Korneye Waheta Nyuma ya Nzambi

Guakhalele nu fumu mumoshi wa masuta a enya Roma gu Sezaleya, jina dienji Korneye; wakhalele muthu wa ndando diago. Fumu muene gakhalelego muenya Yuda, uvi enya Yuda akhalele gumunemesa. Wakhalele mukuatesa phutu nu athu ako akhalele nu funu ya ukuateshi. Korneye wakhalele musha gutshigina gudi Yehowa, wakhalele nji mulandula gumukombelela. Lusugu lumoshi, muanjelo wamonegele gudi Korneye, wamuwambelele egi: ‘Nzambi wategelela isambu yaye. Tuma muthu mumoshi mu dimbo dia Yopha, fundo diana khala Phetelo, amutamege aze gudi aye.’ Korneye watumile mbala imoshi athu thathu gu Yopha. Yopha yakhalele mu bakilometre hehi nu 50 gu khanda ya sud.

Mu tangua diene Phetelo wamonele vizio gu Yopha. Wamonele shitu jinyi enya Yuda akhelelego mudia, wavile dijui dimoshi gumuwambela ha gudia shitu jiene. Phetelo watunyile, wazuelele egi: ‘Khenji ngadile galego shitu jia usala mu monyo wami.’ Dijui diene diamuwambelele egi: ‘Utamegago shitu eji egi jidi jia usala. Nzambi wajibuisa jiaphelegeta.’ Dijui diene diawambelele luko Phetelo egi: ‘Mala thathu adi ha mufulo wa inzo yaye. Nda nawo.’ Phetelo wazogele ha mufulo, wahudile mala ene ndaga ajila. Azuelele egi: ‘Korneye fumu wa masuta a enya Roma watutumi. Tudi naye guya nu aye gumbo dienji gu Sezaleya.’ Phetelo wawambelele athu ene ha gubanda gumbo dienji. Mu lusugu lualanduile wayile nawo gu Sezaleya, wakhalele nu aphangi ako a gu Yopha.

Tangua Korneye wamonele Phetelo, wafugamele. Uvi Phetelo wazuelele egi: ‘Zuga! Ngudi muthu gifua aye. Nzambi wanguwambela ha guza gumbo diaye, ikhale esue enya Yuda tuana ngina ndo mu jinzo jia enya ifutshi. Henyaha, ngabuba nguwambele mukunda natshi udi gungukamba.’

Korneye wawambele Phetelo egi: ‘Masugu nguana abalega gale, ngakhalele musamba Nzambi, muanjelo wanguwambelele egi ngutume athu agutamege. Ngabuba, tulongese mbimbi ya Yehowa.’ Phetelo wazuelele egi: ‘Ngakotelesa egi Nzambi gana tomba-tomba ndo. Wana tshigina muthu wagasue udi mutshigina gumukombelela.’ Phetelo waalongesele ndaga jiavula jiatadila Yesu. Gungima Nzambi wahanele nyuma yenji gudi Korneye nu athu agasue akhalele gumbo dienji, mukut’awo agasue abatijiwe.