Khala Mutadila Matombe Gifua Luholo Nzambi Wana Guatadila

IDI yadiago egi wana suanguluga nu ima yavula yatuhanele Yehowa nu wana gumuhana mersi luholo luatuhanele muene luendu lua gukalegela ima yene. Ndaga ya gusuanguluga idi egi, Biblia yana zuela egi matombe adi kado gatuhanele Nzambi. Idi muzuela egi: ‘Ana londa mapha mukunda nu gulelesa athu, uvi matombe ana suanguluisa.’ (Mulo. 10:19; Ngi. 104:15) Uvi yajiya gukhala egi wamonele gale athu mumona malamba akola mukunda nu matombe. Enya ha mavu awa, ana khala nu matangi a gudisha mukunda nu matombe. Itshi yajiya gukuatesa Aklisto ha guzula badesizio abonga mu ndaga yatadila gunua matombe?

Tangua tudi mutshigina guzula badesizio, tudi naye gukamba matangi a Nzambi uvi a athu tuana khala nawo ndo. Gutshita ngenyi mbagutukuatesa ha gukhala nu gusuanguluga.

Gifua luholo tudi guyijiya, athu avula a ha mavu awa ana nua matombe avula diago. Yajiya gukhala egi athu ako ana gunua matombe handaga ana guakuatesa ha gudivua muabonga. Ako ana gunua ha gutuna gudisagesa mukunda nu milonga adi mutagana nayo. Uvi mu mafundo ako athu ana tangiza egi, gula muthu udi munua matombe avula udi muthu wa gukula nga ndo udi nu ngolo.

Uvi esue Aklisto tuana landula utuameji wana guatuhana Mufugi wetu wa guzumba. Ha gufezegesa, wana gutuwambela malamba ajiya gutubuila gula tudi munua matombe avula. Yajiya gukhala egi tuatangele gale ndaga jiana zuela mukanda wa Ishima 23:29-35 jidi mumonesa malamba ana gubuila muthu wana nua matombe avula.a Phangi Daniel udi mukulu mu hungu, wana khala gu Europe, udi muwunguluga ndaga gakhalele mutshita gutuama egi abue Muklisto. Udi muzuela egi: “Ngakhalele munua matombe avula, hene ngazudile badesizio abola. Ndaga yene yangubatele malamba avula; uu nu mangino gula ngayitangiza, ngana vua gikenene.”

Luholo lutshi tuajiya guzula desizio diabonga mu ndaga yatadila gunua matombe nu gutuna malamba ana gubuila athu ana gunua matombe avula? Tudi naye gubemba egi matangi a Nzambi atutuameze ha guzula badesizio abonga.

Tutadilenu ndaga Biblia yana zuela mukunda nu matombe nu ndaga jiajiya gutuma athu ako ha gunua matombe.

NDAGA BIBLIA YANA ZUELA MUKUNDA NU KHADILO DIA GUNUA MATOMBE

Mbimbi ya Nzambi yanago gutunyisa gunua matombe mu luholo luabonga. Uvi yana zuela egi, gunua matombe guajiya gusuanguluisa muthu. Biblia idi muzuela egi: ‘Dia ima yaye nu gusuanguluga, nua nji matombe aye nu gusuanguluga guagasue.’ (Mulo. 9:7) Lusugu lumoshi Yesu wanuile matombe; mangino nji akombeledi ako a Yehowa a gujinginyina ana gunua matombe.​—Mat. 26:27-29; Luka 7:34; 1 Tim. 5:23.

Uvi Biblia yana monesa gudisha gudi mukatshi dia gunua ndambo ya matombe nu gukuatewa matombe. Yana zuela haphelo egi: “Mukuatewago matombe.” (Ef. 5:18) Yana zuela nji egi “athu ana kuatewa matombe . . . mbaashigo mungina mu Ufumu wa Nzambi.” (1 Kol. 6:10) Idi yadiago egi Yehowa ganago gutshigina nga hazonda athu ana gunua matombe avula nu ana kuatewa matombe. Ha fundo dia gulandula ndaga jiana kalagala athu tuana jinga nawo, tudi naye gutshita ndaga jiana suanguluisa Nzambi.

Athu ako ana mona egi ajiya gawo gunua matombe avula uvi gukuatewa ndo. Uvi gutshita ngenyi gudi gingonza giakola diago. Biblia yana zuela haphelo egi gukhala “ahiga a matombe,” guajiya gutuma muthu ha gubolesa ufuta wenji nu Yehowa. (Tito 2:3; Ish. 20:1) Yesu nji wazuelele egi: “Gunua matombe avula” guajiya gukanga muthu njila ha gungina mu mavu ahe-ahe. (Luka 21:34-36) Itshi yajiya gukuatesa Muklisto ha gulenga malamba ajiya gubuila athu ana gunua matombe?

