Mihu Yana Guhula Athu Ana Gutanga Mikanda Yetu

Temue wa Yehowa wajiya gukalegela ba site Internet ha gukamba yala nga mukhetu ha gudizula nenji mu ulo ba?

Yehowa wana tshigina egi athu mbadi adizudile gale mu ulo akhale nu gusuanguluga nu akhale nu ufuta wakola mu ulo wawo mayilago. (Mat. 19:4-6) Gula udi mutshigina gudizula mu ulo nu yala nga nu mukhetu, luholo lutshi wajiya guheta muthu wabonga? Luholo Yehowa adi mufugi wetu, muene udi mujiya ndaga tudi naye gukalaga ha gukhala nu gusuanguluga mu ulo wetu. Hene gula udi mulandula malongo ana gutuhana, mbawukhala diago nu gusuanguluga. Tutadilenu malongo ako adi mukatshi dia malongo ene.

Thomo, tudi naye gujiya egi: ‘Mutshima wa muthu wanahuiga gubalega ima yagasue, udi wabola diago.’ (Yel. 17:9) Gula athu mbadi adi mutshigina gudizula mu ulo adi gudimona mahugo avula, guzumba guajiya gukula muphushi mu mitshima yawo. Ngenyi yajiya gukhala lamba ha guzula desizio diabonga. Gula athu azula desizio dia gudizula mu ulo phamba mukunda nu guzumba gua luholo elu, mbaakhadigo nu gusuanguluga mu ulo wawo. (Ish. 28:26) Gishina giene gula athu mbadi adi mukangula mitshima yawo yagasue ha gudimonesa egi ana gudizumba nu adi gudilaya ndaga gutuama egi adijiye muabonga, ashigo mumonesa gutema nga hazonda.

Mukanda wa Ishima 22:3 udi muzuela egi: ‘Muthu watema wana gumona gingonza adi suegi, uvi muthu waheya wanaya tuwa-tuwa nu wana tagana nu malamba.’ Na gukalegela ba site Internet ha gukamba muthu ha gudizula nenji mu ulo idi nji gingonza ba? Ndaga ya gikenene idi egi athu ako asendesele guta maga nu athu anyi akhalelego mujiya mu Internet, asendesele nji gudizumba nawo. Uvi gungima ajile mukotelesa egi athu ene akhalele guahuiga. Athu awa abola ana kangula nji ba compte a mambo mu Internet ha gudimba athu ashigo guajiya nu ha guakuya mbongo. Matangu ako, athu awa abola anamba mambo egi adi Matemue a Yehowa.

Tutadilenu gingonza giko tuajiya gutagana nagio. Ba site Internet ako ana kalegela ba programe ha gujiya gula athu mbadi ajiya gudizula mu ulo nga ndo. Uvi gushigo nga ndaga imoshi idi mumonesa egi ba metode ene akhala diago abonga. Hene gula tudi musha mutshima egi ba programe a luholo elu akalegewe gudi athu ajiya gutukuatesa ha guzula desizio dia ndando dia gutomba muthu tudi naye gudizula nenji mu ulo, ishigo gutema nga hazonda. Programe eji jia Internet jiajiyilego gukhala luholo lumoshi nu malongo a Biblia.—Ish. 1:7; 3:5-7.

Longo didi mu mukanda wa Ishima 14:15 didi muzuela egi: ‘Muthu waheya wana tshigina ndaga jiagasue ana gumuwambela, uvi muthu watema wana gudikengelela tangua adi muwenda.’ Gutuama dia guzula desizio dia gudizula nu muthu mu ulo, udi naye thomo gumujiya muabonga. Uvi gula udi muta nenji maga phamba mu Internet yajiya gukhala lamba ha gula umujiye muabonga. Yajiya gukhala egi udi mujiya ndaga jiko jiamutadila nga ndo muana balegesa nenji tangua diavula mu Internet ha guta maga, wajiya guzuele egi wamujiya diago muabonga ba? Athu ako akhalele mutangiza egi aheta diago muthu wabonga ajiya gudizula nenji mu ulo, uvi tangua ajile mutagana nu muthu muene fundo dimoshi, yakhalelego luholo akhalele mutangiza.

