MWBR20 10 Referanse jia Mukanda wa Gukalegela mu Gudibungisa gua Lujingu nu Mudimo wa Uklisto
OCTOBRE 5-11
UMONYI UDI MU MBIMBI YA NZAMBI | GUZOGA 31-32
“Ukombelelago Isongo”
(Guzoga 32:1, NWT) Mu tangua diene, athu amonele egi Moize walalegele ha gukatuga gu mulundu. Hene ajietele Alona, amuwambelele egi: “Zuga utulondele nzambi mbawuwenda gutuama dietu handaga tushigo mujiya ndaga itshi yabuila Moize owu watuzolele mu gifutshi gia Ejipitu.”
w09-F 15/5 diyiji 11 par. 11
Kula mu Nyuma Handaga “Lusugu Luakoma lua Yehowa Luasuena Hehi”
11 Matangua ako, gula tuatagana nu malamba, yajiya gukhala lamba ha gukalegela ndaga tualongugile mu Biblia. Tuzuelelenu gifezeselo gia Enya Isalele. Tangua diaazolele Yehowa mu uhiga mu Ejipitu, gungima dia masugu azonda “asendesele gumanesa Moize” nu “alolele Yehowa.” Mukunda natshi? Handaga akhalelego nu meya a gunua. (Guz. 17:1-4) Enya Isalele akotele gikotelo nu Yehowa, azuelele egi mbaakhala mutumagela ‘mbimbi jiagasue jiazuelele Yehowa.’ Uvi gungima dia mbeji imoshi nu ndambo, ashiyile mukhuala wakhalele guatunyisa ha gukombelela isongo. (Guz. 24:3, 12-18; 32:1, 2, 7-9) Akombelele isongo handaga akhalele nu woma luholo Moize ashiphile muavula gu mulundu wa Olebe ba? Yajiya gukhala egi avile woma egi enya Amaleki mbaza gualuisa luko ba? Luko, akhalele mutangiza egi mbashigo mubinga handaga Moize akhalelego guene ha gualuila gifua luholo athuphuile mago enji goza mu masugu abalega ba? (Guz. 17:8-16) Yajiya gukhala ngenyi. Uvi ikhale ngenyi nga ndo, enya Isalele “atunyile gutumagela Yehowa.” (Makal. 7:39-41) Luholo enya Isalele avuile woma, atunyile gawo gungina mu mavu a gutendelela. Gishina giene, mupostolo Phaula watemesele Aklisto ha ‘gutshita yagasue’ hagula alandulago ‘khadilo dia enya Isalele dia gushaga.’—Heb. 4:3, 11.
(Guzoga 32:4-6, NWT) Muene wazudile wolo ha mago awo, wawutelegele mu tshiuya, walondele muna ngombe wa wolo. Asendesele guzuela egi: “Yowu Nzambi waye, O Isalele, muene waguzolele mu mavu a Ejipitu.” 5 Hamonele Alona ndaga eyi, watungile giwotshielo gutuama dia gisongo giene. Gungima, wazuelele egi: “Hamene mbagukhala wano mukunda nu Yehowa.” 6 Mu lusugu lualanduile, azugile nu gimenegena giagasue, asendesele guhana milambu ya guwetshia ha tshiuya nu milambu ya guhuima. Gungima dienji, athu akhalele hashi ha gudia nu gunua. Gungima, azugile ha gudikenesa.
w12-F 15/10 diyiji 25 par. 12
Tumagela Yehowa Hagula Umone Gutagana gua Ndaga Jialayile Muene
12 Yehowa watagenesele ndaga jiadivuile muene nu enya Isalele mukunda nu gikotelo gia Mukhuala. Wazudile desizio dia guhaga inzo ya tenta nu nganga-nzambi ha gukuatesa enya gubola ha gusuena hehi nu muene. Uvi enya Isalele abuitshile gawo mutshima egi adihanele gudi Nzambi, hene “asagesele Nzambi wa gijila wa Isalele.” (Ngi. 78:41) Tangua diayile Moize gu Mulundu wa Sinayi ha guzula malongo ako gudi Yehowa, washiphile guene. Mu tangua diene, enya Isalele akhalelego nu khadilo dia guhuiminyina, atangijile egi Moize waabembele gawo ngenyi. Gutshigina guawo gudi Nzambi gualebele, hene alondele gisongo gia muna ngombe wa wolo, azuelele egi: “Yowu Nzambi waye, O Isalele, muene waguzolele mu mavu a Ejipitu.” (Guz. 32:1, 4) Gungima, alondele wano, awutamegene egi “wano mukunda nu Yehowa.” Afugamene gutuama dia gisongo giene, agihanele milambu. Tangua Yehowa wamonele ndaga yene, wawambelele Moize egi: “Ene abuitshile mutshima muphushi ngu ndaga ngawambelele ha gutshita.” (Guz. 32:5,6, 8) Sendese mu tangua dinyi, enya Isalele akhalelego munemesa ndaga jiavula alayile Nzambi.—Lutang. 30:2.
