Yala nu Mukhetu Akhale Agudijinginyina mu Ulo

Yehowa wana gututoga egi tutshigine khadilo dia ‘gudijinginyina’. (Mika 6:8) Ujinginyini udi lume nu ndando mu ulo, gula ushiko, luholo lua gudishila mutshima gushiko. Hagula egi guzumba gukole, mudi naye gudishila mutshima.

Mangino idi yakola hagumona ujinginyini mu mawulo. Hagula mubambe ulo wenu, kalegelenu milonga mbadi eyi yalandula.

1 HAGENU ULO WENU HAFUNDO DIATHOMO

BIBLIA YAZUELA EGI: ‘Jiyenu gutomba ndaga jia balega gubonga.’ (Filiphi 1:10) Ulo wenu udi mukatshi dia ima yabalega ndando mu monyo wenu. Udi gima giaguhaga hafundo diathomo.

Yehowa watshigina egi udihane gua mulumi’aye nga mukaji’aye nu ‘musuanguluge nu monyo’ muyadi. (Mulongeshi 9:9) Wamonesa haphelo egi, ushiko nu giagumubemba luholo luene, uvi kalagala yagasue hagumusuanguluisa. (1 Kolinto 10:24) Kalagala yagasue egi mulumi’aye nga mukaji’aye adive egi wana gumuzumba.

GIMA WAJIYA GUKALAGALA:

• Khala gubalegesa tangua fundo dimoshi nu mulumi’aye nga mukaji’aye, mutegelele nu mutshima umoshi

• Mu matangi aye, jiya egi mudi athu “muyadi”, ushiko “hakhaye”

2 BAMBA MUTSHIMA WAYE

BIBLIA YAZUELA EGI: “Muthu yagasue watala mukhetu muko nu ngina ya gukhala n’enji muene wadiangi gale guwenda n’enji uthambi mu mutshima wenji.” (Matayo 5:28) Gula muthu umutangiza tangua diagasue milonga ya sonyi, yajiya gumonesa egi ashiko wagujinginyina gua mulumi’enji nga mukaji’enji.

Yehowa wazuela agi “tema mu muho uwudi mumba matangi.” (Ishima 4:23; Yelemiya 17:9) Hene, tema mu muho uwudi gukalegela meso aye. (Matayo 5:29, 30) Teta Yobo, wadilogele egi ajiyileko kutala muvuala wamukhetu nu matangi agukalagala n’enji uthambi. (Yobo 31:1) Zula desizio yagutuna gutala pornografi (mutshianga). Koka ufuta wagasue wajiya gugutuameza mu uthambi.

GIMA WAJIYA GUKALAGALA:

• Monesa haphelo gua athu agasue egi, wana guzumba mulumi’aye nga mukaji’aye

• Dihage hafondo dia mulumi’aye nga mukaji’aye, bemba ufuta wagasue ushiko gumusuanguluisa