Malongo a Aklisto Amuangana mu Ifutshi Yavula

Apostolo atumagele mukhuala wa Yesu wa gulongesa lukuma luabonga ha mavu agasue. Mu givo 47 G.Y., aphangi a gu Atiokia atumile Phaula nu Barnabase ha guya mulongesa. Alongeshi awa mbadi a gikhesa ayile gu Azi Minere (mangino yana tamegewa egi Turquie) nu gu Delebe nu gu Listre nu gu Ikoniume.

Phaula nu Barnabase akhalele mulongesa athu agasue, ikhale enya umonyi nga phutu, mavuala nga athu agukola. Athu avula atshiginyile giamatshidia giatadila Klisto. Tangua Phaula nu Barnabase alongesele guvernere Sergio Phaula gu Shiphele, nganga imoshi yakambele guakanga njila. Phaula wawambelele nganga yene egi: ‘Yehowa udi guguluisa.’Mu tangua diene nganga yene yabuile gifofo. Tangua Guvernere wamonele ndaga yene, wabuile mulandudi.

Phaula nu Barbanase akhalele mulongesa mafundo agasue. Akhalele mulongesa inzo nu inzo, mu mazando, mu njila nu mu basinagoga. Lusugu lumoshi, asagele yala mumoshi wakhalele gikata, athu atangijile egi akhalele jinzambi, atshiginyile guakombelela. Uvi Phaula nu Barnabase a atunyishile, azuelele egi: ‘Kombelelenu phamba Nzambi! Esue tudi athu.’ Gungima enya Yuda ajile, ashinjigile athu ha guluisa Phaula. Amuwasele maseso, amuzolele hanze ya dimbo, amubembele zegege. Uvi Phaula gafilego! Aphangi ajile gumuzula, ayile n’enji mu dimbo. Gungima Phaula wavutugile gu Antiokia.

Mu givo 49 G.Y., Phaula wayile mu vuayaje iko. Wayile mutala luko aphangi gu Azi Minere, gungima wayile uu nu gu Europe. Wayile gu Atene, Efeso, Filiphi, Tesalonike nu mu mafundo ako. Wakhalele nu Silase nu Luka nu muvuala mumoshi wa yala jina dienji Timote. Atshitshile mudimo hamoshi ha gukangula mahungu nu ha gukuatesa mahungu ene ha gukhala tenyi. Phaula watshitshile givo gimoshi nu ndambo gu Kolinto, ha guhana aphangi gikhesa. Wakhalele mulongesa lukuma luabonga, gutshita ba diskur nu gusonegela mahungu avula mikanda. Wakhalele nji mutshita mudimo wa gulonda matenta. Mu tangua dimoshi ngenyi, Phaula wavutugile luko gu Antiokia.

Gungima mu givo 52 G.Y., Phaula watshitshile vuayaje ya thathu. Wasendesele vuayaje yene gu Azi Minere, wayile gu khanda ya nord ya Filiphi, gungima wabulumugile gu Kolinto. Phaula wabalegesele ivo yavula gu Efeso, wakhalele mulongesa, musaga athu nu gukuatesa aphangi mu hungu. Wakhalele nji mutshita ba diskur lusugu nu lusugu mu khalasa dia Tilanuse. Athu avula akhalele gumutegelela nu gusombegesa makalegelo awo. Gungima dia gulongesa lukuma luabonga mu ifutshi yavula, Phaula wavutugile gu Yelusalema.