ITSHI YANA GUGUTUMA HA GUNUA MATOMBE NU WANA GUANUA GUVULA GUTSHI?

Tangua tudi muzula desizio dia gunua matombe, tuajiyilego gufuanesa luholo luetu lua gunua matombe nu lua athu avula tuana jinga nawo. Aklisto ana kalagala ndaga jiana suangunguluisa Yehowa tangua adi mudia nga adi mu nua. Biblia idi gutuwambela egi: “Ikhale mudi mudia nga mudi munua, nga mudi mukalagala ndaga iko ya luholo lutshi, tshitenu ndaga jiagasue mukunda nu gutumbuisa Nzambi.” (1 Kol. 10:31) Tutadilenu mihu tuajiya gudihula nu mikhuala ya Biblia tuajiya gulandula:

Ngana gunua matombe ha gusuanguluisa athu ako ba? Mukanda wa Guzoga 23:2 wana zuela egi: ‘Utshitshigo ndaga yabola handaga wamona athu avula.’ Mu verse eyi Yehowa wakhalele muwambela enya Isalele ha gutuna gulandula athu anyi akhalelego gumusuanguluisa. Ndaga yene idi nji nu ndando mukunda nu esue mangino. Gula tuabemba egi makalegelo abola a athu atutuameze nga atuameze badesizio etu mukunda nu matombe, mbatubolesa ufuta wetu nu Yehowa.​—Roma 12:2.

Ngana gunua matombe hagula athu ako atangize egi ngudi nu ngolo jiavula ba? Mu mafundo ako, gunua matombe avula guana khalago ndaga yabola. (1 Phet. 4:3) Uvi, mukanda wa 1 Kolinto 16:13 udi muzuela egi: “Khalenu nu gikolekole, khalenu nu gutshigina guakola, muvuigo woma, khalenu nu ngolo.” Matombe ajiya diago gukuatesa muthu ha gukhala nu ngolo ba? Ndo sha. Ajiya gutotesa muthu matangi; ngenyi wajiya guzula badesizio abola. Hene, gunua matombe avula guanago guhana muthu ngolo, uvi guana gumubuisa muthu waheya. Yeshaya 28:7 idi muzuelela muthu udi muya nu guwungagana nu gukhakhuga mukunda nu matombe, wana tshita ndaga jiabola.

Ngolo tudi najio funu ha gutshita ndaga jiabonga jiana katuga gudi Yehowa, jiana toga nji egi tukhale gikole-kole nu tukhale nu gutshigina guakola. (Ngi. 18:32) Gutshita ngenyi guajiya gutukuatesa ha gumonesa gutema ha gulenga ingonza nu ha guzula badesizio abonga anyi ajiyilego gubolesa ufuta wetu nu Yehowa. Yesu wamonesele ngolo jiene tangua diakhalele muene ha mavu, hene athu avula akhalele gumunemesa handaga wakhalele nu gikhesa nu wakhalele mutshita ndaga jiabonga.

Ngana nua matombe hagula ngubuite mutshima gu ndaga ngudi mutagana najio ba? Yehowa wakuatesele muyimbi wa ngimbo mumoshi ha gusonega egi: ‘Tangua malamba angubuidile, aye [Yehowa] wangukuatesele nu wanguhanele ngolo.’ (Ngi. 94:19) Gula udi nu ndaga jidi gugusagesa, toga ukuateshi gudi Yehowa uvi mu matombe ndo. Ndaga yabonga ya gutshita ha gutuna guvua gikenene giavula, idi gutshita isambu muavula gudi Yehowa. Aphangi ako amonele nji egi, gutoga ukuateshi gudi phangi mumoshi wa gukula mu nyuma mu hungu gudi ndaga yabonga. Yadiago gula muthu udi munua matombe ha gutuna guvua gikenene, wajiya gusendesa gutshita ndaga jiabola. (Hosh. 4:11) Phangi Daniel tuazuelela gu thunda, udi muzuela egi: “Ngakhalele muvua gikenene giakola nu gudibela. Ngakhalele munua matombe ha gutuna gudisagesa; uvi malamba ami akhalele gudivudisa, ngakhalelego luko nu mafuta, athu akhalelego nji gungunemesa luko.” Itshi yakuatesele Daniel? Udi muzuela luko egi: “Ngakotelesele egi ngudi naye gusha mutshima gudi Yehowa, uvi mu matombe ndo. Gungima, Yehowa wangukuatesele ha gukolesela mu malamba nu guabinga.” Ndaga ya giamatshidia idi egi tangua diagasue Yehowa wana khala hehi ha gutukuatesa, ikhale malamba etu adi mumonega gifua ajiyilego guhua.​—Fili. 4:6, 7; 1 Phet. 5:7.

