Udi Yagudilonda Mukunda nu Lamba Diakola?

1. Mukunda natshi idi nu ndando egi tudilondege mukunda nu lamba dimoshi ngenyi diajiya gutubuila?

GULA tuadilondega mukunda nu ndaga imoshi ngenyi, tuajiya guhuluisa mionyo yetu. Ha gufezegesa gula lamba dimoshi ngenyi diabua, athu ana gudilondega gutuama ana huluisa mionyo yawo, ana kuatesa nji athu ako. Organizasio umoshi wana kuatesa athu gu Europe udi muzuela egi: “Gudilondega gutuama guana huluisa mionyo ya athu.”

2. Mukunda natshi tudi naye gudilondega mukunda nu lamba diakola? (Matayo 24:44)

² “Lamba diakola” mbadisendesa mu gisagumuisa. (Mat. 24:21) Uvi lamba diakola didi dia gudisha nu malamba ako ana buila athu, handaga esue akombeledi a Yehowa tuana jiya egi lamba diene mbadiza. Ivo hehi nu 2 000 yabalega gale, Yesu watemesele alandudi enji ha gukhala yagudilonda mukunda nu guza gua lusugu luene. (Tanga Matayo 24:44.) Gula tudi yagudilonda, mbayishigo mukhala lamba gudi esue ha gukolesela lamba diene nu gukuatesa athu ako nji ha gukolesela.​—Luka 21:36.

3. Luholo lutshi khadilo dia gukolesela nu dia khenda nu guzumba guajiya gutukuatesa ha gukhala yagudilonda mukunda nu lamba diakola?

³ Tutadilenu makalegelo thathu ajiya gutukuatesa ha gukhala yagudilonda mukunda nu lamba diakola. Itshi mbatutshita gula atuwambela ha gulongesa lukuma lua usopheshi, uvi athu ene tudi mulongesa asendesa gutusagesa? (Gumo. 16:21) Mbatukhala nu funu ya khadilo dia gukolesela ha gutumagela Yehowa nu gusha mutshima egi muene mbawutubamba. Itshi mbatutshita gula aphangi etu Aklisto atotesa ima yawo iko nga ima yawo yagasue? (Hab. 3:17, 18) Khadilo dia khenda mbaditutuma ha guakuatesa nu guahana ima adi nayo funu. Itshi mbatukalagala gula yatoga egi tudibungise hamoshi nu aphangi avula a mala nu a akhetu, tangua enya ifutshi mbaadibungisa hamoshi ha gutuluisa? (Ezek. 38:10-12) Mbatukhala nu funu ya guzumba guavula ha gujinga muabonga nu aphangi mu tangua diene dia lamba.

4. Mu luholo lutshi Biblia idi mumonesa egi tudi naye gukudisa khadilo dia gukolesela nu dia khenda nu guzumba?

⁴ Mbimbi ya Nzambi idi gututoga ha gulandula gukudisa khadilo dia gukolesa dia khenda nu dia guzumba. Luka 21:19 idi muzuela egi: “Gula muakolesela, mbamuhuluisa mionyo yenu.” Kolosai 3:12 idi muzuela egi: “Sudigenu khenda jiavula.” 1 Tesalonike 4:9, 10 idi muzuela nji egi: “Nzambi wana gumilongesa ha guzumba athu ako . . . Uvi tudi gumitoga egi itshitenu luko muavula gubalega.” Verse eji jiagasue jiasonegewe mukunda nu alandudi anyi akhalele mumonesa gale khadilo dia gukolesela dia khenda nu guzumba. Uvi akhalele naye gulandula gukudisa makalegelo ene. Esue nji tudi naye gutshita gifua ene. Ha gutukuatesa ha gukudisa makalegelo ene, tuza mumona luholu Aklisto a mu siekle ya thomo amonesele khadilo diagasue mukatshi dia makalegelo ene. Gungima tuza nji mumona luholo tuajiya gulandula gifezegeselo gia Aklisto ene, nu luholo tuajiya gumonesa egi tudi yagudilondega mukunda nu lamba diakola.

