Referanse jia Mukanda wa Gukalegela mu Gudibungisa gua Lujingu nu Mudimo wa Uklisto
AOUT 5-11
UMONYI UDI MU MBIMBI YA NZAMBI | 2 TIMOTE 1-4
“Nyuma Yatuhuile Nzambi Ishigo Mutubuisa Enya Woma”
(2 Timote 1:7, NWT) Handaga nyuma yatuhuile Nzambi ishigo mutubuisa enya woma, uvi idi gutuzalesa nu ngolo, nu guzumba, nu gudikanda.
w09-F 15/5 diyiji 15 par. 9
Mavuala, Monesenu Haphelo egi Mudi Mukula mu Nyuma
9 Ha gukuatesa Timote, Phaula wamuwambelele egi: “Nyuma yatuhuile Nzambi ishigo mutubuisa enya woma, uvi idi gutuzalesa nu ngolo, nu guzumba, nu gudikanda.” (2 Tim. 1:7, NWT) “Gudikanda” gudi mukotelesa egi gutangigiza muabonga. Gudi mukotelesa nji gutadila ndaga gifua luholo jidi, ikhale jishigo luholo tuana gutshigina. Mavuala ako ashigo nu gutema, akhala enya woma, ana gukamba luholo lua gulenga ndaga jiana guasagesa. Hene, ana gubanda tulo tuavula, ana gubalegesa tangua ha gutala televizio, ana gunua makaya, ana gukuatewa matombe, nu ana guya tangua diagasue gu jifete nga gutshita uthambi. Uvi esue Aklisto, Biblia idi gutuwambela ha “gutuna khadilo dia gusegulula Nzambi, nu nzala jia ima ya ha mavu awa, nu ha gukhala nu matangi abonga, nduedi, nu gujinginyina gudi Nzambi ha mavu awa.”—Tito 2:12, NWT.
(2 Timote 1:8) Ngenyi uvuigo musonyi ha gulondolola ndaga ya Fumi’etu nga ndaga yami, ame muthu wenji muenya bologo. Uvi utshigine gumona lamba mukunda nu lukuma luabonga mu ngolo jidi Nzambi muguhua.
w03-F 1/3 diyiji 9 par. 7
‘Khala nu Ngolo!’
7 Phaula, wasonegele Timote egi: ‘Nyuma yatuhuile Nzambi ishigo mutubuisa enya woma, uvi idi gutuzalesa nu ngolo . . . Ngenyi uvuigo musonyi ha gulondolola ndaga ya Fumi’etu.’ (2 Timote 1:7, 8; Mako 8:38) Gungima dia gutanga mbimbi eji, dihule egi: ‘Ngana guvua musonyi mukunda nu gutshigina guami, nga ndo ngakhala muenya ngolo? Gu mudimo (nga gu khalasa), ngana guwambela athu egi ngudi Temue wa Yehowa, nga ndo ngana gudisuega mukatshi diawo? Ngana guvua musonyi gula athu amona egi ngudi wagudisha nawo, nga ndo ngana gusuanguluga nu khadilo diami handaga diana gungubuisa futa dia Yehowa?’ Gula muthu udi muvua woma ha gulongesa lukumu luabonga, nga ndo athu ako adi gumutangijila muabola mukunda nu ndaga jia gikombelelo gienji, tudi naye gumuleza ha gutangiza mbimbi Yehowa wawambelele Yoshua egi: ‘Khala nu ngolo.’ Tujimbilago egi gima giabalega ndando gishigo matangi a mafut’etu a mudimo nga a khalasa, uvi matangi a Yehowa nu a Yesu Klisto.—Galatiya 1:10.
Kamba Ndaga Jiko jia Ndando jia mu Nyuma
(2 Timote 2:3, 4, NWT) Luholo udi suta diabonga dia Klisto Yesu, tshigina ha gumona malamba. 4 Muthu udi mutshita mudimo wa gisuta gajiyilego gudifutula mu milonga ya mungenda, gula watshigina gusuanguluisa fumi’enji.
