Mihu Yana Guhula Athu Ana Gutanga Mikanda Yetu
‘Mukhetu’ udi muzuelewa mu Yeshaya 60:1 udi nanyi? Luholo lutshi mukhetu muene udi ‘muzoga’ nu udi ‘mulema gifua kumbi’?
Yeshaya mukhapho 60:1 idi muzuela egi: ‘Zuga aye mukhetu, lemuga gifua kumbi, muanya waye waheta. Lutumbu lua Yehowa luleme gudi aye.’ Verse jidi gu thunda nu gu mbongo jidi mumonesa egi ‘mukhetu’ muene udi Siona nga Yelusalema yakotelesa egi kapitale ga Yuda ya mutangua diene.a (Yesh. 60:14; 62:1, 2) Yelusalema idi mumonesa gifutshi giagasue gia Isalele. Mbimbi jia Yeshaya jidi gututuma ha gudihula mihu mbadi. 1) Tangua ditshi nu luholo lutshi Yelusalema ‘yazogele’ nu yalemele gifua kumbi mu luholo lua gifuanesa? 2) Mbimbi jiene jiatagenesewe gale diago mu masugu etu ba?
Tangua ditshi nu luholo lutshi Yelusalema ‘yazogele’ nu yalemele gifua kumbi mu luholo lua gifuanesa? Tangua enya Yuda akalegele ivo 70 mu uhiga gu Babilona, dimbo dia Yelusalema nu tempelo yenji yabolele. Uvi tangua enya Mede nu Phelese abingile enya Babilona, enya Isalele akhalele mu membo agasue a enya Babilona, ahetele luendu lua guvuta gu gifutshi giawo nu ha guvutula luko gikombelelo gia giamatshidia. (Ez. 1:1-4) Mu gisendeselo gia givo 537 gutuama dia tangua dietu, athu agasue akhalele yagujinginyina gudi Yehowa a mu iphuta 12 ya enya Isalele akalegele nji ngenyi. (Yesh. 60:4) Asendesele guhana Yehowa milambu nu gutshita mawano nu gutunga luko tempelo. (Ez. 3:1-4, 7-11; 6:16-22) Lutumbu lua Yehowa luasendesele gumonega luko gu Yelusalema, yakotelesa egi lutumbu luene luasendesele gulema mukatshi dia akombeledi a Nzambi. Uvi enya Isalele abuile muanya mu luholo lua gifuanesa mukunda nu enya ifutshi anyi akhalelego mujiya Yehowa.
Uvi profesi jiazuelele Yeshaya jiataganesewego jiagasue mu tangua diene. Enya Isalele agasue alanduilego gutumagela Yehowa. (Neh. 13:27; Mal. 1:6-8; 2:13, 14; Mat. 15:7-9) Gungima atunyile gawo nji Masiya Yesu Klisto. (Mat. 27:1, 2) Mu givo 70 gia tangua dietu, dimbo dia Yelusalema nu tempelo yenji diamuangewe luko.
Yehowa wadiangele guzuela egi dimbo diene mbadimuangewa. (Dan. 9:24-27) Idi yadiago egi felela dia Nzambi diakhalelego egi Yelusalema ya ha mavu itagenese profesi jiagasue jiana zuelela guvutudiwa gua gikombelelo gia giamatshita jidi mu Yeshaya mukhapho 60.
Mbimbi jiazuelele Yeshaya jiatagenesewe gale diago mu masugu etu ba? Ayi, uvi jiatagenesewe gudi mukhetu muko wa gifuanesa, yakotelesa egi “Yelusalema ya mu dilu.” Mupostolo Phaula wasonegele mukunda nu mukhetu muene egi: ‘Udi mama wetu.’ (Gal. 4:26) Yelusalema ya mu dilu idi gitshinyi gia ulondegi wa Nzambi wa mu dilu, gidi nu an’enji a mu nyuma agujinginyina. “Ana” a Yelusalema yene adi Yesu nu Aklisto 144 000 ambiwe maji mu nyuma, gifua Phaula, ene nji adi nu felela dia guya mu dilu. Aklisto ene adi “gifutshi gia gijila” yakotelesa egi, “Isalele ya Nzambi.”—1 Phet. 2:9; Gal. 6:16.
Luholo lutshi Yelusalema ya mu dilu “yazogele” nu “yalemele gifua kumbi”? Yazogele nu yalemele gifua kumbi mu njila ya Aklisto ambiwe maji mu nyuma ha mavu adi gifua an’enji. Tutadilenu luholo ndaga Aklisto ene atagenele najio jidi gudivua nu profesi jidi mu Yeshaya mukhapho 60.
