LONGO DIA 46
Yehowa Wana Gutukuatesa ha Gukolesela nu Gusuanguluga
‘Yehowa udi munengenena nu guhuiminyina guagasue ha gumimonesela mutshima wabonga, mbawumivila nji khenda.’—YESH. 30:18.
LUNGIMBO 3 Nzambi udi ngolo jiami, Felela Diami, Gutshigina Guami
NDAGA JIDI MU LONGO EDIa
1-2. (a) Mihu itshi tuza mutadila? (b) Itshi idi mumonesa egi Yehowa udi nu nzala yakola ya gutukuatesa?
YEHOWA wajiya gutukuatesa ha gukolesela mu malamba tudi mutagana nawo nu ha gukhala nu gusuanguluga mu mudimo wenji. Mu maluholo atshi Yehowa wajiya gutukuatesa? Luholo lutshi tuajiya guheta gubonga mu ukuateshi wene? Tuza muheta mvutu mu longo edi. Uvi gutuama dia guzuelela ndaga yene, tutadilenu thomo muhu owu: Yehowa wana tshigina diago gutukuatesa ba?
2 Tuajiya guheta mvutu ya muhu owu mu mbimbi jiakalegele Phaula mu mukanda wasonegele muene gudi enya Hebelu. Wasonegele egi: “Yehowa udi mukuateshi wami; mbangushigo muvua woma. Itshi muthu wajiya gungutshita?” (Heb. 13:6) Mukanda umoshi wana kotelesa Biblia udi mumonesa egi mbimbi “mukuateshi,” idi mumonesa muthu udi muzula phushi ha guya mukuatesa muthu udi mukaluluga ha gukamba ukuateshi. Tangiza gale luholo Yehowa wana guya muphushi ha gukuatesa muthu udi mu lamba. Ndaga eyi idi mumonesa egi Yehowa wana khala hehi nu udi nji nu nzala yakola ya gutukuatesa. Tuajiya gukolesela mu malamba tudi mutagana nawo handaga Yehowa udi nu esue.
3. Tanga maluholo thathu Yehowa wana gutukuatesa ha gukolesela mu malamba nu gusuanguluga.
3 Mu maluholo atshi Yehowa wana gutukuatesa ha gukolesela nu gusuanguluga? Ha guheta mvutu, tutadilenu mukanda wa Yeshaya. Mukunda natshi? Handaga profesi jiavula jinyi Yehowa wawambelele Yeshaya ha gusonega, jidi mutadila akombeledi a Yehowa mangino. Yeshaya wakalegele mbimbi jialeba ha guzuelela Yehowa. Ha gufezegesa, tutadilenu Yeshaya mukhapho 30. Yeshaya udi mukalegela ifezegeselo yabonga idi mumonesa luholo Yehowa wana kuatesa akombeledi enji. Wasonegele egi, Yehowa wana gutukuatesa (1) tangua diana gututegelela muene muabonga nu guhana mvutu gu isambu yetu, (2) tangua diana gututuameza muene, nu (3) luholo luana gutukalegela muene ndaga jiabonga mangino nu jinyi mbawutukalegela mu masugu adi muza. Tutadilenu muabonga maluholo ene thathu Yehowa wana gutukuatesa.
YEHOWA WANA GUTUTEGELELA
4. (a) Luholo lutshi Yehowa wakhalele mutadila enya Yuda tangua Yeshaya wakhalele nu monyo? Ndola itshi Yehowa waahanele? (b) Felela ditshi Yehowa wahanele akombeledi enji a gujinginyina? (Yeshaya 30:18, 19)
4 Mu gisendeselo gia Yeshaya mukhapho 30, Yehowa udi mutamega enya Yuda egi ‘ana a mito yakola,’ adi ‘mulunda gubola holu dia gubola.’ Udi muzuela luko egi: ‘Adi athu ana lumbuga, . . . adi mutuna gutegelela mikhuala ya Yehowa.’ (Yesh. 30:1, 9) Yeshaya wamonesele egi Yehowa mbawubemba egi enya Yuda atagane nu malamba handaga atunyile gumutegelela. (Yesh. 30:5, 17; Yel. 25:8-11) Ndaga yene yatagenesewe diago tangua enya Yuda abuile ahiga gu Babilona. Uvi athu ako mukatshi diawo, akhalele ya gujinginyina gudi Yehowa. Yeshaya waawambelele mbimbi jiaahanele luko felela. Wazuelele egi, gudi nu lusugu Yehowa mbawaavutula luko gu Isalele. (Tanga Yeshaya 30:18, 19.) Ndaga jiene jiatagenesewe diago. Yehowa waazolele mu uhiga. Uvi atshitshile ivo yavula gutuama dia guzoga mu uhiga wene. Mbimbi ‘Yehowa udi munengenena nu guhuiminyina guagasue ha gumimonesela mutshima wabonga’ jidi mumonesa egi, matangua avula akhalele naye gubalega gutuama egi Yehowa ahuluise akombeledi enji a gujinginyina. Enya Isalele atshitshile ivo 70 mu uhiga gu Babilona gutuama egi ako mukatshi diawo avutuge gu Yelusalema. (Yesh. 10:21; Yel. 29:10) Tangua akhalele gu Babilona akhalele mudila mukunda nu gikenene, uvi tangua avutugile mu gifutshi giawo azolele masoji a gusuanguluga.