(Guzoga 32:9, 10, NWT) Yehowa wawambelele luko Moize egi: “Ngudi mumona egi athu awa adi enya mito yakola. 10 Henyaha ngubembe nguashiye mukunda nu khabu jiami jiakola. Uvi aye mbangugubuisa gifutshi giakoma ha fundo diawo.”
w18.07-F diyiji 20 par. 14
“Nanyi udi gu Khanda ya Yehowa?”
14 Enya Isalele akhalele mujiya egi gukombelela isongo gudi gubola guakoma gu meso a Yehowa. (Guz. 20:3-5) Uvi gungima dia masugu azonda, asendesele gukombelela muna ngombe wa wolo! Enya Isalele akhalelego mutumagela luko Yehowa, uvi ene akhalele mumona gifua adi gu khanda ya Yehowa. Tangua diakombelele ene muna ngombe wa wolo, Alona watamegele ndaga yene egi “wano mukunda nu Yehowa”! Yehowa wadivile luholo lutshi? Wavile gikenene giavula luholo enya Isalele atunyile gumutumagela. Yehowa wawambelele Moize egi ‘athu adizangela gale hakhawo, akatuga mu njila ngawambelele ha gulandula.’ Yehowa “wavile khabu jiabala” mukunda nu enya Isalele, wazudile desizio dia gushiya gifutshi giagasue.—Guz. 32:5-10.
Kamba Ndaga Jiko jia Ndando jia mu Nyuma
(Guzoga 31:17, NWT) Lusugu luene mbalukhala gijiyishilo gia mayilago hakatshi diami nu enya Isalele, handaga ame Yehowa ngafugile dilu nu mavu mu masugu samano, mu lusugu lua sambadi ngabembele mudimo wami, ngahulugugile.’”
“Gudi nu Tangua dia Gutshita” Mudimo nu dia Guhululuga
4 Luholo Yehowa nu Yesu adi atshitshi akola a mudimo, ludi mumonesa egi tuajiyilego guhuluguga ba? Ndo sha. Yehowa gajiyilego guhuila nga hazonda. Hene, gashigo nu funu ya guhuluguga ha guhuimisa muila. Uvi Biblia idi muzuela egi gungima dia gufuga dilu nu mavu, Nzambi “wabembele mudimo wenji, wahulugugile.” (Guz. 31:17) Yakotelesa itshi? Idi mukotelesa egi, Yehowa wabembele gufuga ima, wazudile tangua dia gusuanguluga nu ima afugile. Ngatshima Yesu wakhalele mutshita mudimo muavula tangua diakhalele muene ha mavu, wakhalele muzula tangua dia guhuluguga nu dia gudia hamoshi nu mafut’enji.—Mat. 14:13; Luka 7:34.
(Guzoga 32:32, 33, NWT) Uvi gula watshigina, atotesele gubola guawo; gula ndo katula jina diami mu mukanda waye wasonegele.” 33 Uvi Yehowa wawambelele Moize egi: “Muthu wangutshitshila gubola muene mbangukatula jina dienji mu mukanda wami.
w87-F 1/9 diyiji 29
Mihu yana Guhula Athu ana Gutanga Mikanda Yetu
Gula Nzambi wasonega jina dia muthu mu “mukanda wa monyo” ha gumonesa egi wamutshigina, ishigo mukotelesa egi muthu muene udi naye guheta monyo wa ivo nu ivo. Mukunda natshi? Handaga gutshita ngenyi guajiya gumonesa gifua ndaga yene yadiangewe gulondewa gutuama, nu yajiyilego gusombegesa. Moize watogele Yehowa mukunda nu enya Isalele egi: “Uvi gula watshigina, atotesele gubola guawo; gula ndo katula jina diami mu mukanda waye wasonegele.” Nzambi wamuvutudile gamba: “Muthu wangutshitshila gubola muene mbangukatula jina dienji mu mukanda wami.” (Guzoga 32:32, 33) Gula Nzambi wasonega jina dia muthu mu “mukanda” wenji, gungima muthu muene wajiya gutuna gumutumagele luko nga gulebesa gutshigina guenji. Gula watshita ngenyi, Nzambi wana “katula jina dienji mu mukanda wa monyo.”—Yatuwuwe 3:5.
