Yesu Udi Mulongesa Lukuma lua Ufumu

Masugu azonda gungima dia gubatijiwa guenji, Yesu wasendesele gulongesa egi: ‘Ufumu wa Nzambi wasuena hehi.’ Wakhalele muya gu Galileya yagasue nu gu Yudea; alandudi enji akhalele muya n’enji. Tangua Yesu wavutugile mu dimbo diawo gu Nazaleta, wanginyile mu sinagoga, wakangudile rulo ya Yeshaya, wasendesele gutanga mu dijui diakola egi: ‘Yehowa wanguhanyi nyuma yenji ha gulongesa athu lukuma luabonga.’ Yakhalele mukotelesa itshi? Ikhale athu akhalele mutshigina egi Yesu akalagale ndaga jia gushimana, uvi Yehowa wamuhanele nyuma yenji ha gulongesa thomo lukuma luabonga. Gungima wawambelele athu akhalele gumutegelela egi: ‘Mangino profesi yiyi yatagenesewa.’

Yesu wayile gu Kianga gia Galileya, wasangele athu nguana anyi abuile alandudi enji gungima; akhalele mulowa jishui. Waawambelele egi: ‘Izenu mungulandule, mbangumibuisa alowi a athu.’ Majina a athu ene akhalele: Phetelo, Andele, Yakoba nu Yone. Abembele mbala imoshi mudimo wawo wa gulowa jishui, amulanduile. Awendele gu Galileya yagasue, alongesele lukuma luabonga luatadila Ufumu wa Yehowa. Akhalele mulongesa mu basinagago, ha mazando nu mu njila jiakoma. Athu avula akhalele gualandula fundo diagasue akhalele muya. Lukuma luatadila Yesu luamuanganele mafundo agasue uu nu gu Siliya.

Gungima Yesu wahanele alandudi enji ngolo jia gusaga athu nu guzola bademo. Alandudi ako akhalele muya n’enji tangua diakhalele muene mulongesa mu membo akoma nu azonda. Guakhalele nji nu akhetu akhalele nu gutshigina gudi Nzambi, anyi akhalele mukuatesa Yesu nu alandudi enji. Akhetu ene akhalele: Madiya wa Gumagadala, Yoana, Suzana, nu akhetu ako.

Yesu wahanele alandudi enji formasio, gungima waatumine ha guya mulongesa. Ayile mulongesa gu Galileya yagasue, athu avula abuile alandudi nu abatijiwe. Athu avula akhalele mutshigina gubua alandudi, gishina giene Yesu waafuanesele nu mbuto jidi hehi ha gukatudiwa mu dihia. Wazuelele egi: ‘Togenu Yehowa ha gutuma enya mudimo avula ha gukatula mbuto.’ Gungima watombele alandudi 70, waatumile mbadi-mbadi ha guya mulongesa gu Yudea yagasue. Alongesele athu a maluholo agasue ndaga jiatadila Ufumu wa Nzambi. Tangua alandudi avutugile, akhalele nu gusuanguluga ha guwambela Yesu ndaga akalegele. Guakhalelego nga nu gima gimoshi Diabulu wajiya gutshita ha gukanga mudimo wa gulongesa.

Gutuama egi Yesu avutuge mu dilu, watshitshile yagasue hagula alandudi enji alandule gutshita mudimo wene wa ndando. Waawambelele egi: ‘Longesenu lukuma luabonga ha mavu agasue. Longesenu athu mbimbi ya Nzambi, abatizenu.’