Ndola jia Nzambi​—Gutuama dia Guhana Athu Ndola, Nzambi Wana Guaatemesa Thomo Ba?

MUTHU mumoshi wana gulonguga muhehe nu matuta (météorologue), udi mutala gifuanesa gia radar idi mubalumuga. Wamona gikudi gimoshi giakola gidi muza muphushi ha fundo didi nu athu avula. Luholo muthu muene ana guzumba athu, watshita yagasue ha guaatemesa gutuama egi gikudi giene gize.

Luholo lumoshi nji, Yehowa udi mutemesa athu a ha mavu agasue mukunda nu ndaga imoshi idi gifua “gikudi” giakola gidi athu khenji amuenene galego. Luholo lutshi gadi mutemesa athu mangino? Mukunda natshi tuajiya guzuela egi Yehowa udi muhana athu tangua dia gudilondega? Gutuama dia guhana mvutu gu mihu eyi, tutadilenu gale luholo Yehowa atemesele athu mu ginono.

NZAMBI WATEMESELE ATHU MU TANGUA DIKULU

Mu tangua dikulu, Yehowa watemesele athu mukunda nu ndaga jiakhalele gifua “ikudi” yavula. Yakotelesa egi, gushiyiwa gua athu akhalele mushiya mikhuala yenji nu mutshima wagasue. (Ish. 10:25; Yel. 30:23) Mu ndaga yagasue, wakhalele muwambela athu gutuama ndaga adi naye gutshita ha guhuluishiwa. Wakhalele guaabembela tangua diatagana. (2 Maf. 17:12-15; Neh. 9:29, 30) Ha guaakuatesa diago, wakhalele guaatumina akombeledi enji ha mavu ha guaawambela matangi enji, nu ha guaakuatesa ha gutshita ndaga mu phushi.—Am. 3:7.

Nowa udi mukatshi dia athu atumiwe gudi Nzambi ha gutemesa athu. Ivo yavula, Nowa wakhalele muwambela athu akhalele mutshita ndaga jia musonyi nu jia khuta ha gusombegesa makalegelo awo. Waatemesele egi gualeha ndo, mvula mbayinoga ha mavu agasue. (Gis. 6:9-13, 17) Nowa waalezele luko ndaga adi naye gutshita ha guhuluishiwa gu mvula yene. Mupostolo Phetelo wazuelele egi, Nowa wakhalele “mulongeshi wa nduedi.”—2 Phet. 2:5, NWT.

Ngatshima Nowa watshitshile ngolo ha guaalongesa, athu ene atunyile gawo mbimbi ya Nzambi. Amonesele diago egi akhalelego nu gutshigina. Hene, mvula yajile, ‘yaakuluile agasue,’ afile. (Mat. 24:39; Heb. 11:7) Tangua gufua guawo guasuenene hehi, akhalelego nu ishina ya guzuela egi Nzambi gaatemeselego.

Matangua ako, Yehowa watemesele athu ako tangua diazonda gutuama egi “gikudi” gia ndola yenji gisendese. Ikhale ngenyi, wakhelele mutshita yagasue hagula athu ene ahete tangua dia gusombegesa makalegelo awo. Tufezegese gale. Gutuama egi Yehowa ahane enya Egypte malamba kumi, wakhalele thomo guaatemesa gu lamba diagasue. Tuzuelele gale lamba dia sambadi diabuidile enya Egypte. Yehowa watumine Moize nu Alona ha gutemesa Pharaon nu athu enji egi, may’a nzanza avula mbaanoga mu dimbo diagasue. Luholo may’a nzanza ene akhalele naye gunoga hamene, tuajiya guzuela egi Nzambi waahanele tangua diatagana dia gukamba fundo dia gulengela ba? Biblia idi muzuela egi: ‘Tuphungu tuko tua Pharaon tuavuidile mbimbi ya Nzambi woma. Tuanginyishile ahig’awo nu shitu jiawo monzo. Uvi tuphungu tuko tuavuilego mbimbi ya Nzambi gifua gima, tuabembele ahig’ato nu shitu jiato hanze.’ (Guz. 9:18-21) Yadiago, Yehowa waahanele tangua diatagana. Athu anyi atumagele mu phushi, amonelego gawo lamba edi dia sambadi.