OCTOBRE 12-18
UMONYI UDI MU MBIMBI YA NZAMBI | GUZOGA 33-34
“Makalegelo a Yehowa Ana Gutusuanguluisa”
(Guzoga 34:5, NWT) Yehowa wabulumugine mu tuta, wamaganele hehi n’enji, waditamegele mu jina dia Yehowa.
it-2-F diyiji 412 par. 4
Jina
Ima yafugile Nzambi yana gututshiginyisa egi muene wana khala guene, uvi yanago gutumonesa jina dienji. (Ngi 19:1; Lomo 1:20) Gujiya jina dia Nzambi gudi mukotelesa egi gujiya ndaga jiavula gubalega gutamega phamba jina diene. (2 Gudi 6:33) Biblia yana monesa egi, gujiya jina dia Nzambi gudi mukotelesa egi gujiya umuthu wenji, ndaga jialayile muene, midimo yenji nu makalegelo enji. (fuanesa nu 1Maf 8:41-43; 9:3, 7; Neh 9:10.) Gifezegeselo gia Moize gidi mumonesa egi Yehowa ‘wakhalele mujiya jina dia Moize,’ yakotelesa egi wakhalele gumujiya muabonga diago. (Guz 33:12) Moize wahetele luendu lua gumona lutumbu lua Yehowa nu lua ‘guvua Yehowa hakhenji muditamega mu jina dienji.’ (Guz 34:5) Guditamega gua Yehowa guakhalelego phamba gutanga jina dia Yehowa, uvi guakhalele mumonesa midimo nu makalegelo enji. “Yehowa, Yehowa, Nzambi wazala pha nu khenda nu gisemo, ganago guvua khabu mu phushi, Nzambi wa guzumba nu wa giamatshidia. Wana monesela athu avula guzumba gua giamatshidia, wana totesela athu gushaga, nu gujimbila nu gubola guawo. Uvi wana hana ndola gudi athu ana shiya mikhuala. Muene udi muhua ana a gindongo gia thathu nu gia nguana ndola mukunda nu gubola gua ashawo.” (Guz 34:6, 7) Luholo lumoshi nji, lungimbo lua Moize luakhala nu mbimbi eji: ‘Mbangutumbuisa jina dia Yehowa.’ Lungimbo luene luana zuelela luholo Yehowa akhalele mubamba ufuta wenji nu enya Isalele nu luana monesa umuthu wenji.—Mikh 32:3-44.
(Guzoga 34:6, NWT) Yehowa wakhalele mubalega gutuama dienji, wazuelele egi: “Yehowa, Yehowa, Nzambi wazala pha nu khenda nu gisemo, ganago guvua khabu mu phushi, Nzambi wa guzumba nu wa giamatshidia.
w09-F 1/5 diyiji 18 par. 3-5
Tangua Yehowa Wadimonesele
Thomo, Yehowa wana gudimonesa egi wakhala “Nzambi wazala pha nu khenda nu gisemo.” (Verse 6) Muenya ndunge mumoshi udi muzuela egi, mbimbi ya zuelelo dia Hebelu yabalumuiwe egi “khenda,” idi mumonesa khadilo dia Nzambi dia “gudisha ha fundo dia athu ako, gifua luholo tata wana monesa khadilo edi gudi an’enji.” Uvi mbimbi “gisemo” idi gudivua nu “mbimbi imoshi idi muhana matangi a muthu udi mutshita ndaga mu mutshima wagasue, ha guhana muthu muko gima hagula amukuatese.” Yehowa wana tshigina tujiye egi, muene wana gudisagesa mukunda nu akombeledi enji gifua luholo mvuaji jiana gudisagesa mukunda nu anawo nu guzumba guagasue ha gutagenesa nzala jiawo.—Ngimbo 103:8, 13.
Yehovah udi muzuela luko egi muene “ganago guvua khagu muphushi.” (Verse 6) Muene ganago gulaba guvila akombeledi enji khabu muphushi. Uvi, wana guamonesela khadilo dia guhuiminina. Wana guatotesela gubola guawo nu wana guabembela tangua dia gusombegesa makalegelo awo abola.—2 Phetelo 3:9.
Nzambi wazuelele luko egi, muene udi “Nzambi wa guzumba nu wa giamatshidia.” (Verse 6) Guzumba gudi khadilo diabonga diana gutuma Yehowa ha gukuata ufuta wakola nu akombeledi enji. (Mikhuala 7:9) Yehowa udi nji Nzambi wa giamatshidia. Muene gajiyilego gumba mambo, nga gumbiwa mambo. Handaga muene udi “Nzambi wa giamatshidia,” tudi naye gukhala nu gutshigina guakola mu ndaga jiagasue jiana zuela muene, nu mu mafelela enji atadila masugu adi muza.—Ngimbo 31:5.
