Gudia gua Fumu gua mu Ngueze

Enya Yuda akhalele mutshita wano wa Pake givo nu givo mu lusugu lua 14 lua mbeji ya Nisana. Wano wene wakhalele guawunguluisa luholo Yehowa waazolele mu uhiga gu Ejipitu nu waabatele mu Mavu a Gutendelela. Mu givo 33 G.Y., Yesu nu apostolo enji akalegele wano wa Pake mu sugu imoshi ya gosa gu Yelusalema. Tangua amanesele gudia, Yesu wazuelele egi: ‘Muthu mumoshi mukatshi dienu umuza gungudiga.’ Ndaga yene yasagesele apostolo, ahudile Yesu egi: ‘Nanyi muene?’ Yesu wazuelele: ‘Idi muthu munu nguza muhana dipha edi.’ Gungima wahanele Yudasa Isakaliote gitshinyi gia dipha. Yudasa wazogele mbala imoshi gu sugu yene, wayile.

Gungima Yesu watshitshile gisambu, wabatuile dipha itshinyi-itshinyi, wahanele apostolo anyi asalele. Wazuelele egi: ‘Dienu dipha edi. Didi mumonesa muila wami mbanguhana mukunda nu enue.’ Gungima wakalegele luko gisambu, wazudile ndambo ya vinyo wahanele apostolo enji. Wazuelele egi: ‘Nuenu vinyo eyi. Idi mumonesa mahatshi ami mbanguhana hagula gubola guenu gutotesewe. Ngudi gumilaya egi mbamuhinyina nu ame mu dilu. Khalenu mutshita ngegi givo nu givo ha gunguhuluga.’ Alandudi a Yesu ana gudibungisa givo nu givo mu ngueze ha gumuwunguluga. Gudibungisa guene guana tamegewa egi Gudia gua Fumu gua mu Ngueze.

Tangua amanesele gudia, apostolo asendesele gumana ha gujiya gula nanyi udi nu ndando yavula mukatshi diawo. Uvi Yesu waawambelele egi: ‘Muthu udi mutshigina gukhala nu ndando yavula mukatshi dienu, udi naye gukhala gifua mona wazonda.

‘Mudi mafut’ami. Ngamiwambelele ndaga jiagasue Tata watshiginyile egi ngumiwambele. Gualeha ndo ngudi muya gosa mu dilu gudi Tata. Tangua mbamusala, athu mbaajiya egi mudi alandudi ami gula mudi gudimonesele guzumba mukatshi dienu. Mudi naye gudimonesela guzumba mukatshi dienu gifua luholo ngamizumbile.’

Gu gisugishilo Yesu watshitshile gisambu, watogele Yehowa ha gubamba alandudi enji agasue. Watogele nji Yehowa ha guakuatesa ha gukhala hamoshi mu guhuima. Watogele nji hagula jina dia Yehowa dikhale dia gijila. Gungima Yesu nu apostolo enji ayimbile ngimbo ha gutumbuisa Yehowa, azogele ayile hanze. Tangua diataganele hagula Yesu akuatewe.