Aklisto ambiwe maji mu nyuma akhalele naye “guzoga” handaga akhalele mu phipha ya mu nyuma, phipha yene yasendesele tangua malongo a ba aposta anginyile mu hungu gungima dia gufua gua apostolo. (Mat. 13:37-43) Mu tangua diene, akhalele mu uhiga wa Babilona Yakoma yakotelesa egi ikombelelo yagasue ya mambo. Aklisto ambiwe maji mu nyuma alanduile gukhala mu uhiga uu nu “gisugishilo gia mavu awa,” sungi yene yasendesele mu givo 1914. (Mat. 13:39, 40) Matangua azonda gungima mu givo 1919, azogele mu uhiga wa malongo a mambo nu asendesele gulemesa muanya wa mu nyuma luholo adihanele mu mudimo wa gulongesa lukuma luabonga lua Ufumu.b Gungima dia ivo, athu a mu ifutshi yagasue amonele muanya wene, yakotelesa egi ajiyile giamatshidia nu enya Isalele ya Nzambi anyi asalele, idi mumonesa “mafumu” adi muzuelewa mu Yeshaya 60:3.—Gumo. 5:9, 10.
Mu masugu adi muza, Aklisto ambiwe maji mu nyuma mbaamuanga muanya wana katuga gudi Yehowa mu luholo lua gushimana. Luholo lutshi mbaayikalagala? Gungima dia gufua guawo, ana gungina mu “Yelusalema Ihe-ihe,” nga gubua mukaji’a Klisto yakotelesa athu 144 000 mbaabua mafumu nu nganga-nzambi.—Gumo. 14:1; 21:1, 2, 24; 22:3-5.
Yelusalema Ihe-ihe mbayikhala nu ndando yavula mu gutagenesewa gua ndaga jidi mu Yeshaya 60:1. (Tala nji Yeshaya 60:1, 3, 5, 11, 19, 20 nu Gumonesa 21:2, 9-11, 22-26.) Gifua luholo Yelusalema ya ha mavu yakhalele fundo diakhalele guvernema ya Isalele, luholo lumoshi nji Yelusalema Ihe-ihe nu Klisto mbayibua guvernema ya mu mavu ahe-ahe. Mu luholo lutshi Yelusalema Ihe-ihe “[yakatugile] mu dilu gudi Nzambi”? Idi mu luholo mbayituameza ndaga jia ha mavu. Athu a mu iphuta yagasue anyi ana vila Nzambi woma ‘mbaawenda mu muanya.’ Mbaashigo luko mukalagala gubola nu mbaashigo luko mufua. (Gumo. 21:3, 4, 24) Gifua luholo Yeshaya nu baprofete ako azuelele, ndaga jiene mbajitagana tangua ‘mbaavutula luko ndaga jiagasue luholo jiakhalele thomo.’ (Makal. 3:21) Guvutudiwa guakoma gua ndaga jiene guasendesele tangua Klisto wabuile Fumu, mbagusuga gu gisugishilo gia Uhinyinyi wenji wa Ivo 1 000.
a Mu mukanda wa Yeshaya 60:1, Biblia Gubalumuna gua Mavu Ahe-ahe yana zuelela “mukhetu” ha fundo dia guzuelela “Siona,” nga “Yelusalema,” handaga mbimbi jia Hebelu jiabalumuiwe egi “zuga” nu “lemuga gifua kumbi” jiana khala mbimbi ana zuelela akhetu, luholo lumoshi nu mbimbi “aye” inyi idi gu suga ya verse. Asonegele mbimbi eyi “mukhetu” ha gukuatesa athu ha gukotelesa egi adi muzuelela mukhetu wa gifuanesa
b Guvutudiwa gua gikombelelo gia giamatshidia guakalegewe mu givo 1919, guana zuelewa nji mu mukanda wa Ezekiele 37:1-14 nu mu Gumonesa 11:7-12. Ezekiele wadiangele guzuela egi gungima dia gutshita masugu avula mu uhiga, Aklisto agasue ambiwe maji mu nyuma mbaazoga mu uhiga wa malongo a mambo. Profesi idi mu Gumonesa idi muzuelela luholo thundu yazonda ya aphangi ambiwe maji mu nyuma anyi akhalele mutuameza avualewe luko gungima dia guzoga mu bologo. Aphangi ene akhelelego luko nu luholo lua gukombelela Yehowa mu sungi yazonda handaga ambiwe mu bologo. Mu 1919, aphangi ene atombewe ha gubua “muhiga wafubidila nu watema.”—Mat. 24:45; tala nji mukanda Le culte pur de Jéhovah enfin rétabli! diyiji 118.