Alandudi Aheta Nyuma ya Nzambi

Havutugile Yesu mu dilu, gungima dia masugu 10 alandudi enji ahetele nyuma ya Nzambi. Yakhalele mu Pantekote ya givo 33 G.Y., Athu akatugile mu mafundo avula ajile gu Yelusalema mukunda nu wano. Alandudi a Yesu 120 adibungishile gu sugu ya gosa. Gungima ndaga imoshi ya gushimana yakalegewe. Gima gimoshi giakhalele mulema gifua madimi a tshuya giakhalele mumonega holu dia muto wa mulandudi wagasue. Gungima asendesele guzuela mu mazuelela agudisha. Matululu anyi akhalele gifua matululu afunji yakola azalele mu inzo yene.

Enya ifutshi iko anyi ajile gu Yelusalema, avile nji matululu ene. Hene ayile phushi mu inzo ha gutala gula ndaga tshi yabua. Adihudile muavula luholo avile alandudi muzuela mu mazuelelo a gudisha. Azuelele egi: ‘Athu awa adi enya gu Galileya, luholo lutshi adi muzuela mu mazuelelo etu?’

Gungima Phetelo nu apostolo ako amagenele gutuama dia thundu yene. Phetelo wawambelele athu luholo Yesu washiyiwe nu luholo Yehowa wamufuzumuine. Wazuelele egi: ‘Henyaha Yesu udi mu dilu gu koko dia madia dia Nzambi nu watumuangela nyuma ya Nzambi luholo gatulayele. Gifua luholo mudi guyimona nu mudi muvua ndaga eji jia gushimana.’

Athu asuangulugile nu mbimbi jiazuelela Phetelo, amuhudile egi: “Itshi tudi naye gutshita?” Waawambelele egi: ‘Balumunenu mitshima mu gubola guenu, muthu wagasue mukatshi dienu abatijiwe mu jina dia Yesu.’ Mu lusugu luene athu hehi nu 3 000 abatijiwe. Sendese mu lusugu luene, aladudi asendesele gudivudisa muavula gu Yelusalema. Nyuma ya Nzambi yakuatesele apostolo ha guzola mahungu avula nu ha gulongesa alandudi ndaga jiagasue jiaawambelele Yesu.