w17.07-F diyiji 10 par. 13
Tukambenu Umonyi wa Giamatshidia
13 Timote wakhalele nu gutshigina guakola. Mupostolo Phaula wamutamegele egi “suta diabonga dia Klisto Yesu.” Hene, wamuwambelele egi: “Muthu udi mutshita mudimo wa gisuta gajiyilego gudifutula mu milonga ya mungenda, gula watshigina gusuanguluisa fumi’enji.” (2 Tim. 2:3, 4) Mangino, alandudi avula a Yesu, ikhale anyi adi mu mudimo wa tangua diagasue, ana gutumagela mbimbi mupostolo Phaula wawambelele Timote. Anago gulandula matangi a athu a ha mavu awa. Ana gujiya egi: “Musombi wa ima udi muhiga wa muthu wamusombele.” (Ish. 22:7) Satana wana gusuanguluga gula watumona mubalegasa tangua nu ngolo jietu mu ndaga jia mungenda gifua ahiga. Badesizio ako tuana guzula ajiya gutunginyisa mu mikudi ivo yavula. Gufutshila inzo ya falanga jiavula, nu gungina makhalasa a ndando yakola, nu gusumba gamio ga ndando yakola, nga gukalagala wano wa ulo wa falanga jiavula, yajiya gutumba mu mikudi. Uvi gula tualebesa lujingu luetu nu tuazondesa mikudi nu badepanse, mbatumonesa egi tudi athu atema. Mbatumonesa nji egi tudi ahiga a Nzambi uvi a mungenda ndo.—1 Tim. 6:10.
(2 Timote 2:23, NWT) Luko, tuna ndaga jia iphapha jia guheya, handaga udi mujiya egi jiana guzola nguma.
w14-F 15/7 diyiji 14 par. 10
Akombeledi a Yehowa ‘Ana Gutuna Ndaga Jiabola’
10 Mangino, idi lamba ha gumona ba apostat mu hungu dia akombeledi a Yehowa. Uvi, gula tuavua muthu udi mulongesa ndaga jishigo mu Biblia, tudi naye gujituna nu mutshima umoshi, ngatshima ndaga jiene jiakatuga gui. Gusha iphapha nu ba apostat gudi guheya. Tushigo naye guta nawo maga, ikhale mu internet nga mu maluholo ako. Ikhale matangi etu adi egi tukuatese muthu muene, tujimbilago egi maga a luholo elu ashigo gudivua nga hazonda nu verse tudi mutadila. Esue akombeledi a Yehowa tudi naye gutuna apostasie nu mutshima umoshi.
AOUT 12-18
UMONYI UDI MU MBIMBI YA NZAMBI | TITO 1–FILEMONA
“Gutomba Akulu mu Hungu”
(Tito 1:5-9, NWT) Ngagubembele gu Krete hagula ulondege ndaga jiakhalelego guwenda muabonga, nu ha gutomba akulu mu dimbo nu dimbo gifua luholo ngagudijigile: 6 Gula gudi nu yala udi gashigo nu ndaga ya gumuwambewa, udi nu mukhetu mumoshi, udi nu an’enji adi enya gutshigina, anago gufundjiwa egi ana gutushita uthambi nu ashaga. 7 Handaga mutadi wa hungu udi nu ginemo gia gubamba ima ya Nzambi. Muene gashigo naye gukhala nu ndaga jia gumuwambewa, gashigo naye gukhala muthu wa muto wakola, nga muenya khabu, nga muthu wana gukuatewa matombe, nga muenya nguma, nga muenya nzala ya guheta ima mu njila yabola. 8 Uvi udi naye gukhala muyambi wa ngenji, muthu wana guzumba ndaga jiabonga, muenya matangi abonga, muthu wa nduedi, muthu udi wagujinginyina gudi Nzambi, nu muenya gudikanda. 9 Udi naye gukhala wagujinginyina gu mbimbi ya giamatshidia mu ndaga yatadila ndunge jienji jia gulongesa. Ngenyi, muene mbawukhala watagana ha gukolesa athu ako nu malongo a giamatshidia nu gutungununa gujimbila gua enya giphapha.