LANDULA GUKOLESELA

5. Mu luholo lutshi Aklisto a mu siekle ya thomo akhalele mukolesela mu malamba?

⁵ Aklisto a mu siekle ya thomo akhalele naye gukolesela. (Heb. 10:36) Akhalele mutagana nu malamba gifua athu agasue a mu sungi yawo, uvi luholo akhalele Aklisto, atagenele nji nu malamba ako. Avula mukatshi diawo akhalele musagesewa gudi mafumu a ikombelelo ya enya Yuda, mafumu a enya Roma nu gudi enya fami jiawo. (Mat. 10:21) Akhalele naye gutshita yagasue hagula malongo a ba aposta anyi akhalele mutshigina gukaphumuna hungu anginyigo mukatshi dia aphangi mu hungu. (Makal. 20:29, 30) Uvi ene akolesele nu gujinginyina guagasue. (Gumo. 2:3) Luholo lutshi? Akhalele mutangigiza muabonga ifezegeselo ya athu akolesele mu malamba idi mu Biblia, gifua gifezegeselo gia Yobo. (Yak. 5:10, 11) Akhalele mutshita gisambu ha gutoga ngolo gudi Yehowa. (Makal. 4:29-31) Akhalele mujiya nji egi gula alandula gukolesela, Yehowa mbawafuta.​—Makal. 5:41.

6. Longo ditshi wazula mu ndaga yakalegele Merita ha gukolesela mu usageshi?

⁶ Esue nji tuajiya gukolesela mu malamba gula tangua diagasue tudi mulonguga ifezegeselo idi mumonesa athu akolesele mu malamba, idi mu Biblia nu mu mikanda yetu nu tudi mutangigiza ndaga jiene. Gutshita ngenyi guakuatesele phangi Merita gu Albanie, ha gukolesela mu usageshi wakola wakhalele mukatuga gudi enya fami yenji. Udi muzuela egi: “Lumene lua Yobo luangukuatesele muavula. Yobo wamonele malamba avula, gakhelelego mujiya gula nanyi wakhalele gumumonesa malamba ene, uvi wazuelele egi: ‘Mbangulandula gukhala yagujinginyina uu nu gugufua guami!’ (Yobo 27:5) Ngatangijile egi lamba dia Yobo diakhalele diakola gubalega diami. Yobo gakhalelego mujiya gula nanyi wakhalele gumubatela malamba. Uvi ame ngakhalele mujiya muthu wakhalele gungumonesa malamba.”

7. Ikhale tushigo mutagana nu malamba akola, itshi tuajiya gutshita sendese mangino?

⁷ Tuajiya nji gulandula gukolesela, gula tudi mutshita gisambu muavula nu tudi muwambela Yehowa ndaga jiagasue jidi gutusagesa. (Fili. 4:6; 1 Tes. 5:17) Yajiya gukhala egi ushigo mutagana nu malamba akola mangino. Uvi wajiya gukamba utuameji gudi Yehowa, gula udi muvua gikenene, ushigo mujiya ndaga yagutshita nga gula wabua tunga-tunga mu ndaga imoshi ngenyi? Gula lusugu nu lusugu udi mutoga ukuateshi gudi Nzambi wetu mu malamba azonda udi mutagana nawo mangino, mbayishigo mukhala lamba ha gutoga ukuateshi gudi Yehowa tangua mbawutagana nu malamba akola mu masugu adi muza. Mbawusha diago mutshima egi muene wana jiya muabonga tangua dia gugukuatesa nu ndaga idi naye muene gukalagala mukunda nu aye.​—Ngi. 27:1, 3.

8. Luholo lutshi gifezegeselo gia Mira gidi mumonesa egi gukolesela mangino guajiya gutukuatesa ha gukolesela mu malamba mbatutagana nawo mu masugu adi muza? (Yakoba 1:2-4) (Tala nji gifuanesa.)