Muyimbi wa ngimbo wazuelele egi: ‘Ngana kuata ndo ufuta nu enya mambo. Ngana tuna athu ana suega makalegelo awo.’ (Ngi. 26:4) Athu ako ana tangiza egi gusonega nga guhaga ndaga jia mambo ha profil jiawo ha gumonesa athu ako egi adi athu abonga ishigo ndaga yabola. Ajiya gusuega makalegelo awo abola ngenyi athu ajiyilego guamona tangua adi muta nawo maga. Gula muthu tudi muta nenji maga watuwambela egi udi Temue wa Yehowa, tuajiya gudihula mihu eyi ya ndando: Muthu muene wabatijiwe gale ba? Udi Muklisto wa gukula mu nyuma ba? Udi nu ufuta wakola nu Yehowa ba? Aphangi ana gumunesa mu hungu ba? Wana kalagala ndaga jiabola nga ndo udi ‘futa diabola’ ba? (1 Kol. 15:33; 2 Tim. 2:20, 21) Ha gutadila ndaga Biblia yana zuela, ashigo nga nu ndaga imoshi idi gumukanga njila ha gudizula mu ulo nu muthu mumoshi ba? Udi naye gukamba guheta mvutu ya mihu eyi, uvi yajiya gukhala lamba ha guyiheta gula watelego maga nu aphangi adi mujiya muthu muene muabonga. (Ish. 15:22) Muthu udi wa gujinginyina gudi Yehowa ajiyilego gutangiza ha gudizula mu ulo nu muthu yonu ashigo mulandudi wa Yesu.—2 Kol. 6:14; 1 Kol. 7:39.

Tuakotelesa egi idi gingonza ha gukamba muthu wa gudizula nenji mu ulo mu ba site Internet. Uvi gudi nu maluholo abonga tuajiya gukamba muthu wa gudizula nenji mu ulo nu ha gumujiya muabonga. Gui wajiya guheta muthu wabonga wa gudizula nenji mu ulo? Tangua tuana khala nu luholo lua gudibungisa fundo dimoshi, Matemue a Yehowa ana gudijiya nu athu ako mu gudibungisa gua mu hungu, gu ba asamble nu mu gudibungisa guko.

Uvi gula tushigo nu luholo lua gudibungisa hamoshi, gifua mu sungi ya misongo ya Coronavirus, tuana kalegela ba telefone nga ba ordinater ha gutshita gudibungisa gua mu hungu. Mu gudibungisa guene, wajiya gudijiya nu aphangi adi khenji adizudile gale ndo mu ulo. Wajiya guategelela tangua adi mukalagala ba diskur nga tangua adi muhana ba komantere. (1 Tim. 6:11, 12) Gula hungu dienu diana kalegela application gifua zoom ha gukalagala gudibungisa, wajiya gungina mu salle de répartition ha guta nawo maga gungima dia gudibungisa. Ikhale mudi mukagala gudibungisa mu njila ya Internet, wajiya gumona luholo muthu muene adi mukalegela aphangi ako ndaga mu hungu, ngenyi wajiya gukotelesa muabonga makalegelo enji. (1 Phet. 3:4) Gungima gula wajiya muthu muene muabonga, wajiya gukotelesa gula mudi nu mafelela a luholo lumoshi nu gula enue muyadi muajiya gudizula mu ulo.

Gula phangi udi khenji adizudile gale ndo mu ulo udi mukalegela malongo a Biblia ha gumukuatesa ha gukamba muthu wa gudizula nenji mu ulo, mbawukhala nu gusuanguluga mu monyo wenji. Mbawukhala gifua luholo mukanda wa Ishima udi guyimonesa egi: ‘Muthu waheta mukhetu [nga yala] wabonga, waheta gima giawaha. Idi mumonesa egi Yehowa wana gumutshigina.’—Ish. 18:22.