5. Felela ditshi didi mu Yeshaya 30:19?
5 Mbimbi eji: “Muene mbawugumonesela diago mutshima wabonga tangua mbawudila ha gutoga ukuateshi,” jiana gutuhana diago gikhesa mangino. (Yesh. 30:19) Yeshaya udi mumonesa egi Yehowa mbawututegelela muabonga tangua mbatukhala nu funu ya ukuateshi. Mbawuhana nji mvutu muphushi gu isambu yetu. Yeshaya wazuelele luko egi: ‘Tangua mbadivua muene gudila guaye, mbawuguhana mvutu mbala imoshi.’ Mbimbi eji jidi gutumonesa egi tata wetu udi hehi, udi nji nu nzala yakola ya gukuatesa athu agasue ana gumukamba. Ndaga eji jidi gutukuatesa ha gukolesela nu gusuanguluga.
6. Luholo lutshi mbimbi jidi mu Yeshaya jidi mumonesa egi Yehowa wana tegelela isambu ya akombeledi enji agasue?
6 Ndaga itshi iko verse eyi idi gutulongesa mu ndaga yatadila isambu yetu? Yehowa wana tegelela muabonga isambu ya muthu wagasue. Mukunda natshi tuazuela ngenyi? Mu gitshinyi gia thomo gia Yeshaya mukhapho 30, akalegela mbimbi “mbangumivila” ha gumonesa egi Yehowa udi muzuelela athu avula. Uvi, mu verse 19 akalegela mbimbi “mbawugumonesela” ha gumonesa egi udi muzuelela muthu mumoshi. Yeshaya wasonegele egi: ‘Mbawudidigo luko’; ‘Muene mbawugumonesela diago mutshima wabonga’; ‘mbawuguhana mvutu.’ Yehowa udi tata wana gutuzumba muavula, gana wambelago an’enji adi aguleba muila egi: “Mudi naye gukhala nu ngolo gifua aphangi’enu.” Uvi wana gudisagesa mukunda nu muthu wagasue mukatshi dietu, wana tegelela nji muabonga isambu yetu.—Ngi. 116:1; Yesh. 57:15.
Itshi Yeshaya watshiginyile guzuela hazuelele muene egi: ‘Mubembelago [Yehowa] tangua dia guhuluguga’? (Tala paragrafe 7)
7. Luholo lutshi Yeshaya nu Yesu amonesele egi gukombelela muavula gudi nu ndando?
7 Yehowa wajiya gutuhana ngolo ha gukolesela tangua tudi gumuwambela mu gisambu ndaga jidi gutusagesa. Gula malamba etu ahuilego muphushi gifua luholo tudi gudifelela, tudi naye gutshita gisambu mbala jiavula ha gutoga Yehowa ngolo jia gukolesela. Ndaga jiazuelele Yeshaya jidi mumonesa egi Yehowa wana tshigina egi tukhale gumukombelela muavula. Wazuelele egi: ‘Mubembelago [Yehowa] tangua dia guhuluguga.’ (Yesh. 62:7) Idi mukotelesa itshi? Tudi naye gukombelela Yehowa tangua diagasue, ngenyi mbayikhala gifua tushigo gumubembela tangua dia guhuluguga. Mbimbi jia Yeshaya jidi gutuwuguluisa ifezegeselo yahanele Yesu mu ndaga yatadila gisambu, idi mu Luka 11:8-10, 13. Yesu udi mumonesa egi tudi naye gukombelela nu ‘gufubidila’ nu ‘gulandula gutoga’ nyuma ya Nzambi. Tuajiya nji gutoga Yehowa ha gutukuatesa hagula tuzule ba desizio abonga.