w14-F 15/11 diyiji 28-29
Mihu yana Guhula Athu ana Gutanga Mikanda Yetu
Biblia ishigo mumonesa ndaga jiagasue jiakhalele mukalegewa ha gutomba akulu mu hungu mu siekle ya thomo. Uvi tudi mumona ndaga jiazonda jidi mumonesa luholo akulu akhalele mutombewa mu hungu. Biblia idi mumonesa egi, tangua Phaula nu Barnabase akatugile mu vuayage yawo ya thomo ya gimisionere, ‘atombele akulu mu mahungu agasue mukunda nu ene, akombelele Nzambi nu ajidile ima ya gudia, abembele athu ene ha mago a Yehowa, handaga athu ene ashile gutshigina gudi muene.’ (Makal. 14:23) Ivo yavula gungima, Phaula wasonegele Tito yago wakhalele muwenda nenji egi: “Ngagubembele gu Krete hagula ulondege ndaga jiakhalelego guwenda muabonga, nu ha gutomba akulu mu dimbo nu dimbo gifua luholo ngagudijigile.” (Tito 1:5, NWT) Timote wawendele muavula nu mupostolo Phaula. Idi mumonega luko egi Phaula wamuhanele nji ginemo gia gutomba akulu mu mahungu. (1 Tim. 5:22) Idi mumonega haphelo egi, atadi awendji akhalele mutomba akulu, uvi ishigo apostolo nga akulu a gu Yelusalema.
Ha gutumagela matangi awa a Biblia, Hunji dia Akulu Atuameji dia Matemue a Yehowa diasombegesele luholo lua gutomba akulu nu akuateshi a mudimo. Sendese mu le 1 Septembre 2014, ndaga mbajikalegewa luholo elu: Akulu a mu mahungu mbatumina mutadi muwendji majina a aphangi atshigina gutombewa akulu nga akuateshi a mudimo. Tangua mutadi muwendji mbagaya mutala hungu, mbawutshita yagasue ha gujiya muabonga aphangi ene. Mbawulongesa nawo hamoshi gula luholo ludi guene. Gungima dia guta maga nu akulu mukunda nu aphangi ene, mutadi muwendji udi nu ginemo gia gutomba akulu nga akuateshi a mudimo mu mahungu a mu circonscription yenji. Ngenyi, luholo elu lua gutomba akulu nu akuateshi a mudimo ludi gudivua nu ndaga jiakhalele mukalegewa mu siekle ya thomo.
Akuatshi ana gutagenesa inemo yatadila luholo elu lua gutomba akulu nu akuateshi a mudimo? Tudi mujiya egi ginemo gia thomo gia “muhiga wa gufubidila nu watema” gidi gudisa imeme ya Nzambi mu nyuma. (Mat. 24:45-47) Ha gutagenesa ginemo egi, aphangi ene ana gutoga ukuateshi wa nyuma ya Nzambi ha gukotelesa Bibia muabonga, hagula ajiye malongo a Biblia adi mumonesa luholo hungu didi naye gutuamezewa ha mavu agasue. Muhiga wa gufubidila wakhala nji nu ginemo gia gutomba atadi awendji nu aphangi a mu Komite ya Filiale. Komite yagasue ya Filiale yana gukuatesa mahugu ha gutumagela malongo adi muhana Hunji dia Akulu-Atuameji. Hunji diagasue dia akulu didi nu ginemo gia gukamba gujiya gula aphangi adi mutshigina gutombewa adi mutaganesa diago ndaga jiana gutoga Biblia ha gubua mukulu nga mukuateshi wa mudimo. Uvi mutadi muwendji wagasue udi nu ginemo giakoma gia gutadila muabonga mu gisambu gula aphangi anyi akulu ahanyi majina awo, adi diago mutagenesa ndaga jiana gutoga Biblia ha gubua mukulu nga mukuateshi wa mudimo.
Kamba Ndaga Jiko jia Ndando jia mu Nyuma
(Tito 1:12, NWT) Muenya Krete mumoshi wa mukatshi dia ngambi jiawo, wazuelele egi: “Enya Krete akhala tangua diagasue enya mambo, shitu jiabola jia mu gishitu, imonya yana gudihana gu gudia.”
w89-F 15/5 diyiji 31 par. 5
Mihu yana Guhula Athu ana Gutanga Mikanda Yetu
Mupostolo Phaula gakhalelego musunzula ndaga jiabola athu akhalele muzuela mukunda nu enya Krete. Handaga wajiyile egi gudi nu enya Krete ako akhalele Aklisto a giamatshidia atshiginyiwe gudi Nzambi, nu ambiwe maji mu nyuma. (Makalegelo 2:5, 11, 33) Guakhalele nu Aklisto avula akhalele gudihana mu ndaga jia Nzambi, hene yakhalele mutoga egi mahungu azolewe mu “dimbo nu dimbo” dia gu Krete. Ikhale Aklisto ene akhalelego athu atagana, tuajiyilego guzuela egi akhalele enya mambo, imonya yana gudihana gu gudia. Nga akhalele ngenyi, nga Yehowa gaatshiginyilego. (Filiphi 3:18, 19; Yatuwuwe 21:8) Luholo lumoshi nu ifutshi yagasue mangino, mu dimbo dia Krete nji muakhalele nu athu a mitshima yabonga, anyi akhalelego musuanguluga nu ndaga jiabola jiakhalele mukalegewa guene. Athu ene akhalele mutshigina nji lukuma luabonga lua Aklisto.—Ezekiele 9:4; tala nji Makalegelo 13:48.
