Luholo Lua Guheta Guhuima nu Enya Fami

Ulo wana guzola fami iko. Udi naye guzumba shaye nu ginaye, jiya egi mulumi’aye nga mukaji’aye udi muthu waye wathomo hamavu. Aphangi’aye ako ajiya gukhala nu lamba hagutshigina mulonga wene. Uvi mikhuala ya Biblia yajiya gugukuatesa hagutadila mulonga wene muabonga, haguheta guhuima nu aphangi’aye agasue, nu hagudivua muabonga nu mulumi’aye nga mukaji’aye.

1 KHALA NU MATANGI ATAGANA GUDI ENYA FAMI YAYE

BIBLIA YAZUELE EGI: “Unemese sh’aye nu gin’aye.” (Efeso 6:2) Udi naye gunemesa shaye nu ginaye, ata wakula luholo lutshi. Jiya egi mulumi’aye nga mukaji’aye udi nji mona, udi naye gunemesa mvuaji jienji. ‘Guzumba gushigo nu fuwa [giphi],’ Udisagesago hagumona luholo mulumi’aye nga mukaji’aye adi gudizumba nu mvuaji jienji.​—1 Kolinto 13:4; Galatiya 5:26.

GIMA WAJIYA GUKALAGALA:

• Bemba zuelelo dia bola gifa: “Enya fami yaye ana gungusegulula tangua diagasue” nga “Ginaye wana tshiginago ata hazonda ndaga ngana kalagala”

• Dihage hafundo dia mulumi’aye nga mukaji’aye

2 WAJIYA GUTUNA NDAGA JIKO

BIBLIA YAZUELA EGI: ‘Yala mbawubemba she’nji nu gin’enji, mbawuya mudibungisa nu mukaji’enji. Muyadi wawo tshima mbabua muthu mumoshi.’ (Gisendeselo 2:24) Gila muadibungisa mu ulo, mvuaji jiaye jiajiya gutangiza egi adi naye gu gutuameza, ajiya luko gudinginyisa mu ulo wenu.

Yala nu mukhetu adi naye guleza mvuaji jiawo nu gutema guagasue egi gudi milonga iko ishigo guatalela. Muajiya gualeza matangi enu haphelo uvi nu gunemesa guagasue. (Ishima 15:1) Gudibulumuisa nu gutuluga nu guhuiminyina mba gumikuatesa hagudivua muabonga nu enya fami jienu, hagula “mudikuatese nu guzumba.”​—Efeso 4:2.

GIMA WAJIYA GUKALAGALA:

• Gila watangiza egi enya fami ana gudinginisa gubalega mu ulo wenu, kamba tangua diabonga dia guizuelela nu mulumi’aye nga mukaji’aye

• Divenu muluholo lua gutadila mulonga wene