Luholo Lua Gumanesa Malamba

Mu maulo agasue yala nu mukhetu ana guheta malamba avula. Malamba ene ajiya gumizogela mu gudisha guenu gua matangi nu luholo muthu nu muthu ana gumonela milonga nu gutadila lujingu (monyo). Athu ako ajiya nji gumizolela malamba; uvi malamba ako ajiya gukatuga gumilonga mushigo gutangiza.

Matangua ako wajiya gukalagala gifua gushiko nu gima giakola ndo, uvi Biblia idi gututuma hagulua nu malamba. (Matayo 5:23, 24) Gila mudi gukalegela mikhuala ya Biblia mba mujiya luholo luabonga luagumanesela malamba enu.

1 ZUELELENU MULONGA WENE

BIBLIA YAZUELA EGI: ‘Gudi . . . nu tangua dia guzuela.’ (Mulongeshi 3:1, 7) Zuelelenu ndaga mudi najio mu tangua diatagana. Leza mulumi’aye nga mukaji’aye giamatshidia luholo udi gudivua nu matangi aye gu ndaga yene. Tangua diagasue “zuela ndaga jia giamatshidia” gua mulumi’aye nga mukaji’aye. (Efeso 4:25) Ata mulonga wene udi gumihana khabu, ukandugisa ndo mbimbi gila athu adi mumana. Mvutu (kueteya) yatuluga yajiya gumanesa matululu.​—Ishima 15:4; 26:20.

Ata ushiko gutshigina matangi a mulumi’aye nga a mukajiaye mumonesele gisemo, ujimbilako egi udi naye gumuzumba nu gumunemesa. (Kolosai 4:6) Kalagalenu yagasue hagumanesa mulonga wene muphushi, mubembiko guta maga.​—Efeso 4:26.

GIMA WAJIYA GUKALAGALA:

• Tomba tangua diabonga dia guzuelela mulonga wene

• Gula mukuenu umuzuela mutegelele, umukokiko mbimbi. Gungima, wajiya guzuela

2 TEGELELA UKUATE GISHINA

BIBLIA YAZUELA EGI: ‘Mudizumbe mukatshi dienu . . . khadienu athu athomo hagunemesa akuenu.’ (Lomo 12:10) Luholo luaye luagutegelela ludi nu ndando yavula. Kalagala ngolo hagujiya matangi a mulumi’aye nga mukaji’aye nu ‘giphangi giagasue . . . nu gudibulumuisa.’ (1 Phetelo 3:8; Yakoba 1:19) Ukalagalako gifa umutegelela. Gila udi mukalagala mudimo uko, wajiya guubemba hagutegelela mulumi’aye nga mukaji’aye muabonga, nga gumuhula gila muajiya guzuelela mulonga wene tangua diko. Gila wamona mulumi’aye nga mukaji’aye gifa asosie waye, ushiko ‘gukuata jikhabu mu phushi.’​—Mulongeshi 7:9.

GIMA WAJIYA GUKALAGALA:

• Tegelela nu matangi aye agasue, nga mbimbi yene udiguvua ishiko gugusuanguluisa

• Ulandulako phamba mbimbi, kamba gujiya itshi atshigina guzuela diago. Landula muabonga zuelelo dia mulumi’aye nga mukaji’aye

3 IMONESE MU MAKALEGELO

BIBLIA YAZUELA EGI: “Muthu udi mutshita mudimo mbawuheta gishimbigo, uvi udi muditumbiga hashi khuta guzuela, mbawukhala phutu.” (Ishima 14:23) Musugiko phamba gudivua mu luholo luagumanesa mulonga. Uvi kalegelenu lume luholo muadivi mu desizio yenu. Yajiya gumilomba mudimo wavula nu ngolo jiavula, uvi idi nu ndando yavula. (Ishima 10:4) Gila yala nu mukhetu adi mukalagala milonga hamoshi mba aheta “gubonga” gu mudimo wawo.​—Mulongeshi 4:9.

GIMA WAJIYA GUKALAGALA:

• Divenu luholo muthu nu muthu wajiya gukalagala kapho dienji hagumanesa mulonga wenu

• Tangua diagasue tadilenu gila mudi muya gumatuamena