(Guzoga 34:7) Wana monesela athu avula guzumba gua giamatshidia, wana totesela athu gushaga, nu gujimbila nu gubola guawo, Uvi wana hana ndola gudi athu ana shiya mikhuala. Muene udi muhua ana a gindongo gia thathu nu gia nguana ndola mukunda nu gubola gua ashawo.”
w09-F 1/5 diyiji 18 par. 6
Tangua Yehowa Wadimonesele
Ndaga iko idi gutuwambela Yehowa ha gujiya idi egi muene “wana totesela athu gushaga, nu gujimbila nu gubola guawo.” (Verse 7) Muene udi “hehi ha gutotesela gubola” gua athu ana balumuna mutshima. (Ngimbo 86:5) Uvi ganago gubemba atshitshi a ndaga jiabola. Biblia idi muzuela egi, “wana hana ndola gudi athu ana shiya mikhuala.” (Verse 7) Nzambi wa gijila nu wana tshita ndaga jiabonga mbawuhana ndola gudi athu adi mutshita gubola nu mutshima umoshi. Ene mbamona malamba mukunda nu makalegelo awo abola.
Kamba Ndaga Jiko jia Ndando jia mu Nyuma
(Guzoga 33:11, NWT) Yehowa wakhalele muta maga nu Moize phala nu phala gifua muthu udi muzuela nu futa dienji. Hakhalele muene muvutuga gu phundo, mukuateshi wenji Yoshua, muna Nuna gakhalelego mukatuga monzo ya tenta ya gijila.
(Guzoga 33:20, NWT) Uvi wamulezele luko egi: “Aye wajiyilego gumona phala yami, handaga muthu gajiyilego gungumona muene gakhadi nu monyo.”
w04-F 15/3 diyiji 27 par. 5
Ndaga jia Ndando Jidi mu Mukanda wa Guzoga
33:11, 20—Luholo lutshi Nzambi wakhalele muzuela nu Moize “phala nu phala”? Mbimbi eji jidi mumonesa luholo muthu ana guta maga nu futa dienji. Moize wakhalele muta maga nu muanjelo wa Nzambi; muene wakhalele gumuhana mikhuala yakhalele mukatuga gudi Yehowa. Uvi Moize gamonelego Yehowa, ‘handaga muthu gajiyilego gumona Nzambi, muene gakhadi nu monyo.’ Luko Yehowa gazuelelego nu Moize. Biblia idi muzuela mu Galatiya 3:19 egi Mukhuala ‘wahanewe mu njila ya anjelo gudi mutageneshi mumoshi wa gikotelo.’
(Guzoga 34:23, 24, NWT) “Mahugo atatu mu givo, mala agasue mbadimuenesa gu phala ya Fumu wa giamatshidia, Yehowa, Nzambi wa Isalele. 24 Handaga mbangukaya ifutshi ya athu gutuama dienu. Mbangukomesa mididilo ya mavu enu. Gushigo nga muthu mbawuvuila gifutshi gienu nzala tangua mbamukanduga ha gudimuenesa mahugo thathu mu givo gu phala ya ame Yehowa, Nzambi wenu.
w98-F 1/9 diyiji 20 par. 5
Hagenu Ima ya Ndando ha Fundo dia Thomo!
Iphungu thathu mu givo, mala a gu Isalele nu anyi akhalelego enya Yuda, akhalele nu ginemo gia guya gudimuenesa gu phala ya Yehowa. Mala avula amonele egi guya gudimuenesa gu phala ya Yehowa guajiya gubatela enya fami jiawo agasue gubonga mu nyuma. Hene, akhalele muya nu akaji’awo nu an’awo. Uvi nanyi giwa wakhalele naye gusala ha gubamba jinzo jiawo nu mahia awo gudi mbalagaji tangua diakhalele ene muya? Yehowa walayile egi: “Gushigo nga muthu mbawuvuila gifutshi gienu nzala tangua mbamukanduga ha gudimuenesa mahugo thathu mu givo gu phala ya ame Yehowa, Nzambi wenu.” (Guzoga 34:24, NWT) Enya Isalele akhalele naye gumonesa gutshigina guakola egi gula ahaga ndaga jia mu nyuma ha fundo dia thomo, mbaashigo mutotesa ima yawo. Yehowa watagenesele mbimbi jienji ba? Ayi!
OCTOBRE 19-25
UMONYI UDI MU MBIMBI YA NZAMBI | GUZOGA 35-36
“Yehowa Wana Gutukuatesa ha Gutshita Mudimo Wenji”
(Guzoga 35:25, 26, NWT) Akhetu agasue anyi akhalele mujiya mudimo muabonga, atungile nu mago awo; ajile nu ima yatungile ene: wanda ula bule-bule, wabenguluga, wabenga nu wanda wa linene ula lebe-lebe. 26 Akhetu agasue anyi akhalele mujiya mudimo muabonga, anyi mitshima yawo yakhalele guatuma ha gudihana gu mudimo, ahotele uvuji wa khombo.
