Phangi Hulda Watagenesele Felela Dienji
Aphangi a akhetu thathu ana jinga gu Indonésie mu hongo diazonda diana tamegewa egi Sangir Besar. Aphangi ene ana jiyiwa muavula mukunda nu mudimo wawo wa gulongesa. Mudimo wene, wana kuatesa athu ha gujiya Biblia. Uvi matangua ako ana tshita nji mudimo uko wa gudisha.
Hongo dia Sangir Besar gu nord ya Indonésie
Thomo, ana ngina mu muta, azudi maseso anema aji nawo gonze. Maseso ako ana khala akoma gifua mabalo. Aphangi ene ana khala ha tuyife tualondewe nu mabaya, azudi marto asendesa gubula maseso ene mu tuyitshinyi tuazonda-zonda. Gungima maseso ene anabua azonda gifua mayi a susua. Ana guamba mu ba bassin ayi nawo fundo ana khala. Gungima ana guamba mu makuba akoma anyi ajiya gumbiwa mu tumiyo nu ana gualondela njila.
Phangi Hulda udi munona maseso mu khulo ya muta
Phangi mumoshi mukatshi diawo jina dienji Hulda. Wakhalele mutshita mudimo wene muavula gubalega aphangi ako a akhetu. Mbongo jiakhelele muheta muene, wakhalele musumba ima ha gukuatesa enya fami yenji. Uvi wasendesele gubamba mbongo jiko ha gutshita ndaga iko. Wakhalele mutshigina gusumba tablete yajiya gumukuatesa ha gungina mu application JW Library®. Phangi Hulda wakhalele mujiya egi video nu ima iko idi mu JW Library mbayimukuatesa mu mudimo wa gulongesa nu ha gukotelesa Biblia muabonga.
Lusugu nu lusugu mu gimegena phangi Hulda wakhalele mutshita mudimo matangua mbadi. Watshitshile mudimo wene mbenji imoshi nu ndambo. Wakhalele mubula maseso avula ha guzalesa gamiyo. Gungima, wahetele makuta a gusumba tablete.
Phangi Hulda udi nu tablete yenji ha mago
Udi muzuela egi: “Luholo ngakhalele mubula maseso ngakhalele muhuila muavula, ngakhalele nji mumona lamba. Uvi tangua ngasendesele gukalegela tablete yene, ngabuitshile malamba ene agasue mutshima, handaga yana gungukuatesa muavula mu mudimo wa gulongesa nu ha gulonda muabonga gudibungisa gua mu hungu.” Udi muzuela nji egi tablete yene yamukuatesele ha guhata gudibungisa gua mu hungu nu gukalagala mudimo wa gulongesa mu sungi ya coronavirus. Tudi nu gusuanguluga guavula luholo phangi Hulda watagenesele felela dienji.