Mutuameji Yonu Wajiya Guhenesa Meya nu Funji

Yesu wadishile athu avula mu luholo lua gushimana, athu ashimanele diago mukunda nu ndaga yene. Azuelele egi: ‘Giamatshidia muthu yowu udi diago profete wakhalele naye guza ha mavu,’ Masiya, mbawukhala diago mutuameji wabonga. (Yone 6:14; Mikhuala 18:18) Gishina giene, athu adivile ha gukuata Yesu hagula amubuise fumu gu ngolo.

Uvi Yesu wajiyile matangi awo. Wawambelele athu ha guya gu jinzo jiawo. Gungima, muene nu alandudi enji anginyine mu wato wawo. Ayile gui? Ayile gu dimbo dia Betesayida, gungima ayile gu Kaphelenauma. Uvi Yesu wakandugile hakhenji holu dia mulundu ha gukalagala gisambu.

Tangua diazonda gutuama egi guma gutshie, Yesu wamaganele gualeha mutala wato, mueji wa ngonda wakhalele guene. Funji yakola yazolele matshipha-tshipa mu kianga, apostolo akhalele ‘mulambagana ha guluga wato handaga funji yakhalele muaatshitshidisa.’ (Mako 6:48) Yesu wabulumugile gu mulundu, wasendesele guwenda holu dia meya uu nu fundo diakhalele alandudi enji. Akhalele ‘awendesa gale wato bakilometre mutano nga musamano.’ (Yone 6:19) Alandudi amonele gifua Yesu wakhalele mutshigina guabalega, akalugile mu dijui diakola nu woma wabala egi: “Gigi gimona-mona!”—Mako 6:49, NW.

Yesu waahanele gikhesa egi: ‘Koleshienu mitshima yenu! Yowu ame, mukhadigo nu woma.’ Uvi Phetelo wa muwambelele egi: ‘Fumu gula aye, nguwambele hagula ame nguze gudi aye holu dia meya.’ Yesu wamubalumuine egi: “Iza!” Hene, Phetelo wazogele mu wato, wawendele holu dia meya ha guya gudi Yesu. Uvi tangua gatalele matshipha-tshipa a meya, Phetelo wavile woma, wasendesele gushiwuga mu meya. Wakalugile mu dijui diakola egi: ‘Fumu, nguhuluise!’ Phetelo wathuphudile koko dienji, Yesu wamukuatele gu koko, wazuelele egi: ‘Aye muenya gutshigina gua zonda, mukunda natshi udi nu giphapha?’—Matayo 14:27-31.

Phetelo nu Yesu anginyile mu wato, gungima funji yakola yahuile. Alandudi adihudile. Uvi akhalele naye diago ya gudihula ba? Nga akotelesele ndaga ya gushimana ya ‘isthinyi ya mapha’ yatshitshile Yesu matangua azonda gutuama, tangua adishile athu avula, nga adihudilego ha gumona Yesu muwenda holu dia meya nu muhenesa funji. Mu tangua diene, asendesele gumutumagela, azuelele egi: ‘Giamatshidia, aye udi diago Mun’a Nzambi.’—Mako 6:52; Matayo 14:33.

Gungima dienji, Yesu nu apostolo enji ayile gu Genesaleta, fundo dimoshi diawaha, gu sudi ya Kaphelenauma. Ambile ngowa mu kiawu hagula wato umagane, gungima azogele. Tangua athu amonele Yesu, amujiyile. Enya gifutshi giene khungi nu enya membo ako, amubatele athu akhalele nu misongo. Tangua enya misongo akhalele mukuata songi ya mulele wa Yesu, akhalele musagewa mu tangua diene.

Athu agasue amonele luholo Yesu wadishile athu avula mu luholo lua gushimana, ajile mujiya gungima egi muene wayi gale genji. Hene, tangua mawato azonda akatugile gu Tibeliade ahetele, athu ene anginyine mukatshi, ayile gu dimbo dia Kaphelenauma ha gukamba Yesu. Tangua ahetele guene, ahudile Yesu egi: ‘Mulongeshi, kumbi ditshi wahetshi gugu?’ (Yone 6:25) Mbatuza mumona gishina Yesu waawambele.