w14-F 15/12 diyiji 4 par. 4
Yehowa Wana Shimbiga Athu Anyi Adi nu Khadilo dia Gudihana
Gima giasuanguluishile Yehowa ishigo ima yakhalele muhana athu, uvi khadilo dia gudihana diakhalele nadio athu anyi akhalele muhana mago ha gukuatesa gikombelelo gia giamatshidia. Luko, akhalele muhana tangua diawo nu ngolo jiawo. Biblia idi muzuela egi: “Akhetu agasue anyi akhalele mujiya mudimo muabonga, atungile nu mago awo. Akhetu agasue anyi akhalele mujiya mudimo muabonga, anyi mitshima yawo yakhalele guatuma ha gudihana gu mudimo, ahotele uvuji wa khombo.” Luko, Yehowa wahanele Besalele ‘gutema nu ndunge nu ujiyi wa midimo ya maluholo agasue.’ Yadiago, Nzambi wazalesele pha Besalele nu Oholiaba ndunge jia gukalagala midimo ya maluholo agasue yahanewe.—Guz. 35:25, 26, 30-35.
(Guzoga 35:30-35, NWT) Moize wawambelele enya Isalele egi: “Talenu, Yehowa watomba Besalele, muna Uli, mujigulu wa Hule, wa mu giphuta gia Yuda. 31 Wamuzalesa pha nu nyuma yenji hagula ahete gutema, nu ndunge, nu ujiyi wa midimo ya maluholo agasue, 32 ha gutshita jiphula, ha gukalagala midimo nu utadi wa wolo, wa siliva nu wa mabengedi, 33 ha gusonga nu gulondega seso, nu gusonga mabaya ha guatshitshila midimo ya maluholo agasue. 34 Nzambi wamuhuile hamoshi nu Oholiaba, muna Ahisamaka, wa mu giphuta gia Dane ndunge jia gulongesa athu ako. 35 Nzambi waazalesele pha nu ndunge jia gukalagala midimo ya maluholo agasue, jia gusonga nu gulonda ifuanesa ha milele, jia gutunga milele nu wanda wa bule-bule, wabenga, wa linene wabenguluga, nu wa linene ila lebe-lebe, nu jia midimo yagasue ya gutunga milele. Athu awa mbakalagala midimo ya maluholo agasue, mbatshita nji jiphula jia maluholo agasue.
w11-F 15/12 diyiji 18 par. 6
Nyuma ya Nzambi Yakuatesele Akombeledi Enji a mu Tangua Dikulu
6 Midimo yakalegele Besalele idi mumonesa luholo nyuma ya Nzambi yajiya gukuatesa akombeledi enji. (Tanga Guzoga 35:30-35.) Yehowa watombele Besalele ha gulonda ima yakhalele naye guhagewa mu inzo ya tenta. Gutuama egi atombewe ha gukalagala mudimo wene, Besalele wakhalele thomo guwujiya ba? Yajiya gukhala ngenyi. Uvi, mudimo wagisugishilo wakalegele muene wakhalele gulondega jibriki jia enya Ejipitu. (Guz. 1:13, 14) Luholo lutshi Besalele akhalele naye gutshita mudimo owu wakola? Biblia idi muzuela egi Yehowa ‘wamuzalesele pha nu nyuma yenji hagula ahete gutema, nu ndunge, nu ujiyi wa midimo ya maluholo agasue, ha gutshita jiphula . . . nu midimo ya maluholo agasue.’ Yajiya gukhala egi Besalele wakhalele mujiya gutshita midimo iko; uvi gima giamukuatesele ha guyikalagala muabonga gidi nyuma ya Nzambi. Yakuatesele nji Oholiaba. Besalele nu Oholiaba akotelesele kiawaha ujiyi ahetele, handaga atshitshile midimo yawo muabonga sha, alongesele nji athu ako luholo lua gukalagala midimo yene. Yadiago, Nzambi waahuile ndunge jia gulongesa athu ako.
(Guzoga 36:1, 2, NWT) “Besalele watshitshile mudimo nu Oholiaba nu athu agasue akhalele mujiya mudimo muabonga, anyi Yehowa ahanele ndunge nu ujiyi wa gukalagala midimo ya maluholo agasue mu mudimo wa gijila, gifua luholo luaawambelele Yehowa.” 2 Moize watamegele Besalele nu Oholiaba nu athu agasue akhalele mujiya mudimo muabonga, anyi Yehowa wahanele jindunge nu mitshima yawo yakhalele guaatuma ha gudihana ha gutshita mudimo.
w11-F 15/12 diyiji 19 par. 7
Nyuma ya Nzambi Yakuatesele Akombeledi Enji a mu Tangua Dikulu
7 Gima giko gidi gutumonesa egi Besalele nu Oholiaba atuamezewe gudi nyuma ya Nzambi gidi egi, ima yakalegele ene yashiphile ivo yavula. Ivo 500 gungima, enya Isalele alanduile gukalegela ima yene. (2 Gudi. 1:2-6) Besalele nu Oholiaba akhalelego gifua atshitshi a midimo a mangino, handaga ana sonega majina awo gu ima yana kalagala ene. Ahanele lutumbu luagasue gudi Yehowa mukunda nu ima akalegele.—Guz. 36:1, 2.