Gula matangua ako wana khala nu khadilo dia gunua matombe, yajiya gutoga egi usombegese luholo luaye lua gunua nu guvula gua matombe udi naye gunua. Wajiya gudihula egi: ‘Enya fami yami nu mafuta ami ana gudisagesa mukunda nu khadilo diami dia gunua matombe ba?’ Gula idi ngenyi, yajiya gukhala egi udi mukudisa khadilo dimoshi diabola dinyi aye hakhaye ushigo mukotelesa. ‘Ngudi munua matombe avula gubalega luholo ngakhalele munua thomo ba?’ Ndaga yene yajiya gubuila muthu mumoshi udi mutangiza egi gana khalago nu khadilo dia gunua matombe, uvi wasendesa gubuisa ndaga yene gifua khadilo. ‘Yana khala lamba gudi ame ha gubemba gale gunua matombe mukunda nu masugu azonda nga avula ba?’ Gula idi ngenyi, gunua matombe guajiya gubua khadilo dinyi mbadikhala lamba ha gubemba. Yajiya gutoga egi ukambe ukuateshi gudi minganga ha gubemba khadilo diene.

Aklisto ako azudile desizio dia gutuna gunua matombe, handaga khadilo diene diana batela athu malamba. Athu ako ana tuna gunua matombe handaga anago guatshigina. Hene, gula futa diaye mumoshi wazula desizio dia luholo elu, wajiya gumonesa egi wana gumuzumba gula wanemesa desizio dienji nu watuna guzuela ndaga jiabola mukunda nu muene.

Yajiya gukhala egi wazudile gale desizio egi udi naye gunua phamba matombe azonda. Nga ndo watombele gale luholo luaye lua gunua matombe, yajiya gukhala wazuelele egi udi naye gunua mbala imoshi mu phoso nga gunua ndambo yazonda tangua udi mudia. Athu ako atombele gale matombe adi naye gunua, gifua vinyo nga biere inyi ishigo nu mitungu yakola, ana guanua nji mu luholo luabonga. Anago nji gubungisa matombe akola nu matombe ako akola ha gunua. Gula muthu wazula desizio didi mumonesa luholo ludi naye muene gunua matombe, mbayishigo mukhala lamba ha gunemesa desizio diene. Gula Muklisto wa gukula mu nyuma wazula desizio dia luholo elu gashigo naye gudisagesa mukunda nu ndaga athu ako ajiya gutangiza, handaga wazudile gale desizio dienji nu udi naye gudinemesa.

Tangua tudi muzula desizio diatadila luholo lua gunua matombe, tudi naye nji gutangiza luholo athu ako ajiya gudivua mukunda nu desizio dietu. Roma 14:21 idi muzuela egi: “Idi ndaga yabonga gula watuna gudia mbiji nga gunua matombe, nga gukalagala ndaga itshi yajiya gutuma phangi’aye ha gubua mu gubola.” Luholo lutshi wajiya gukalegela longo edi? Khala muzumba aphangi’aye Aklisto. Gula udi mumona egi gunua matombe ha meso a phangi mumoshi guajiya gumubuisa mu gubola, guzumba guajiya gugutuma ha gutuna gunua matombe gula mudi nenji. Ngenyi, wajiya gumonesa egi wana gudisha ha fundo dia athu ako nu wana guanemesa nu wana kamba gubonga guayo uvi guaye hakhaye ndo.​—1 Kol. 10:24.

Mafumu a leta ajiya gumba mikhuala idi mumonesa luholo lua gunua matombe. Aklisto nji adi naye gunemesa mikhuala yene. Mikhuala yene yajiya gumonesa egi muthu udi naye gukula gutuama egi asendese gunua matombe. Nga ndo mukhuala wajiya gutunyisa athu ha gunua matombe nga guwendesa gamiyo nga gukalegela mashinyi ako.​—Roma 13:1-5.

Yehowa watuhanele ima yavula yabonga; mukatshi dia ima yene watuhanele luendu lua guditombela ha gukalegela ima yene mu luholo luabonga. Mukatshi dia ndaga jiene tuajiya gutomba ima tuajiya gudia nu inyi tuajiya gunua. Tudi musha mutshima egi badesizio etu mbaamonesa egi tuana zula nu ndando luendu lua guditombela luatuhanele Tata wetu wa mu dilu, gula tudi mukalegela luendu luene ha gumusuanguluisa.