YEHOWA WANA GUTUTUAMEZA
8. Luholo lutshi mbimbi jidi mu Yeshaya 30:20, 21 jiatagenesewe mu tangua dikulu?
8 Tanga Yeshaya 30:20, 21. Tangua masuta a gu Babilona ajietele dimbo dia Yelusalema givo gimoshi nu ndambo, enya Isalele amonele malama avula diago. Gungima ajidile nu malamba ene. Mu verse 20 nu 21, Yehowa walayele egi gula abalumuna mutshima nu asombegesa makalegelo awo, mbawaakuatesa. Yeshaya watamegele Yehowa egi, “Mulongeshi Wakoma.” Walayele athu egi Yehowa mbawaalongesa ha gumukombelela mu luholo luana tshigina muene. Mbimbi jiene jiatagenesewe tangua enya Yuda azogele mu uhiga. Yehowa wakhalele diago Mulongeshi Wakoma mukunda nu ene. Waakuatesele ha guvutula gikombelelo gia giamatshidia. Tuana khala nu gusuanguluga handaga mangino Yehowa udi Mulongeshi wetu Wakoma.
9. Mu luholo lutshi Yehowa wana gutulongesa mangino?
9 Yeshaya udi muzuela mu verse jiene egi tudi gifua ana a khalasa adi mulongesewa gudi Yehowa mu maluholo mbadi. Thomo, Yeshaya udi muzuela egi: ‘Mbawumona Mulongeshi waye Wakoma nu meso aye.’ Mu gifezegeselo egi Yeshaya udi mumonesa egi mulongeshi udi ya gumagana gutuama dia ana a khalasa. Mangino tudi nu luendu lua gulongesewa gudi Yehowa. Luholo lutshi Yehowa wana gutulongesa? Wana gutulongesa mu njila ya ulondegi wenji. Tudi muhana mersi mukunda nu malongo organizasio wa Yehowa wana gutuhana! Tuana heta malongo ene mu gudibungisa gua mu hungu, gu ba asamble, mu mikanda yetu, mu JW Télédiffusion nu mu maluholo ako. Ima eyi yagasue yana gutukuatesa ha gukolesela nu gusuanguluga.
10. Mu luholo lutshi tuana guvua ‘mbimbi muzuela gungima’ dietu?
10 Yeshaya udi mumonesa luholo lua mbadi Yehowa wana gutulongesa. Udi muzuela egi: ‘Matshui aye mbaavua mbimbi muzuela gungima diaye.’ Profete udi mumonesa egi Yehowa udi gifua mulongeshi udi gungima dia ana a khalasa ha guatuameza mu njila adi naye guya. Luholo lutshi tuana guvua dijui dia Yehowa gungima dietu mangino? Mbimbi ya Nzambi yasonegewe ivo yavula yabalega gale, idi gifua gungima dietu. Hene tangua tuana tanga Biblia, yana khala gifua tudi mutegelela dijui dia Nzambi muzuela gungima dietu.—Yesh. 51:4.
11. Itshi tudi naye gutshita ha gukolesela nu gusuanguluga? Mukunda natshi?
11 Luholo lutshi tuajiya guheta gubonga mu malongo ana gutuhana Yehowa mu njila ya organizasio wenji nu mu Mbimbi yenji? Yeshaya udi muzuelela ndaga mbadi. Thomo, “njila yenyeyi.” Ya mbadi, ‘ilandulenu.’ (Yesh. 30:21) Tushigo naye phamba gujiya “njila” uvi tudi naye nji ‘guyilandula.’ Tuana longuga ndaga jiana gututoga Yehowa mu njila ya Biblia nu munjila ya mikanda nu video jiana zola organizasio wa Yehowa. Tuana longuga nji luholo lua gukalegela ndaga jiene. Hagula tukolesele nu gusuanguluga mu mudimo wa Yehowa, tudi naye gukalagala ndaga mbadi tuazuelela. Yehowa mbawutukuatesa phamba gula tudi mulonguga nu tudi mukalegela ndaga jiene.