⁸ Gula tudi yagujinginyina gudi Yehowa mangino tangua tudi mutagana nu malamba, mbayishigo mukhala lamba ha gukolesela mu tangua dia lamba diakola. (Roma 5:3) Mukunda natshi tuazuela ngenyi? Handaga aphangi avula a mala nu a akhetu ana zuela egi, gula akolesela mu lamba dimoshi ngenyi, yana guakuatesa ha gukolesela mu lamba diko diajiya guabuila gungima. Khadilo dia gukolesela diana guakuatesa, diana kolesa nji gutshigina guawo gudi Yehowa egi muene udi hehi ha guakuatesa. Luholo ana sha gutshigina gudi Yehowa, ana kolesela mu malamba ana guabuila gungima. (Tanga Yakoba 1:2-4.) Phangi Mira udi muvundji wa njila gu Albanie, wakotelesele egi luholo luakolesele muene mu malamba masugu abalega, luamukuatesele ha gulandula gukolesela mu malamba ako. Udi muzuela egi, matangua ako wana gudivua gifua phamba muene hakhenji wana tagana nu malamba avula. Uvi wana tangigiza ndaga Yehowa wamukalegela gale ivo 20 yabalega gale, gungima wana zuela egi ‘khala ya gujinginyina. Ubembigo egi ivo yagasue wakalagala mu mudimo wa Yehowa, nu malamba agasue wakolesela mu ukuateshi wenji, idiyile ya githuhu.’ Aye nji wajiya gutangigiza maluholo Yehowa wagukuatesele gale ha gukolesela. Jiya egi Yehowa wana mona malamba agasue udi mutagana nawo, mbawugufuta luholo udi mukolesela. (Mat. 5:10-12) Ngenyi, gula lamba diakola diasendesa, mbayishigo mukhala lamba gudi aye ha gukolesela, nu mbawuzula desizio dia gulandula gukolesela.

KHALA MUVUILA ATHU AKO KHENDA

9. Mu luholo lutshi aphangi a mu hungu dia gu Antiokia ya gu Siliya akhalele mumonesela athu ako khenda?

⁹ Tutadilenu ndaga yakalegele aphangi a gu Antiokia tangua Aklisto a gu Yudea akhalele nu nzala yakola. Tangua avuile egi aphangi a gu Yudea akhalele nu nzala yakola, a avuidile khenda. Atshitshile yagasue ha guakuatesa. “Adivile ha gutuma ima ha gukuatesa aphangi’awo a gu Yudea. Muthu nu muthu watumine gifua muakhalele guvula gua ima yenji.” (Makal. 11:27-30) Ikhale aphangi ene a gu Yudea akhalele mujinga gualeha, uvi Aklisto a gu Antiokia azudile desizio dia guakuatesa.​—1 Yone 3:17, 18.

10. Mu luholo lutshi tuajiya gumonesa khadilo dia khenda gula lamba dimoshi ngenyi diabuila aphangi’etu Aklisto? (Tala nji gifuanesa.)

¹⁰ Esue nji tuajiya gumonesa khadilo dia khenda mangino, gula tuavua egi lamba dimoshi ngenyi diabuila aphangi’etu Aklisto. Ha guakuatesa muphushi, tuajiya gutoga akulu ha guya muhana mago ha gualondela ima yabodi, nga guhana musomonyi ha gukuatesa midimo yana kalegewa ha mavu a mudidi, nga ndo tuajiya gutshita gisambu mukunda nu aphangi ene abuila malamba.b (Ish. 17:17) Ha gufezegesa, mu 2020, Komite 950 jiagukuatesa athu abuila malamba jiahagewe ha gukuatesa aphangi a ha mavu agasue ataganele nu lamba dia misongo ya coronavirus. Tudi muhana mersi avula gudi aphangi a mala nu a akhetu adihanele ha gukuatesa aphangi ataganele nu malamba. Luholo akhalele muvuila aphangi ataganele nu malamba khenda, a ahanele ima akhalele nayo funu, a akuatesele ha gulandula gukombelela Yehowa, a alondele nji jinzo jiawo jiabolele nu mafundo a gukombelela.​—Tala nji 2 Kolinto 8:1-4.

11. Luholo lutshi guvila athu ako khenda guana tumbuisa Tata wetu wa mu dilu?

¹¹ Tangua tuana guya mukuatesa athu ako gula lamba dimoshi ngenyi diaabuila, athu ako ana mona luholo tuana gudihana. Ha gufezegesa, mu 2019 funji yakola yana tamegewa egi Dorian, yamuangele Inzo ya Ufumu imoshi gu Bahamas. Tangua aphangi akhalele mutunga luko Inzo ya Ufumu yene, ahudile muthu mumoshi wana tunga jinzo ha guawambela mumbando wa ima iko akhalele nayo funu. Muthu muene waawambelele egi: “Ngudi mutshigina gumihana . . . ima mudi nayo funu ha gutshitshila mudimo. . . . Ngudi mutshigina gukuatesa ulondegi wenu. Ngudi mutshigina nji gumikuatesa handaga ngudi mumona luholo mudi gudihana ha gukuatesa aphangi’enu.” Athu avula ana jiya ndo Yehowa. Uvi avula mukatshi diawo ana mona ndaga jiana kalagala Matemue a Yehowa ha gukuatesa athu ako. Tudi diago nu gusuanguluga ha gujiya egi luholo tuana vila athu ako khenda, yana tuma athu avula ha gukamba gujiya ndaga jiavula jiatadila Yehowa “Nzambi wa khenda jiagasue”!​—Ef. 2:4.