(Filemona 15, 16, NWT) Yajiya gukhala egi gishina giene diago gakatugile gudi aye mukunda nu tangua diazonda, hagula umuzule luko mayilago, 16 ishigo gifua muhiga, uvi muabonga gubalega muhiga, gifua phangi tuana guzumba muavula, muavula gudi ame, uvi aye muavula gubalega. Muzumbe gubalega muhiga, enji gifua phangi’aye mu Fumu.
w08-F 15/10 diyiji 31 par. 4
Ndaga jia Ndando Jidi mu Mukanda wa Tito, Filemona, nu wa Hebelu
15, 16—Mukunda natshi Phaula gatogelego Filemona ha gubemba Onesimo Aye Genji? Phaula wakhalele mutshigina gutagenesa thomo ginemo gienji gia ‘gulongesa Ufumu wa Nzambi nu ndaga jia Fumu Yesu Klisto.’ Hene, wazudile desizio dia gutuna gudinginyisa mu ndaga jia athu ako, gifua eji jiatadila uhiga.—Makal. 28:31.
AOUT 19-25
UMONYI UDI MU MBIMBI YA NZAMBI | HEBELU 1-3
“Zumba Ndaga Jiabonga, Tuna Khadilo dia Gushiya Mikhuala”
(Hebelu 1:8, NWT) Uvi mukunda nu Mun’enji, muene udi muzuela egi: “Nzambi udi mbata yaye ya ufumu mayilago. Muhango wa Ufumu waye udi muhango wa nduedi.
w14-F 15/2 diyiji 5 par. 8
Tutumbuisenu Klisto, Fumu wa Lutumbu!
8 Mu 1914, Yehowa wabuishile Mun’enji Fumu wa Ufumu wa Masiya mu dilu. Biblia idi muzuela egi, ‘Muhango wa Ufumu wenji udi muhango wa nduedi,’ hene, ufumu wenji udi wa nduedi nu wabonga. Ufumu wa Yesu udi watagana handaga ‘Nzambi udi mbata yenji ya ufumu.’ Yakotelesa egi, Yehowa wamuhanele ufumu wene. Luko, mbata ya ufumu wa Yesu mbayikhala “mayilago.” Tudi diago nu gusuanguluga ha gukombelela Yehowa mu utuameji wa Fumu wa ngolo jiavula watombewe gudi Nzambi.
(Hebelu 1:9, NWT) Aye wazumbile ndaga jiabonga, nu watunyine milonga yabola. Gishina giene Nzambi, Nzambi waye, wagumbile maji a gusuanguluga gubalega mafut’aye.”
w14-F 15/2 diyiji 4-5 par. 7
Tutumbuisenu Klisto, Fumu wa Lutumbu!
7 Tanga Ngimbo 45:6, 7. Luholo Yesu wana guzumba muavula ndaga jiabonga, nu wana gutuna ndaga jiagasue jianago gusuanguluisa Sh’enji, Yehowa wamutombele ha gukhala Fumu wa Ufumu wa Masiya. Yehowa wambile Yesu “maji a gusuanguluga” gubalega “mafut’enji,” yakotelesa egi mafumu a Yuda a mu giphuta gia Davidi. Luholo lutshi? Thomo, Yesu wambiwe maji gudi Yehowa hakhenji. Ya mbadi, Yehowa wamutombele ha gukhala Fumu nu Nganga-nzambi Wakoma. (Ngi. 2:2; Heb. 5:5, 6) Ya thathu, Yesu gambiwego maji luholo lumoshi nu mafumu a mu tangua dikulu, uvi wambiwe maji mu nyuma. Luko, ufumu wenji ushigo wa ha mavu, uvi wa gosa mu dilu.
