Mihu Yana Guhula Athu ana Gutanga Mikanda Yetu
Gui guakhalele alandudi 70 anyi Yesu wakatugile gutuma mu mudimo wa gulongesa, tangua diadile muene Gudia gua Fumu gua mu Ngueze nu apostolo? Amutunyile genji ba?
Tuajiyilego gutangiza egi luholo alandudi 70 akhalelego hene tangua Yesu wakalegele Gudia gua Fumu gua mu Ngueze idi mukotelesa egi Yesu gakhalelego guatshigina nga ndo ene nji amutunyile. Yesu wakhalele mutshigina guyikalagala phamba nu apostolo.
Wakhalele guatshigina mukut’awo agasue ikhale apostolo 12 nga alandudi ako 70. Thomo Yesu watombele mala 12 mukatshi dia alandudi ene, waatamegele egi apostolo. (Luka 6:12-16) Tangua Yesu wakhalele gu Galilea, “watamegele apostolo enji 12, waatumile ha gulongesa Ufumu wa Nzambi nu gusaga athu.” (Luka 9:1-6) Gungima, wayile gu Yudea “watombele alandudi ako 70, waatumine muyadi-muyadi.” (Luka 9:51; 10:1) Hene, Yesu wakhalele nu alandudi avula mu mafundo a gudisha akhalele mulongesa mu jina dienji.
Enya Yuda abuile alandudi a Yesu alanduile gukalagala Wano wa Pake givo nu givo, yajiya gukhala egi akhalele guyitshita nu enya fami jiawo. (Guz. 12:6-11, 17-20) Yesu nu apotolo enji ayile gu Yelusalema tangua gufua guenji guasuenele hehi. Uvi gatamegelego alandudi enji agasue akhalele gu Yudea, gu Galilea nu gu Pérée ha guza mutshita nawo Wano wa Pake. Idi naye gukhala egi Yesu wakhalele mutshigina egi mu okazio wene akhale phamba nu apotolo enji 12. Waawambelele egi: “Ngasuanguluga muavula gudia n’enu hamoshi Wano owu wa Pake, gutuama egi ngumone malamba.”—Luka 22:15.
Guakhalele nu ndaga jiabonga jiatumile Yesu ha gutomba phamba apostolo enji 12. Yesu wakhalele hehi ha gufua gifua “Mun’a Gimeme wa Nzambi udi mukatula gubola gua athu ha mavu.” (Yone 1:29) Wakhalele naye gufua gu Yelusalema fundo athu akhalele muhana Nzambi milambu sendese mualeha. Wano wa Pake wakhalele muwunguluisa enya Isalele egi Yehowa waakatudile mu uhiga gu Ejipitu, uvi mulambu wa Yesu wakhalele nu ndando yavula gubalega Wano wene, handaga mulambu wenji wakhalele naye gukatula athu agasue a ha mavu mu uhiga wa gubola nu wa gufua. (1 Kol. 5:7, 8) Ndaga yatshitshile Yesu yakhalele naye guhana apostolo 12 njila ya gubua fondasio ya hungu dia Uklisto. (Ef. 2:20-22) Ndaga ya gusuanguluga idi egi, dimbo dia Yelusalema ya gijila diana khala nu “maseso 12 a fondasio,” holu dia maseso ene hana khala ha gusonega “majina 12 a apostolo 12 a Mun’a Gimeme.” (Gumo. 21:10-14) Idi yadiago egi apostolo ene 12 akhalele naye guheta mudimo wa ndando wa gukalagala mu gutagenesewa gua gutshigina gua Nzambi. Gishina giene Yesu watshiginyile egi apostolo enji akhale gu Wano wene wa gisugishilo nu ndaga yalanduile yakotelesa egi Gudia gua Fumu gua mu Ngueze.
Alandudi 70 nu alandudi ako akhalelego gu Wano wene. Uvi alandudi agasue akhalele yagujinginyina akhalele naye guheta gubonga gua Gudia gua Fumu gua mu Ngueze. Aklisto agasue akhalele mumbiwa maji mu nyuma gungima, akhalele mungina mu gikotelo mukunda nu ufumu ginyi Yesu wazuelele mu phipha yene.—Luka 22:29, 30.