Yesu Walongesele mu Galile Gagasue

Yesu nu alandudi enji nguana akadigile mudimo wavula lusugu lua mudidi gu Kaphelenauma. Mu ngueze, enya gu Kaphelenauma amubatele akhashi ha gula a asage. Yesu gakhalelego diago nu tangua diavula dia guhuluguga.

Mu gimenegena gia lusugu lua landudile, phipha khenji ihua gale ndo, Yesu wazugile, wayile hakhenji hanze. Wayile ha fundo gajiya gukhala muene ha khenji ha gukombelela sh’enji. Uvi tangua diazonda gungima, alandudi enji amulanduile. Tangua amonele egi Yesu gashigo, “Simona nu ako akhalele nenji” ayile nu gumukamba. Yajiya gukhala egi Phetelo wakhalele gutuama dia athu ene handaga Yesu wakhalele gumbo dienji.—Mako 1:36; Luka 4:38.

Tangua amonele Yesu, Phetelo wamuwambelele egi: “Athu agasue adi gugukamba.” (Mako 1:37) Yadiago, enya gu Kaphelenauma akhalele mutshigina egi Yesu asale mu dimbo diawo. Akhalele diago musuanguluga nu ndaga jiakhalele mutshita muene, hene ‘atshiginyile gumukuata hagula muene gayigo.’ (Luka 4:42) Uvi, Yesu wajile ha mavu phamba mukunda nu gusaga athu mu luholo lua gushimana ba? Luko, wakhalele naye gukalagala midimo yenji phamba mu dimbo edi ba? Itshi gazuelele muene mukunda nu ndaga eyi?

Yesu wawambelele alandudi enji egi: ‘Tuyenu getu mu membo ako adi hehi hagula ngulongese nji mbimbi ya Nzambi guene, handaga ame ngajile mukunda nu ndaga eyi.’ Gungima Yesu wadijigile athu akhalele mukamba egi ayigo egi: ‘Ngudi naye gulongesa lukuma luabonga lua Ufumu wa Nzambi mu membo ako, handaga Nzambi wangutumine mukunda nu ndaga eyi.’—Mako 1:38; Luka 4:43.

Yadiago, gishina giakoma giajidile Yesu ha mavu gidi gulongesa lukuma lua Ufumu wa Nzambi. Ufumu wene mbawutumbuisa jina dia Sh’enji, luko mbawumanesa malamba a athu mayilago. Yesu wamonesele diago egi watumiwe gudi Nzambi luholo wakhalele musaga athu mu luholo lua gushimana. Luholo lumoshi, ivo yavula gutuama, Moise wakadikile ndaga jia gushimana ha gumonesa diago egi watumiwe gudi Nzambi.—Guzoga 4:1-9, 30, 31.

Gungima, Yesu wakatugile gu Kaphelenauma ha guya mulongesa mu membo ako, alandudi enji nguana ayile nenji. Alandudi ene nguana akhalele Phetelo nu phangi’enji Andre, Yone nu phangi’enji Yakoba. Phoso imoshi yabalega gale sendese Yesu waatamegele ha gubua mafuta enji a thomo a guwenda nenji ha gukalagala mudimo.

Mudimo wa Yesu nu alandudi enji nguana wa guwenda nu gulongesa mu Galile gagasue, wazolele diago mbuto yabonga! Luko, lukuma lua Yesu lua muangenene muavula. “Lukuma luenji luamuangunugine mu khanda jiagasue jia mavu a Siliya,” mu membo kumi ana gutamegewa egi Dekapoli, nu mu membo ako a ha sambua dia Muta wa Yordani. (Matayo 4:24, 25) Athu avula a mu membo ene nu a mu Yudea, alanduile Yesu nu alandudi enji. Avula akhalele gumubatela athu akhalele nu funu ya usagi. Yesu wataganesele nzala jiawo: wasagele enya misongo, enji wakayele nyuma jiabola gudi athu akhalele nu bademo.