Kamba Ndaga Jiko jia Ndando jia mu Nyuma
(Hebelu 1:3, NWT) Muene wana gumonesa lutumbu lua Nzambi, nu udi diago gifua muene, nu wana gukuata ima yagasue nu mbimbi yenji ya ngolo. Hamanesele muene guweva gubola guetu, wakhalele gu koko gua madia gua Nzambi gosa.
it-1-F diyiji 1170 par. 4
Gifuanesa
Yesu Udi Gifua Sh’enji mu Ndaga Jiagasue ba?
Yesu, mona wa somi wa Nzambi udi gifuanesa gia Sh’enji. (2Kol 4:4) Tangua Nzambi wazuelele egi, ‘Tufuge muthu mu gifuanesa gietu,’ idi yadiago egi wakhalele muzuela nu Yesu. Ngenyi idi mumonega egi gudifuana gua Yesu nu Sh’enji, guasendesele tangua diafugiwe Yesu. (Gis 1:26; Yone 1:1-3; Kol 1:15, 16) Tangua diakhalele Yesu ha mavu, gifua muthu watagana, wamonesele makalegelo nu umuthu wa Sh’enji mu luholo luatagana. Gishina giene gazuelele egi, ‘Wangumona ame, wamona nji tata.’ (Yone 14:9; 5:17, 19, 30, 36; 8:28, 38, 42) Uvi, gudifuana guene guamonegele diago haphelo tangua diafuzumugile Yesu ha guheta monyo mu dilu, nu tangua Sh’enji wamuhanele “ufumu wagasue . . . mu dilu nu ha mavu.” (1Phet 3:18; Mat 28:18, NWT) Nzambi wamukanduishile ha ‘fundo dimoshi dia gosa.’ Gungima, Yesu wamonesele lutumbu lua Sh’enji muavula gubalega tangua diakhalele muene mu dilu gutuama egi aze ha mavu. (Fili 2:9; Heb 2:9) Mangino, Yesu udi “diago gifua [Nzambi].”—Heb 1:2-4.
(Hebelu 1:10-12, NWT) Luko: “Fumu, aye wafugile mavu gu gisendeselo, dilu didi mudimo wa mago aye. 11 Ima eyi yagasue mbayifua, uvi aye mbawusala. Luholo lumoshi nu mulele, mbayinuna. 12 Aye mbawuyiwonga gifua gikuto, gifua mulele; mbayisombegesa. Uvi aye udi musala luholo lumoshi luene, ivo yaye mbayikhadigo nu gisugishilo nga hazonda.”
it-1-F diyiji 478 par. 1
Dilu
Mbimbi jidi mu Ngimbo 102:25, 26 jidi muzuelela Yehowa Nzambi. Uvi mu mukanda wa Hebelu, mupostolo Phaula udi gujikalegela ha guzuelela Yesu Klisto. Mukunda natshi? Handaga Mun’a Nzambi mumoshi’a mumoshi, muene Nzambi wakalegele ha gufuga ima. Phaula udi mumonesa egi Mun’a Nzambi mbawusala mayilago, uvi ima yafugiwe mbayifua, handaga gula Nzambi watshigina wajiya ‘guyiwonga gifua mulele’ nu gayibishila.—Heb 1:1, 2, 8, 10-12; tala nji 1Phet 2:3, mbimbi goshi’a diyiji.
AOUT 26–SEPTEMBRE 1
UMONYI UDI MU MBIMBI YA NZAMBI | HEBELU 4-6
“Tutshitenu Ngolo ha Gungina mu Guhuluguga gua Nzambi”
(Hebelu 4:1, NWT) Luholo laji dia gungina mu guhuluguga guenji khenji dihua gale ndo, tutemenu hagula nga muthu mumoshi mukatshi dienu gadifudigo ha gungina mu guhuluguga guene.
(Hebelu 4:4, NWT) Handaga mu fundo diko muene wazuelele ndaga eji mukunda nu lusugu lua sambadi: “Nzambi wahululugile mu lusugu lua sambadi gu midimo yenji yagasue,”
w11-F 15/7 diyiji 24-25 par. 3-5
Guhuluguga gua Nzambi Gudi Itshi?