Kamba Ndaga Jiko jia Ndando jia mu Nyuma
(Guzoga 35:1-3, NWT) Moize wabungishile enya Isalele agasue, wawambelele egi: “Talenu ndaga jidi mutshigina Yehowa egi mukalagale: 2 Mbamutshita mudimo masugu asamano, uvi lusugu lua sambadi mbalukhala lusugu lua gijila gudi enue, lusugu lua guhuluguga lua gujidigiwa gudi Yehowa. Muthu mbawutshita mudimo mu lusugu luene, mbawushiyiwa. 3 Mu lusugu lua guhuluguga, mushigo naye gulemesa tshuya mu jinzo jienu.”
w05-F 15/5 diyiji 23 par. 14
Kamba Gujiya Njila jia Yehowa
14 Khala musha ima ya mu nyuma ha fundo dia thomo. Enya Isalele akhalelego naye gubemba egi midimo yawo nu ndaga jiawo jiko jiawunganese matangi mu ima ya mu nyuma. Luko, akhalelego naye gudihana ha gukamba phamba ima yawo. Yehowa watombele lusugu lumoshi mu phoso, walubuishile lua gijila. Lusugu luene luakhalele phamba mukunda nu gukombelela Nzambi wa giamatshidia. (Guzoga 35:1-3; Lutango 15:32-36) Uvi akhalele naye nji guzula tangua dia guya givo nu givo mu gudibungisa guakoma. (Levi 23:4-44) Masugu ene akhalele guahana luendu lua gutangigiza ndaga jia gushimana jiakalegele Yehowa, lua guwunguluga njila jienji nu gumuhana mersi mukunda nu ndaga jienji jiagasue jiabonga. Enya Isalele akhalele mumonesa egi adi agujinginyina gudi Yehowa; ngenyi, yakhalele guatuma ha gumuvila luko woma nu gumuzumba nu ha guwenda mu njila jienji. (Mikhuala 10:12, 13) Malongo awa a Yehowa adi nji nu ndando mangino gudi akombeledi enji.—Hebelu 10:24, 25.
(Guzoga 35:21, NWT) Athu agasue akhalele nu matangi abonga ajile nu misomonyi yawo gifua muadivile ene ha guyihana gudi Yehowa, mukunda nu gulondela tenta dia gitageneno, nu ima yagasue yakhalele mutoga ha gutshita mudimo nu milele ya gijila.
w00-F 1/11 diyiji 29 par. 1
Khadilo dia Guhana Diana Gubata Gusuanguluga
Tangiza gale luholo enya Isalele akhalele gudivua. Akhalele mu uhiga wakola ivo yavula, akhalelego nu ima. Uvi mu tangua edi, akhalelego luko ahiga, akhalele nji nu ima yavula. Luholo lutshi akhalele naye gudivua ha guzula ndambo ya ima yawo ha guhana Yehowa? Akhalele naye nji gutangiza egi ima yene yakhalele yawo, ajiyilego guyihana. Uvi tangua diaatogele Moize ha guhana musomonyi ha gukuatesa gikombelelo gia giamatshidia, ayihanele nu mutshima umoshi! Abuitshilego mutshima egi Yehowa waakuatesele ha guheta ima yene. Hene, ahanele utadi wa siliva nu utadi wa wolo nu shitu jiawo jiavula sha. Biblia idi muzuela egi ‘akhalele nu matangi abonga,’ ayihanele nu ‘mutshima umoshi’ gifua muadivile ene ha guyihana. Yakhalele diago ‘misomonyi yahanewe gudi Yehowa nu mutshima umoshi.’—Guzoga 25:1-9; 35:4-9, 20-29; 36:3-7.
OCTOBRE 26–NOVEMBRE 1
UMONYI UDI MU MBIMBI YA NZAMBI | GUZOGA 37-38
“Iwotshielo ya Inzo ya Tenta nu Midimo Yayo mu Gikombelelo gia Giamatshidia”
(Guzoga 37:25) Walondele giwotshielo gia uhafu nu mabaya a mutshi wa akiasia. Guleha nu gukoma guagio guakhalele gua guditela khanda nu khanda. Mutalo wagio wakhalele wa 1 metre. Mbinga jiagio jiakhalele jia gukuategena nu giwotshielo.
