Tukudise Luholo Luetu lua Gulongesa Mbimbi ya Nzambi—Tukuatese athu tuana gulongesa Biblia akudise khadilo diabonga dia gutanga

Idi nu ndando itshi: Ha gukula mu nyuma, athu tuana gulongesa Biblia adi naye gudisa matangi nu mitshima yawo malongo akola a mbimbi ya Nzambi, asugiko phamba mu malongo aleba ndo. (Heb. 5:12–6:1) Gulonguga guana gulomba ngolo. Guana gulomba luko gutadila malongo ahe-ahe nu malongo tuajiyile gale nu gujiya luholo lua guakalegela. (Ish. 2:1-6) Gila athu tuana gulongesa Biblia adi gutanga mikanda yetu ha gukamba malongo, mba ajiya luholo lua gukadigila mikanda yene ha guhana mvutu gu mihu ya Biblia. Gila akalagala ngolo ha gukadigila ndaga adi gulonguga mba aheta ngolo jia gulua nu malamba mba amona mu monyo wawo wa aklisto.—Luka 6:47, 48.

Luholo lua guyikalagala:

Monesa lume ndando ya gukamba ukuateshi wa Yehowa mu gisambu tangua diagasue dia gulonguga.—Yone 14:26; 1 Kol. 2:10.
Sendesa gu gisendeselo, kolesa muthu wana gulongesa akhale thomo gulondega mukanda gutuama dia gulonguga. Muleze mukanda waye, nu luholo lua gumba mifundunda gu mvutu mu mukanda wenji.
Kalagala egi ulongugi wenu ubuiko gifua tangua dia guhula mihu hagula mulongugi atange mvutu phamba mu mukanda wenji. Kuatesa muthu wana gulongesa ahane mvutu mu mbimbi jienji.
Wambela muthu wana gulongesa akhale gutanga Biblia masugu agasue. Muleze programe ya utangi wa Biblia mu site Internet yetu jw.org, handaga programe yene idi nu mulongo wabonga wajiya gumukuatesa ha gutanga Biblia. Gukolesa khadilo dia gutanga Biblia masugu agasue guana gutoga gudindamana, uvi mba gumubatela gusuanguluga guavula.—Ngi. 1:2, 3.
Legeza muthu wana gulongesa luholo lua gutanga mikanda yetu mu njila ya Internet nga Watchtower Library ha guheta mvutu gu mihu ya Biblia. Mukuatese ajiye abréviation a mikanda tuana gukalegela muavula tangua tuana gudibungisa mu hungu.

Milonga ya Gukalagala mu Mbeji eyi:

Gila muasugisa gulonguga mukhapho nga gitshinyi gimoshi gia mukhapho, hula muthu wana gulongesa Biblia azuelele mu mbimbi jiazonda ndaga mualonguga. Gila ushiko nu muthu wagulongesa Biblia, zuelela mu mbimbi jiazonda verse imoshi ya Biblia nga paragrafe imoshi ya Tour de Garde, ha gukudisa luholo luaye lua gutanga.