3 Gudi nu ndaga mbadi jidi gututshiginyisa diago egi lusugu lua sambadi luayile uu nu mu siekle ya thomo ya tangua dietu. Thomo, tutadilenu ndaga Yesu gawambelele mbalagaji jienji jiatangijile egi watshitshile gubola luholo wasagele muthu mu lusugu lua guhuluguga. Gudi ene yakhalele gifua Yesu wakalegele mudimo. Yesu waalezele egi: ‘Tata wami udi mulandula gutshita mudimo uu nu luenyelu, ame nji ngudi naye gulandula gutshita mudimo.’ (Yone 5:16, 17) Itshi Yesu watshiginyile guzuela? Amufundjile egi wakhalele mutshita mudimo mu Lusugu lua Guhuluguga. Ha gumanesa ndaga yene, Yesu waavutudile gamba: “Tata wami udi mulandula gutshita mudimo.” Mu guzuela guko, Yesu wakhalele muwambela mbalagaji jienji egi: ‘Ame nu Tata tudi mutshita mudimo wa luholo lumoshi. Luholo Tata wami wana gulandula gutshita mudimo mu Lusugu lua Guhuluguga lua ivo yavula, ame nji ngudi naye gulandula gukalagala mudimo, ikhale mu Lusugu lua Guhuluguga.’ Yadiago, mbimbi jia Yesu jiamonesele egi Lusugu luakoma lua Guhuluguga lua Nzambi luasugilego tangua Yesu wakhalele ha mavu.
4 Ndaga ya mbadi idi gututshiginyisa egi Lusugu lua Guhuluguga luasugilego, idi mbimbi jiazuelele mupostolo Phaula. Mupostolo Phaula watangele mbimbi jidi mu mukanda wa Gisendeselo 2:2, jidi muzuelela guhuluguga gua Nzambi. Wazuelele egi: ‘Esue athu tudi nu gutshigina, mbatungina mu guhuluguga.’ (Heb. 4:3, 4, 6, 9) Yadiago, lusugu lua sambadi luayile uu nu mu tangua dia Phaula. Lusugu luene luakhalele naye gutshita matangua gutshi?
5 Ha guhana kueteya gu muhu owu, tudi naye gujiya ndaga jiakhalele naye gukalegewa mu lusugu lua sambadi. Mukanda wa Gisendeselo 2:3 udi muzuela egi: ‘Nzambi washimbigile lusugu lua sambadi, nu walubuishile lusugu lua gijila.’ Yehowa wabuishile lusugu luene lua ‘gijila’ nga ndo waluhagele mukunda nu gutagenesa felela dienji. Felela diene didi egi mavu akhale nu athu atumaga, anyi mbaahinyina mavu nu ima yagasue idi hene. (Gis. 1:28) Yehowa Nzambi nu Yesu Klisto, “Fumi’a lusugu lua guhuluguga,” ana ‘gulandula gutshita mudimo uu nu luenyelu’ ha gutagenesa felela diene. (Mat. 12:8) Guhuluguga gua Nzambi mbagulandula gukhala guene uu nu tangua felela dienji nu daga jiagasue jidi mutadila felela diene mbajitaganesewa gu gisugishilo gia Uhinyinyi wa Klisto wa Ivo 1 000.
(Hebelu 4:6, NWT) Hene, handaga idi yaleba gudi athu ako ha gungina mu guhuluguga guene, luko egi athu adiangele guvua lukuma luabonga anginyinego mukunda nu gushaga guawo,
w11-F 15/7 diyiji 25 par. 6
Guhuluguga gua Nzambi Gudi Itshi?
6 Nzambi wadijigile Adama nu Eva haphelo felela dienji, uvi ene atumagelego hagula felela diene ditagenesewe. Idi yadiago egi Adama nu Eva adi athu a thomo atunyine gutumagela Nzambi. Gungima, athu ako avula atunyile nji gutumagela Nzambi. Giphuta gia enya Isalele, athu anyi atombewe gudi Nzambi, atunyine nji gumutumagela. Hene, mupostolo Phaula watemesele Aklisto a mu siekle ya thomo egi athu ako mukatshi diawo, ajiya nji gubua mu muheto wabuile enya Isalele. Wasonegele egi: “Tutshitenu ngolo ha gungina mu guhuluguga guene, hagula nga muthu mumoshi gabuigo nu galandulago khadilo dinyi dia gushaga.” (Heb. 4:11, NWT) Mupostolo Phaula udi mumonesa gudivua gudi mukatshi dia gushaga nu gutuna gungina mu guhuluguga gua Nzambi. Mbimbi eji jidi mukotelesa itshi? Jidi mumonesa egi gula tuatuna gutumagela felela dia Nzambi mbatushigo mungina mu guhuluguga guenji ba? Yadiago, kueteya gua muhu owu gudi nu ndando yavula gudi esue, hene tudi naye guyitadila muabonga lume. Uvi, tuzuelelenu gale khadilo diabola dia gushaga diakhalele nadio enya Isalele, ha gujiya mukunda natshi anginyinego mu guhuluguga gua Nzambi.