it-1-F diyiji 230 par. 1
Giwotshielo
Giwotshielo gia uhafu. Giwotshielo gia uhafu (giakhalele mutamegewa nji egi “giwotshielo gia utadi wa wolo” [Guz 39:38]) gialondewe nu mabaya a mutshi wa akasia. Gitshinyi gia gosa nu itshinyi ya mu mbambe yakhalele ya gukula utadi wa wolo. Giwotshielo giene giakhalele gukoma 44,5 santimetre uvi guleha 89 santimetre. Giakhalele nji nu “mbinga” gu khomo jiagasue nguana. Giakhalele nu tuzeya nguana tua utadi wa wolo: khanda iko tuyadi, uvi khanda iko tuyadi. Akhalele munginyisa tumitshi tua akasia moshi ha gubatela giwotshielo giene. Tumitshi tuene tuakhalele tuagukula utadi wa wolo. (Guz 30:1-5; 37:25-28) Akhalele muwetshia uhafu wa ndando ha giwotshielo giene iphungu mbadi mu lusugu, mu gimenegena nu mu ngueze. (Guz 30:7-9, 34-38) Gifua luholo akhalele mukalegela ima iko ha guwetshiela uhafu matangua ako, Biblia idi mumonesa egi akhalele nji mukalegela giwotshielo gia uhafu. (Levi 16:12, 13; Heb 9:4; Yat 8:5; fuanesa nu 2 Gudi 26:16, 19.) Mu inzo ya tenta, giwotshielo gia uhafu giakhalele gutuama dia rido yakhalele mukhaphumuna fundo dia gijila nu Fundo dia Balega Gijila. Biblia idi muzuela luko egi giakhalele ‘gutuama dia mushete wa gikotelo.’—Guz 30:1, 6; 40:5, 26, 27.
(Guzoga 37:29, NWT) Walondele nji maji a gijila a gumba athu ha mito, nu uhafu wabonga wa vumba diawaha, ayibungishile muabonga diago.
it-1-F diyiji 756 par. 7
Uhafu
Uhafu wa gijila wahagewe ha gukalegela mu inzo ya tenta mu mavu a luselenga, wakalegewe nu ima ya ndando yavula inyi yahanele enya Isalele. (Guz 25:1, 2, 6; 35:4, 5, 8, 27-29) Yehowa walezele Moize ima nguana akhalele naye gubungisa ha gukalagala uhafu wene. Wamuwambelele egi: ‘Zula mananashi awa: mamboso a stakite, onike, galabanume ya vumba diawaha, nu uhafu waphega ushigo wagubungisa nu ima iko. Guvula gua ima eyi yagasue gudi naye gukhala gua gutela. Udi naye guzula ima eyi yagasue, ulonde nayo uhafu wabonga gifua mudi mulondji wa mananashi mulonda ima yenji. Ukhale wagumbiwa mungua, ukhadigo wagufutula nu gima giko, ukhale wa gijila. Udi naye gukhukha gitshinyi giko gia uhafu, uwuhage gutuama dia mushete wa gikotelo mu tenta dia gitageneno, fundo mbangutagana nu aye. Uhafu wene udi naye gukhala wabalega gijila gudi athu ami.’ Ha gumonesa egi uhafu wene wakhalele gima gia gijila, Yehowa wazuelele luko egi: ‘Muthu wagasue mbawukalagala uhafu wa luholo elu ha gusuanguluga nu vumba diawo, udi naye gushiyiwa.’—Guz 30:34-38; 37:29.
(Guzoga 38:1) Besalele walondele giwotshielo dia gukondela milambu. Wagilondele nu mabaya a mitshi ya akasia. Guleha nu gukoma guagio guakhalele gua guditela: 2 metre, 50 santimetre khanda nu khanda. Mutalo wagio wakhalele 1 metre, 50 santimetre.
it-1-F diyiji 229 par. 6
Giwotshielo
Iwotshielo ya mu Inzo ya Tenta. Tangua diatungiwe inzo ya tenta, Yehowa walezele enya Isalele luholo akhalele naye gulonda iwotshielo mbadi. Giwotshielo gia gukondela milambu (giakhalele nji mutamegewa egi “giwotshielo gia utadi wa mabengedi” [Guz 39:39]), giakalegewe nu mabaya a mitshi ya akasia. Giakhalele gifua mushete, giakhalele gia uhululu goshi, giakhalelego nji nu gitshuigilo. Guleha nu gukoma guagio guakhalele gua guditela: 2,20 metre. Mutalo wagio wakhalele 1,30 metre. Giakhalele nji nu “mbinga” gu khomo jiagasue nguana. Giakhalele gia gukula utadi wa mabengedi. Akhalele muhaga gima gia guwetshiela holu, “goshi” nu “hakatshi.” Giakhalele nu tuzeya nguana: khanda imoshi tuzeya mbadi, khanda iko tuzeya mbadi. Akhalele munginyisa tumitshi tua akasia moshi’a tuzeya tuene ha gubatela giwotshielo giene. Tumitshi tuene tuakhalele tuagukula utadi wa mabengedi. Yajiya gukotelesa egi, akobuele gu khanda jiagasue mbadi jia giwotshielo ha gunginyisa tuzeya tuene. Enya ndunge avula ana zuela ndaga jia gudisha mukunda nu tuzeya tuene. Avula mukatshi diawo ana zuela egi, guakhalele nu tuzeya tua maluholo mbadi. Mu tuzeya tua luholo lua mbadi, muene akhalele munginyisa mitshi ha gubatela giwotshielo giene. Luko, egi tuzeya tuene tuahagewe hanze gu muila wa giwotshielo giene. Akalegele nji ima iko nu utadi wa mabengedi, gifua: malonga, phano jia gumbila uto, malonga a guzanguila mahatshi a shitu, somo jia guzanguila mbiji, nu ikalengelo.—Guz 27:1-8; 38:1-7, 30; Lutang 4:14.
