Luholo lua Gukalegela Gamukanda Tegelela Nzambi

Gamukanda Tegelela Nzambi gasonegewe ha gukuatesa athu adi nu lamba dia gutanga ha gula ajiye giamatshidia gia Biblia mu njila ya ifuanesa. Longo diagasue didi nu ifuanesa yalondewe muabonga mu luholo luajiya gukuatesa athu ha guyilonguga gimoshi-gimoshi.

Gamukanda Tegelela Nzambi nunji Jinga Ivuo nu Ivuo gadi nu ifuanesa luholo lumoshi nu gamukanda Tegelela Nzambi; uvi gene gashigo phamba nu ifuanesa, gadi nji nu ndaga jia gusonega. Ngenyi, tuajiya gugakalegela ha gulonguga nu athu ajiya gale gutanga. Matangua avula, alongeshi ana gugakalegela tangua athu adi mulonguga nawo adi mukalegela gamukanda Tegelela Nzambi. Mayiji avula adi nu galuanda gadi nu ndaga jiko mulongeshi wajiya gutalela nu muthu adi mulongesa gula wamona egi muthu muene wajiya gujikotelesa.

Wajiya guhana muthu gamukanda gaga tangua diagasue watshigina, nga ishigo wene mukanda tudi muhana athu mu mbeji yene. Tangua udi mulongesa muthu Biblia, kalegela ifuanesa ha gumukotelesela malongo a Biblia. Hula muthu udi mulongesa mihu ha gula adivue egi malongo ene adi gumutadila, nu hagula ujiye gula muthu muene udi mukotelesa muabonga. Tangenu verse jidi goshi’a diyiji diagasue, zuelelenu nji verse jiene. Gila muamanesela gulonguga gamukanda gaga, nginenu mu mukanda Qu’enseigne réellement la Bible? nga mukanda Itshi Biblia Yajiya Gutulongesa? hagula ukuatese muthu muene ha gukula uu nu tangua mbaabatijiwa.