(Hebelu 4:9-11, NWT) Hene, gudi nu guhuluguga gua lusugu lua guhuluguga mukunda nu akombeledi a Nzambi. 10 Handaga muthu udi mungina mu guhuluguga gua Nzambi udi muhuluguga gu midimo yenji gifua luholo Nzambi wana guhuluguga gu midimo yenji. 11 Tutshitenu ngolo ha gungina mu guhuluguga guene, hagula nga muthu mumoshi gabuigo nu galandulago khadilo dinyi dia gushaga.
w11-F 15/7 diyiji 28 par. 16-17
Guhuluguga gua Nzambi Gudi Itshi?
16 Mangino, phamba Aklisto azonda ajiya guzuela egi tudi naye gutumagela Mukhuala wa Moize ha guhuluishiwa. Mupostolo Phaula wamonesele ndaga yene haphelo mu mukanda gasonegele Aklisto a gu Efeso. Wazuelele egi: ‘Muahuluishiwe mu ngasa ya Nzambi mukunda nu gutshigina guenu. Guhuluga guenu gushigo muza gudi enue; gudi guhua gua Nzambi. Ishigo mukunda nu midimo yenu, ngenyi muthu gajiyilego gudisunzula.’ (Ef. 2:8, 9) Itshi tuajiya giwa gukalagala ha gungina mu guhuluguga gua Nzambi? Yehowa watombele lusugu lua sambadi (lusugu luenji lua guhuluguga) ha gutagenesa muabonga felela dienji mukunda nu mavu. Tuajiya gungina mu guhuluguga gua Yehowa gula tudi gumutumagela nu tudi mutshita ndaga mu gudivua nu felela dienji gifua luholo organizasio wenji udi gutuwambela.
17 Uvi gula tudi musegulula malongo a Biblia, ana gutuhana muhiga wa gufubidila nu watema, nu tudi mutshigina diphanda, mbatudibuisa mbalagaji jia felela dia Nzambi. Khadilo dia luholo elu mbadibolesa ufuta wetu nu Yehowa. Mu longo dialandula, tuza mumona ndaga jiajiya gututuma ha gushiya mikhuala ya Nzambi. Luko, tuza mumona luholo lutshi badesizio tuana guzula mu ndaga jiene ajiya gumonesa gula tuanginyine gale mu guhuluguga gua Nzambi nga ndo.
Kamba Ndaga Jiko jia Ndando jia mu Nyuma
(Hebelu 4:12) Handaga mbimbi ya Nzambi idi nu monyo nu ngolo nu idi yabala gutua gubalega phogo ya khusa ya guvuiga khanda jiyadi. Idi mungina uu nu ha gukhaphuna monyo nu nyuma, nu malongo nu wongo wa ifua. Idi muzuelesa matangi nu ndaga jidi mutshima mutshigina gutshita.
w16.09-F diyiji 13
Mihu yana Guhula Athu ana Gutanga Mikanda Yetu
“Mbimbi ya Nzambi” idi muzuelela Hebelu 4:12 egi “idi nu monyo” idi itshi?
▪ Verse jidi gutuama nu gungima jidi mumonesa egi muposto Phaula wakhalele muzuelela mbimbi jia Nzambi jidi mu Biblia jiatadila felela denji.
Mikanda yetu yana gukalegela muavula Hebelu 4:12 ha gumonesa egi Biblia idi nu ngolo jia gusombegesa makalegelo a athu; idi ndaga yabonga ha guyikotelesa luholo elu. Uvi, idi nu ndando ha gutadila ndaga jiagasue jidi gutuama nu gungima dia Hebelu 4:12. Phaula wakhalele muwambela Aklisto akhalele enya Yuda egi adi naye gutumagela ndaga jiatadila mafelela a Nzambi. Mafelela ene avula akhalele mu mukanda wa Nzambi. Phaula watangele gifezegeselo gia enya Isalele Nzambi wahuluishile gu Egypte. Akhalele nu luendu lua gungina mu mavu a gutendelela, “azala pha nu mele nu wigi.” Guene akhalele naye gukhala mu guhuluguga gua giamatshidia.—Guz. 3:8, NWT; Mikh. 12:9, 10.