12. Luholo lutshi guvila athu ako khenda mangino guajiya gutukuatesa ha gudilondega mukunda nu lamba diakola? (Gumonesa 13:16, 17)

¹² Mukunda natshi mbayikhala nu ndando ha guvila athu ako khenda mu tangua dia lamba diakola? Biblia yana zuela egi athu anyi anago gudinginyisa mu ndaga jia politike ana tagana nu malamba mangino, mbaamonesewa nji lamba mu tangua dia lamba diakola. (Tanga Gumonesa 13:16, 17.) Yajiya gukhala egi aphangi Aklisto mbaakhala nu funu ya ima yajiya guakuatesa ha gujinga. Tudi mutshigina egi tangua mbadiza Fumu wetu Klisto Yesu ha gusophesa athu, mbaatusange tuana vila athu ako khenda ngenyi mbawutuwambela egi “izenu muzangule Ufumu.”​—Mat. 25:34-40.

KOLESA GUZUMBA GUAYE MUKUNDA NU APHANGI A MALA NU A AKHETU

13. Gifua luholo Roma 15:7 idi guyimonesa, luholo lutshi Aklisto a mu siekle ya thomo akolesele guzumba guawo mukunda nu aphangi Aklisto?

¹³ Athu agasue akhalele mujiya egi Aklisto agasue a mu siekle ya thomo akhalele nu guzumba mukatshi diawo. Uvi yakhalelego ndaga yaleba ha gumonesa guzumba guene. Tuzuelelenu hungu dia gu Roma; aphangi a mu hungu diene akhalele nu ndaga jia gudisha. Mu hungu diene muakhalelego phamba nu enya Yuda akhalele mujiya mukhuala wa Moize muabonga. Uvi muakhalele nji nu enya ifutshi iko anyi akhalele nu makalegelo a gudisha nu a enya Yuda. Idi naye gukhala egi Aklisto ako akhalele ahiga uvi ako akhalelego ahiga. Yajiya nji gukhala egi ako mukatshi diawo akhalele nji nu ahiga awo. Luholo lutshi Aklisto ene akhalele naye gudimonesela guzumba ngatshima akhalele nu ndaga jia gudisha? Mupostolo Phaula waawambelele egi: “Tshiginenu athu ako.” (Tanga Roma 15:7.) Itshi mupostolo Phaula watshiginyile guzuela? Mbimbi yabalumuiwe egi, “tshiginenu” idi mukotelesa guyamba muthu nu gisemo nu guzumba gifua muthu tuana khala n’enji inzo imoshi nga futa dietu. Ha gufezegesa, mupostolo Phaula wawambelele Filemona luholo gakhalele naye guyamba muhiga wenji Onesimo munu walengele egi: “Muyambe [muabonga].” (File. 17) Prisile nu Akila ayambele Apholo muabonga; Apholo gakhalelego mujiya ndaga jiavula jiatadila hungu dia Uklisto gifua ene. Uvi “amuzanguile, ayile n’enji.” (Makal. 18:26) Aklisto a mu siekle ya thomo, abembelego egi ndaga jia gudisha jiakhalele mukatshi diawo jiaakhaphumune, uvi akhalele gudimonesela guzumba.

14. Luholo lutshi Anna nu mulumi’enji amonesele athu ako guzumba?

¹⁴ Esue nji tuajiya gumonesela aphangi etu guzumba gula tuatshigina egi abue mafuta etu nu gubalegesa nawo tangua hamoshi. Ndaga yene mbayaatuma ha gutuzumba. (2 Kol. 6:11-13) Tutadilenu gifezegeselo gia Anna nu mulumi’enji. Aphangi awa atumiwe gifua bamisionere gu Afrique de l’Ouest, gungima dia tangua diazonda misongo ya coronavirus yasendesele. Akhalelego nu luholo lua gudijiya nu aphangi a mu hungu, handaga akhalelego gudimona nawo mukunda nu misongo yene. Luholo lutshi amonesele guzumba gudi aphangi ene? Akhalele guatamega mu appel vidéo ha guawambela egi akhalele mutshigina gudimona nawo ha guajiya muabonga. Aphangi asuangulugile muavula, hene akhalele guatamega muavula nu guasonegela bamesaje. Mukunda natshi phangi yowu nu mukaji’enji akhalele mukamba gujiya muabonga aphangi mu hungu? Phangi Anna udi muzuela egi: “Nganago gujimbila nga hazonda guzumba aphangi angumonesele nu enya fami yami ikhale tangua ngakhalele muabonga nga tangua ngakhalele mulamba. Ndaga yene yana gungutuma ha guzumba athu ako.”

