Mazui ambiwa mu site yetu jw.org—Luholo lua guakadigila
1. Holu dia mikanda yagusonegewa, gima gitshi giabonga tudi nagio luko?
1 Athu avula ana gusuanguluga gukalegela jw.org hagutanga malongo amatshidia. (Mulo. 12:10) Wana gutegelela mazui ambiwa mu site yene ba? Ana guhana njila ya guvua ndaga jiavula mu site Internet yetu. Luholo lutshi mazui ambiwa mu site yene ana gutukuatesa?
2. Luholo lutshi tuajiya gukalegela mazui ambiwa mu site yetu tangua tudi gulonguga hakhetu nga mu fami yetu?
2 Mu Gulonguga Guetu Hakhetu nga Gua mu Fami yetu: Gutegelela mazui a utangi wa Biblia, wa mazulunalu nga wa mikanda yetu iko, tangua tudi muwenda njila yaleha nga tudi gu mudimo lusugu nu lusugu yajiya gutukuatesa hagukalegela tangua dietu muabonga. (Ef. 5:15, 16) Tuajiya luko gusuanguluga nu gukombelela mu fami yetu, gila tuategelela mazui ambiwa mu site yetu tangua tudi gulandula utangi wene mu mikanda yetu. Gukalegela mazui ambiwa mu site yetu tangua tudi gulonguga hakhetu idi nu ndando yavula gila tuatshigina gukudisa gutanga guetu nga gila tudi mulonguga zuelelo dimoshi.
3. Mu terituare yenu akhuatshi ajiya gusuanguluga gutegelela mazui ambiwa mu site Internet yetu?
3 Mu Mudimo wa Gulongesa: Athu ako a mu terituare yetu anako guheta tangua dia gutanga, uvi ajiya gutshigina gutegelela mazui ambiwa mu site. Tuajiya gutagana nu athu ana guzuela mazuelelo ako, ajiya gutshigina Lukuma luabonga, gila aluvua mu “zuelelo diawo.” (Makal. 2:6-8) Mu mafundo ako, gutegelela guakhala nu ndando yavula mu khadilo dia athu. Tufezegese, enya zuelelo dia Hmong, mu mavu a Azia, ana guleza anawo lumene lua giphutha giawo mu mene ana guatela, anawo ana gukuata mene jiene muabonga. Mu iphuta yavula mu afraka, athu ana gulongesa anawo mu mene ana guatela.
4. Mihu itshi yatadila gukuatesa athu a muterituare yetu tuajiya gudihula?
4 Mu terituare yenu, guhagela athu mazui ambiwa mu site yetu mu zuelelo diawo gudi nu ndando ba? Gudi nu athu ana gusuanguluga nu malongo amikanda yetu ambiwa mu mazui tuana guatumina ba? Gudi luholo lua gumba mazui ene mu CD hagula egi tuhane athu, nga guhana CD jiene hamoshi nu mikanda yatangewa muene ba? Mazui agasue ambiwa mu site yetu, ikhale a mikanda, nga a tumikanda, nga a mazulunalu, nga a batrakte, gula tuayihana athu mu CD nga mu luholo luko mu mudimo wa gulongesa mbimbi ya Nzambi, tudi naye guyitanga mu rapor yetu mu suga ya mbeji. Tuana gukalegela mazui ambiwa mu site yetu ha gulonguga hakhetu nu ha gukuna mbuto jia matshidi jia Ufumu.—1 Kol. 3:6.