshi. Yesu wahudile apostolo egi: ‘Mukunda natshi mushigo nu gutshigina?’ Apostolo azuelele egi: “Nu funji nu kianga idi gumuvila.” Apostolo akotelesele egi gula ashila Yesu mutshima mbaashigo muvua woma nga wa gima gimoshi.