YEHOWA WANA GUTUKUATESA
12. Ha gutadila Yeshaya 30:23-26, luholo lutshi Yehowa wakuatesele akombeledi enji?
12 Tanga Yeshaya 30:23-26. Luholo lutshi profesi eyi yatagesewe gudi enya Yuda anyi avutugile gu Isalele hazogele ene mu uhiga gu Babilona? Yehowa waahanele ima yavula nu waakuatesele ha gulandula gumukombelela. Waahanele nji ima yavula ya gudia. Ndaga yabalega ndando idi egi, waahanele ima yagasue akhalele nayo funu ha gukolesa ufuta wawo n’enji nu ha guvutula luko gikombelelo gia giatshimadia. Ima Yehowa wahanele akombeledi enji mu tangua diene yakhalele yavula gubalega ima akhalele naye thomo. Gifua luholo verse 26 idi guyimonesa, Yehowa waakuatesele ha gukotelesa muabonga mbimbi yenji. (Yesh. 60:2) Ndaga jiakalegele Yehowa jiakuatesele akombeledi enji ha gulandula gumukalegela nu ngolo nu gusuanguluga guagasue ‘handaga mitshima yawo yakhalele nu gusuanguluga.’—Yesh. 65:14.
13. Luholo lutshi profesi yana zuelela guvutula gikombelelo gia giamatshidia idi mutagenesewa mangino?
13 Profesi idi muzuelela guvutula gikombelelo gia giamatshidia idi nji gututadila esue mangino ba? Ayi! Mu luholo lutshi? Sendese mu 1919 G.Y.b athu avula azogele gale mu uhiga wa malongo a ikombelelo ya mambo. Ahetele gale fundo diabonga gubalega mavu Yehowa watendelele enya Isalele. Fundo diene didi phaladiso ya mu nyuma. (Yesh. 51:3; 66:8) Phaladiso ya mu nyuma idi itshi?
14. Phaladiso ya mu nyuma idi itshi? Akhuatshi ana khala mu phaladiso yene? (Tala Ukoteleshi wa Mbimbi.)
14 Sendese mu 1919 G.Y., athu ambiwe maji mu nyuma ana khala mu phaladiso ya mu nyuma.c Gungima “imeme iko” yakotelesa athu adi nu felela dia gujinga ha mavu anginyile nji mu phaladiso ya mu nyuma. Ahetele nji gubonga guavula.—Yone 10:16; Yesh. 25:6; 65:13.
15. Phaladiso ya mu nyuma yana khala gui?
15 Phaladiso ya mu nyuma yana khala gui mangino? Luholo akombeledi a Yehowa ana khala ha mavu a mudidi, phaladiso ya mu nyuma yana khala nji ha mavu a mudidi. Mangino ikhale fundo ditshi tudi mujinga, tuajiya gukhala mu phaladiso ya mu nyuma gula tudi mu gikombelelo gia giamatshia.
Itshi muthu wagasue mukatshi dietu udi naye gutshita ha gukhala nu gusuanguluga mu phaladiso ya mu nyuma? (Tala paragrafe 16-17)
16. Luholo lutshi tuajiya gulandula gutala gubonga gudi mu phaladiso ya mu nyuma?
16 Ha gulandula gukhala mu phaladiso ya mu nyuma, tudi naye gukalagala ndaga jiavula gifua gulandula gusuanguluga nu ulondegi wa Yehowa. Luholo lutshi tuajiya guyitshita? Tudi naye gulandula gutala makalegelo abonga a aphangi ha fundo dia gutala phamba makalegelo awo abola. (Yone 17:20, 21) Mukunda natshi idi nu ndando? Tutadilenu gifezegeselo egi: Tuana suanguluga gutala mitshi yabonga ya maluholo avula mu gishitu. Luholo lumoshi nji, tuana khala nu aphangi a gudisha mu mahungu etu anyi tuajiya gufuanesa nu mitshi ya maluholo avula. (Yesh. 44:4; 61:3) Tudi naye gutshita yagasue ha gulandula gutala phamba gubonga gua “gishitu” ha fundo dia gutala “mitshi” yahengelela idi hehi nu esue. Tushigo naye nji gubemba egi gubola guetu nga gua aphangi ako mu hungu gutukange njila ha gumona gubonga nu gudivua guana khala mu ulondegi wa Yehowa.