15. Longo ditshi wazula mu gifezegeselo gia Vanessa mu ndaga yatadila guzumba aphangi agasue? (Tala nji gifuanesa.)

¹⁵ Athu avula mukatshi dietu adi mu mahungu ana khala nu aphangi a gudisha adi nu bakutime a gudisha. Tuajiya gukolesa guzumba guetu mukunda nu aphangi ene, gula tudi mumona phamba ndaga jiabonga ana tshita. Yakhalele lamba gudi phangi Vanessa gu Nouvelle-Zélande, ha gukhala nu ufuta wabonga nu aphangi mu hungu. Aphangi ene akhalele gumuhana khabu, uvi ha fundo dia gualenga, wazudile desizio dia gubalegesa nawo tangua muavula. Gutshita ngenyi guamukuatesele ha gumona ndaga jiabonga Yehowa wakhalele mumona gudi aphangi ene. Udi muzuela egi: “Mulumi’ami udi mutadi muwendji, tuana balegesa tangua nu aphangi avula adi nu makalegelo a gudisha. Hene yana khalago lamba gudi ame ha gukuata nawo ufuta. Mangino ngana zumba aphangi ene ikhale adi nu makalegelo a gudisha. Yehowa nji wana suanguluga nu makalegelo etu a gudisha handaga wana hana njila egi athu a maluholo a gudisha a mukombelele.” Gula tudi mutshita ngolo ha gutadila aphangi gifua luholo Yehowa wana guatadila, mbatumonesa egi tuana guazumba.​—2 Kol. 8:24.

16. Mukunda natshi mbayikhala nu ndando ha guzumba athu ako mu tangua dia lamba diakola? (Tala nji gifuanesa.)

¹⁶ Mbayikhala nu ndando egi tuzumbe athu ako mu tangua dia lamba diakola. Tangua lamba diakola mbadisendesa, gui mbatuya gudisuegela? Tutadilenu ndaga Yehowa wawambelele akombeledi enji ha gutshita tangua enya Babilona ikulu ajile gualuisa. Wawambelele egi: ‘Enue athu ami, nginenu mu sugu jienu jia mukatshi, jidigenu ijidigo gungima dienu. Disuegenu mukunda nu tangua diazonda uu nu tangua khabu jibalega.’ (Yesh. 26:20) Idi naye gukhala egi mu tangua dia lamba diakola mbaatutoga nji ha gulandula malongo a luholo elu. Idi naye gukhala egi mbimbi eji ‘sugu jia mukatshi’ jidi gumonesa mahungu a Uklisto. Yehowa udi gutulaya egi mu tangua dia lamba diakola mbawutubamba gula tualandula gumukombelela hamoshi nu aphangi’etu a mala nu a akhetu. Hene sendese mangino, tudi naye gutshita ngolo ha guazumba muavula. Handaga khadilo diene mbaditukuatesa ha guhuluga!

TUKHALENU YAGUDILONDEGA SENDESE MANGINO

17. Ndaga itshi mbatutshita mu tangua dia lamba diakola gula tuadilondega mangino?

¹⁷ ‘Lusugu luakoma lua Yehowa’ mbalubatela athu agasue malamba. (Sef. 1:14, 15) Akombeledi a Yehowa mbaamona nji malamba. Uvi gula tuadilondega mangino, mbatushigo gudisagesa, mbatukuatesa nji athu ako. Mbatukolesela mu malamba agasue tuajiya gutagana nawo. Tangua aphangi etu Aklisto mbaatagana nu malamba, mbatutshita yagasue ha guakuatesa, mbaatuavila khenda nu mbatuahana ima adi nayo funu. Gula tudi muzumba aphangi’etu sendese mangino, mbatuazumba nji mu tangua dia lamba diakola. Gungima, Yehowa mbawuhana monyo wa ivo nu ivo mu mavu ahe-ahe, fundo malamba agasue mbaashigo mukhala luko.​—Yesh. 65:17.