Yehowa watemesele luko Pharaon nu athu enji gutuama egi lamba dia kumi diaabuile. Uvi, atunyile gawo gutumagela Yehowa. (Guz. 4:22, 23) Hene, an’awo a somi afuile. Yakhalele lamba diago! (Guz. 11:4-10; 12:29) Akhalele nu tangua dia gudilondega mukunda nu lamba diene ba? Ayi! Moize wawambelele enya Isalele giphungu gimoshi egi lamba dia kumi diakhalele mutshigina gubua mu dimbo. Waalezele nji ndaga akhalele naye gutshita ha guhuluisa fami jiawo. (Guz. 12:21-28) Athu guvula gutshi atumagele ndaga jiazuelele Moize? Mikanda iko yana guzuela egi, athu 3 milio nga nu holu. Mukatshi diawo, guakhalele nji nu “thundu yakoma” ya enya Egypte nu athu ako akhalelego enya Isalele. Ahuluishiwe, azogele mu Egypte.—Guz. 12:38.

Gifua muayimonesa ifezegeselo eyi, tangua diagasue Yehowa wana guwambela athu gutuama hagula ajiya gusombegesa makalegelo awo. Wana guaabembela nji tangua diavula. (Mikh. 32:4) Itshi yana gutuma Nzambi ha gutshita ngenyi? Mupostolo Phetelo wazuelele egi, Yehowa ‘gashigo mutshigina egi nga muthu mumoshi atote. Uvi udi mutshigina egi athu agasue abalumune mitshima yawo.’ (2 Phet. 3:9) Yadiago, Nzambi wadisagesele mukunda nu athu. Watshiginyile egi abalumune mitshima yawo, asombegese khadilo diawo gutuama egi malamba a abuile.—Yesh. 48:17, 18; Lomo 2:4.

TUMAGELA UTEMESHI WA NZAMBI MANGINO

Mangino nji, athu agasue adi naye gutumagela utemeshi wa ndando udi muhanewa ha mavu agasue. Hakhalele Yesu ha mavu, wazuelele egi mavu awa mbaashiyiwa mu tangua dia “lamba diakola.” (Mat. 24:21) Mukunda nu ndaga yene, Yesu watuhanele profesi imoshi idi nu ndaga jiavula. Profesi yene yazuelele egi, alandudi enji mbaamona milonga yavula gutuama egi lamba diakola dize. Yesu watangele milonga yakoma idi mukalegewa ha mavu agasue mangino.—Mat. 24:3-12; Luka 21:10-13.

Mu gudivua nu profesi yene, Yehowa udi mutoga muthu wagasue ha gumukombelela nu gutumagela ufumu wenji. Wana gutshigina egi athu ana gumutumagela akhale nu monyo wabonga mangino; mu masugu adi muza, mbaaheta gubonga mu mavu ahe-ahe. (2 Phet. 3:13) Ha gukuatesa athu ha gusha gutshigina mu ndaga galayile, wana guaawambela mbimbi mbajiaahuluisa. Mbimbi jiene jidi “lukuma luabonga lua Ufumu.” Yesu wazuelele egi, lukuma luene “mbalulongesewa ha mavu agasue gifua ulondolodi gudi ifutshi yagasue.” (Mat. 24:14) Nzambi wana gukuatesa akombeledi enji ha gulongesa mbimbi yenji, gifua “ulondolodi” mu ifutshi 240. Yehowa udi mutshigina egi athu avula diago atumagele ndaga adi gutuwambela hagula ahuluishiwe gu “gikudi” mbagiza, yakotelesa egi gushiyiwa gua athu abola.—Sef. 1:14, 15; 2:2, 3.

Henyaha, muhu wakoma ushigo wa gujiya gula Yehowa udi muhana athu tangua diatagana dia gutumagela ndaga adi muzuela. Gifua luholo tuayimona, sendese mualeha, Yehowa wana guhana athu tangua. Uvi muhu wa ndando udi egi: Athu mbaatumagela utemeshi wa Nzambi hagidi gale tangua ba? Tudi atumiwi a Nzambi. Hene, tulandulenu gukuatesa athu avula diago hagula ahuluishiwe mu tangua mavu awa mbaashiyiwa.