Diene felela dia Nzambi. Uvi gungima, enya Isalele akolesele mitshima yawo, akhalelego luko musha gutshigina guawo gudi Yehowa. Hene, avula mukatshi diawo anginyinego mu guhuluguga guene. (Lutang. 14:30; Yosh. 14:6-10) Uvi Phaula wazuelele luko egi ‘laji dia gungina mu guhuluguga gua Nzambi’ diakhalele khenji dihua gale ndo. (Heb. 3:16-19; 4:1) “Laji” diene didi mukatshi dia felela dia Nzambi. Luholo lumoshi nu Aklisto awa akhalele enya Yuda, tuajiya gutanga felela diene nu guditumagela. Ha gumonesa diago egi felela diene diakatuga mu Biblia, Phaula watangele mbimbi jidi mu mukanda wa Gisendeselo 2:2 nu Ngimbo 95:11.
Gujiya egi ‘laji dia gungina mu guhuluguga gua Nzambi’ khenji dihua gale ndo gudi mukuata lume mitshima yetu. Tudi musha mutshima egi tuajiya gungina mu guhuluguga gua Nzambi; tuana gukalagala ngolo ha guyitshita. Hagula Yehowa atutshigine, tuanago gukamba gulandula Mukhuala wa Moize nga gutshita midimo iko. Uvi, tuana gusuanguluga gutumagela felela dienji nu gutshigina guagasue. Luko, gifua luholo tuayizuelela gutuama, athu avula ha mavu agasue ana gulonguga Biblia nu ana gujiya ndaga jiazuelele Nzambi mukunda nu felela dienji. Gulonguga gua Biblia guana gukuatesa avula mukatshi diawo ha gusombegesa makalegelo awo, nu ha gumonesa gutshigina guawo nu gubatjiwa ha gubua Aklisto. Luholo Biblia yana guakuatesa ha gusombegesa makalegelo awo ludi mumonesa diago egi “mbimbi ya Nzambi idi nu monyo nu ngolo.” Ndaga jiazuelele Nzambi mukunda nu felela dienji, jinyi jidi mu Biblia, jiana gutukuatesa gale mu makalegelo etu. Mbajilandula nji gumonesa egi jidi nu ngolo mu monyo wetu.
(Hebelu 6:17, 18, NWT) Luholo lumoshi nji, tangua diazudile Nzambi desizio dia gumonesa haphelo gudi athu anyi mbaheta gubonga gua laji egi, felela dienji dianago gusombegesa, wadilogele ha guyikalagala, 18 hagula mu njila ya ndaga mbadi jianago gusombegesa, jinyi Nzambi gajiyilego gumba mambo nga hazonda, esue athu tualengele gudi fundo dietu dia gulengela, tuhete ngolo jiavula ha gukuata mangololo felela diahagewe gutuama dietu.
it-1-F diyiji 799 par. 7
Felela
Felela edi dia monyo wa mayilago nu gutuna gubola mukunda nu Aklisto anyi ‘atamegewe ha guya mu dilu’ (Heb 3:1), didi felela dia giamatshidia tudi naye gushila mutshima. Felela diene diakatuga mu ima mbadi Nzambi gajiyilego gumbila mambo: laji dienji nu gudiloga guenji. Luko felela diene didi nu Yesu, yago gajiyilego gufua nu udi nu monyo wa mayilago mu dilu. Hene, Biblia idi muzuela egi felela edi didi gifua ‘ngowa idi mujigamesa monyo wetu, idi ya giamatshidia, nu yajiyilego gunyigishiwa. Gudifelela ogu gudi mungina moshi’a mulele wa monzo ya Nzambi uu nu mu fundo dia gijila [gifua luholo nganga-nzambi wakoma wakhalele mungina mu Fundo dia Balega Gijila mu Lusugu lua Gutotesela Gubola]. Fundo dinyi diene dianginyine Yesu gutuama dietu mukunda nu esue. Muene wabuile nganga-nzambi wakoma wa ivo nu ivo gifua Melekisedeke.’—Heb 6:17-20.