Kamba Ndaga Jiko jia Ndando jia mu Nyuma
(Guzoga 37:1) Besalele walondele Mushete wa Gikotelo nu mabaya a mutshi wa akasia. Guleha guakhalele gua 1 metre, 25 santimetre. Gukoma guawo nu mutalo wawo yakhalele luholo lumoshi: 75 santimetre.
(Guzoga 37:10) Besalele walondele mesa nu mabaya a mutshi wa akasia. Guleha guawo guakhalele gua 1 metre, gukoma guawo guakhalele 50 santimetre, mutalo wawo wakhalele 75 santimetre.
(Guzoga 37:25) Walondele giwotshielo gia uhafu nu mabaya a mutshi wa akiasia. Guleha nu gukoma guagio guakhalele gua guditela khanda nu khanda. Mutalo wagio wakhalele wa 1 metre. Mbinga jiagio jiakhalele jia gukuategena nu giwotshielo.
it-1-F diyiji 34 par. 5
Mutshi wa Akasia
Thango jia mitshi ya akasia jiakhala nu miya yaleha, jiana gudimuanga. Jiana gudilanga nu thango jia mitshi iko ya akasia idi hehi, jiana gubua vunda diakoma. Gishina giene, tangua Biblia yana zuelela mitshi yene, yana kalegela mbimbi shittim ha gumonesa egi idi muzuelela mitshi yene yavula, uvi ndo umoshi-umoshi. Mutshi wa akasia wajiya guleha gitala 6 uu nu 8 metre. Uvi matangua avula, wana sangewa thango jienji jiadimuangi gale. Mayiji awo akhala gifua sala jia tunjila, ala lebe-lebe. Wana zola yaji ya vumba diabonga ya mukubu wa jaune. Mabundu enji akhala mukatshi dia gizula. Gizula gia mutshi wene giakhala giabuita, giakola sha. Tunjinji tuajiyilego gungina ha guwudia. Luholo mutshi wene wakhalele wakola nu wene phamba wakhalele mu mavu a luselenga, idi gutukuatesa ha gumona gishina enya Isalele awukalegele ha gutungila inzo ya tenta nu ima yakhalele mu inzo yene. Awukalegele ha gulondela mushete wa gikotelo (Guz 25:10; 37:1), nu mesa a mapha a gijila (Guz 25:23; 37:10), nu iwotshielo (Guz 27:1; 37:25; 38:1), nu tumitshi tua gubatela ima eyi (Guz 25:13, 28; 27:6; 30:5; 37:4, 15, 28; 38:6), nu makunji a guhagela rido (Guz 26:32, 37; 36:36), nu makunji a guhagela inzo ya tenta (Guz 26:15; 36:20) nu mitandala (Guz 26:26; 36:31).
(Guzoga 38:8) Besalele walondele longa diakoma nu gihagelo gia longa diene nu utadi wa mabengedi. Wagilondele nu nganza jia akhetu akhalele mutshita mudimo gu ginginyino gia tenta dia gitageneno.
w15-F 1/4 diyiji 15 par. 4
Wana guyijiya ba?
Nganza jia mangino jidi jia gudisha nu jia mu tangua dikulu, handaga matangua avula akhelele gujikalagala nu utadi wa tshiuya ula diadiadia, nu bronze. Uvi akhalele nji gujikalagala nu utadi wa siliva, wa wolo nu utadi wa mabengedi. Biblia idi muzuelela nganza giphungu gia thomo tangua enya Isalele akhalele mutunga inzo ya tenta, fundo dia thomo dia gukombelela. Akhetu ahanele nganza jiawo mukunda nu gulondela longa dia gijila dia utadi wa mabengedi nu gihagelo gia longa diene. (Guzoga 38:8) Yajiya gukhala egi, ambile nganza jiene ha tshiuya hagula jizoze mukunda nu gulondela ima yene.