Yesu Wavutuga mu Dilu

Yesu wadibungishile nu alandudi enji gu Galilea. Waahanele mukhuala owu wabalega ndando egi: ‘Ndenu gudi athu a ifutshi yagasue, muaabuise alandudi. Mualongese ndaga ngamiwambelele, muabatize.’ Gungima waalayele egi: ‘Jiyenu egi, mbangulandula gukhala n’enu.’

Tangua Yesu wafuzumugile, wamonegele gudi alandudi enji avula gu Galilea nu gu Yelusalema mu masugu 40. Waalongesele malongo a ndando nu wakalegele ndaga jiavula jia gushimana. Gungima Yesu wadimonele nu alandudi enji mbala yasuga gu Mulundu wa Mitshi ya Olive. Waawambelele egi: ‘Mukatugago gu Yelusalema, uvi landulenu gunengena ndaga yamilayele Tata.’

Apostolo enji akhalelego mukotelesa ndaga jiaawambelele muene. Hene amuhudile egi: ‘Udi mubua Fumu wa Isalele mu tangua edi ba?’ Yesu waavutudile egi: ‘Tangua diatombele Yehowa hagula ngubue Fumu khenji ditagana ndo.’ Waawambelele luko egi: ‘Gualeha ndo mbamuheta ngolo tangua nyuma ya Nzambi mbayimijila, enue mbamukhala matemue ami. Ndenu mulongese gu Yelusalema nu gu Yudea nu gu Samaliya, uu nu mu mafundo a gualeha a ha mavu.’

Gungima Yesu wakandugile mu dilu, matuta amutshuigile, watotele. Uvi alandudi akhalele mutala gosa.

Alandudi akatugile gu Mulundu wa Mitshi ya Olive ayile gu Yelusalema. Akhalele gudibungisa mbala jiavula mu sugu ya gosa ha gukombelela. Akhalele munengena Yesu hagula a ahane malongo ako.