17. Itshi muthu wagasue mukatshi dietu udi naye gutshita hagula tukhale mu gudivua mu hungu?
17 Itshi muthu wagasue mukatshi dietu udi naye gutshita hagula tukhale mu gudivua mu hungu? Tudi naye gukhala athu ana kamba guhuima. (Mat. 5:9; Roma 12:18) Tuana khala nu gusuanguluga mu phaladiso ya mu nyuma, tangua tuana tshita ngolo ha gukamba guhuima nu aphangi’etu mu hungu. Tushigo naye gujimbila egi Yehowa wananele muthu wagasue udi mu phaladiso ya mu nyuma mu gikombelelo gia giamatshidia. (Yone 6:44) Yehowa wana khala nu gusuanguluga guavula, tangua akombeledi enji ana tshita ngolo ha gukhala mu guhuima nu mu gudivua. Wana guazula nu ndando yavula!—Yesh. 26:3; Hag. 2:7.
18. Itshi tudi naye gutangigiza muavula? Mukunda natshi?
18 Yehowa wana hana akombeledi enji ima yavula yabonga. Luholo lutshi tuajiya guheta gubonga gua ima yene? Tudi naye gutangigiza muabonga ndaga tudi mutanga mu Biblia nu mu mikanda yetu. Gulonguga nu gutangigiza, mbagutukuatesa ha gukudisa makalegelo a Uklisto anyi mbaatukuatesa ha ‘gudizumba mangololo’ mu hungu “gifua athu a mu fami imoshi.” (Roma 12:10) Gula tudi mutangigiza gubonga Yehowa wana gutukalegela, mbatukolesa ufuta wetu n’enji. Gula tudi mutangigiza nji ndaga jiabonga mbajitukalegela Yehowa mu masugu adi muza, mbatumona egi felela tuana khala nadio dia gumukombelela mayilago didi dia giamatshidia. Gutshita ngenyi mbagutukuatesa ha gumukombelela nu gusuanguluga mangino.
KHALA MUKOLESELA
19. (a) Yeshaya 30:18, idi gutukuatesa ha gusha mutshima gu ndaga itshi? (b) Itshi mbayitukuatesa ha gukolesela nu gusuanguluga?
19 Yehowa ‘mbawuzuga’ ha gutukuatesa tangua mbadishiya muene mavu awa abola. (Yesh. 30:18) Tudi musha mutshima egi Yehowa ‘Nzambi wana sophesa ndaga mu luholo luabonga’ mbawushiya mavu awa a Satana mu tangua diatombele muene. (Yesh. 25:9) Tudi munengenena lusugu luene nu guhuiminyina guagasue, handaga Yehowa mbawutuhuluisa. Uvi, mangino tuzulenu desizio dia gulandula gutshita gisambu, gulonguga Biblia, gukalegela ndaga jiene nu gutangigiza ndaga jiabonga jiana gutukalegela muene. Ngenyi, Yehowa mbawutukuatesa ha gukolesela nu gusuanguluga guagasue mu mudimo wenji.
LUNGIMBO 142 Tusale Yagujinginyina gu Felela Dietu
a Mu longo edi, tuza mumona ndaga thathu Yehowa wana kalagala ha gukuatesa akombeledi enji ha gukolesela mu malamba nu gusuanguluga. Tuza muzuelela Yeshaya mukhapho 30 ha gujiya ndaga jiene. Mukhapho wene uza gutuwunguluisa egi idi nu ndando ha gukombelela Yehowa, ha gulonguga Biblia nu gutangigiza ndaga jiabonga jiana gutukalegela muene mangino nu jinyi mbaatukalegela mu masugu adi muza.
b Yakotelesa egi: Gungima dia Guvualewa gua Yesu.
c UKOTELESHI WA MBIMBI: Tuana khala mu “Phaladiso ya mu nyuma” luholo tuana kombelela Yehowa mu gudivua. Mu phaladiso yene, tuana khala nu ima yavula ya mu nyuma yana gutukuatesa ha gutuna malongo a ikombelelo ya mambo nu ha gudihana muavula mu mudimo wa gulongesa lukuma luabonga lua Ufumu. Tuana khala nu ufuta wabonga nu Yehowa, tuana khala nji mu guhuima nu aphangi’etu a mala nu akhetu anyi ana gutukuatesa ha gukolesela mu malamba nu gusuanguluga. Tuana ngina mu phaladiso ya mu nyuma tangua tuana sendesa gukombelela Yehowa mu luholo luabonga nu tangua tuana tshita ngolo ha gulandula gifezegeselo gienji.