MAKALEGELO A UKLISTO

Khala Watema Tangua Udi Mutomba Saga jia Gudikenesa

Mukunda natshi tudi naye gumonesa gutema tangua tudi mutomba saga jia gudikenesa? Handaga, tangua tuana gutomba video ya gutala, nga lungimbo lua gutegelela, nga site internet ya gungina, nga mukanda tudi naye gutanga, nga saga jia video, tuana gutomba ndaga jidi naye gusala mu matangi etu. Tujimbilago egi saga tudi mutomba, jiajiya gulondega nga gubolesa makalegelo etu. Ndaga ya gikenene idi egi mangino, saga jiavula jia gudikenesa jidi nu ndaga jiavula Yehowa wana gutuna. (Ngi 11:5; Gal 5:19-21) Gishina giene, Biblia yana gutuwambela egi tulandule gukamba ndaga jiana gusuanguluisa Yehowa.—Fili 4:8.

TALENU VIDEO IDI MUZUELA EGI LUHOLO LUTSHI TUAJIYA GUTOMBA SAGA JIA GUDIKENESA? GUNGIMA, HANENU MVUTU GU MIHU EYI:

Luholo lutshi saga jia gudikenesa jia enya Roma mu tangua dikulu, jidi luholo lumoshi nu saga jia gudikenesa jia mangino?
Luholo lutshi aphangi a mu hungu ajiya gukuatesa mavuala ha gumonesa gutema tangua adi mutomba saga jia gudikenesa?
Luholo lutshi mukanda wa Lomo 12:9 wajiya gutukuatesa ha gutomba saga jia gudikenesa?
Saga jitshi jiawaha jia gudikenesa jidi mu dimbo dienu?

KALAGALA NDAGA HA GUDIKENESA, NGA NDO TALA ATHU AKO TANGUA ADI GUDIKENESA

Mangino, saga jiavula jia gudikenesa jiana gutuma muthu ha gutala nga gutanga ndaga jidi mutshita athu ako, hafundo egi muthu muene atshite ndaga ha gudikenesa hakhenji. Tangua tuana gutala filme, televizio, nga gutanga mikanda, tuana gudikenesa phamba nu ndaga jidi mutshita athu ako; uvi esue hakhetu tuanago gutshita nga ndaga ha gudikenesa. Gudikenesa nu saga jidi mumonesa athu adi mutshita ndaga gushigo mulonga wabola ndo, uvi tuana gusuanguluga muavula gula esue hakhetu tuatshita ndaga ha gudikenesa. Hene, athu avula ana gusuanguluga gawo gushiga miziki nga gukalagala ifuanesa (dessein). Aphangi ako ana gusuanguluga guta ndundu (balo), nu gulenga phushi. Tangua tudi mutomba saga jia luholo luagasue ha gudikenesa, tudi naye gutshita “ndaga jiagasue ha gutumbuisa Nzambi.”—1Kol 10:31.