Ndaga Jiajiya Gugukuatesa ha Gujidila mu Hungu Dihe-Dihe

Phangi Nicolas nu Céline atagenele nu malamba avula. Tangua Betele ya gu France ya atogele ha guya mu hungu dihe-dihe, atshiginyile. Azuelele egi: “Thomo tuasuangulugile muavula, uvi gungima tuasendesele guvua uhote wa mafuta etu. Tuakhalele khenji tukuata galego ufuta wakola nu aphangi a mu hungu dietu dihe-dihe.”a Luholo yana khala lamba ha guya mu hungu dihe-dihe, itshi yajiya gugukuatesa ha gukhala nu gusuanguluga nu gulandula gudihana mu mudimo wa Yehowa gula wasombegesa hungu? Luholo lutshi aphangi ako ajiya gugukuatesa? Gubonga gutshi wajiya guheta mu hungu dihe-dihe?

NDAGA NGUANA JIAJIYA GUGUKUATESA HA GUJIDILA

1. Shila Yehowa mutshima. (Ngi. 37:5) Phangi Kazumi nu mulumi’enji, ana khala gu Japon. Wakhalele watagenesa gale ivo 20 mu hungu diawo, uvi tangua asombegesele mulumi’enji mudimo, ayile mu hungu dihe-dihe. Luholo lutshi phangi Kazumi ‘washile mutshima gudi Yehowa’? Wazuelele egi: “Tangua diagasue ngakhalele muwambela Yehowa luholo ngakhalele muvua woma nu gikenene nu luholo ngakhalele gudivua hakhami. Tangua diagasue ngakhalele mutshita gisambu, Yehowa wakhalele gunguhana ngolo ha gukolesela.”

Luholo lutshi wajiya gulandula gushila Yehowa mutshima? Gifua luholo mutshi wana khala nu funu ya meya nu vitamine ha gukula muabonga, ha gukhala nu gutshigina guakola tudi naye gulandula gutshita ndaga jia mu nyuma gifua muthu udi mumbila mutshi meya nu ima yajiya guwukuatesa ha gukula muabonga. Phangi Nicolas tuazuelela gu thunda wakhalele mutangigiza gifezegeselo gia Abalahama nu Yesu nu Phaula handaga adihanele muavula mu mudimo wa Nzambi, ndaga yene yamukuatesele ha gusha mutshima egi Yehowa mbawumukuatesa. Gukhala nu programe yabonga ya gulonguga Biblia phoso nu phoso, mbayigukuatesa ha gubinga usombegeshi wagasue wajiya gutagana nawo, mbawujiya nji ndaga jiavula wajiya gukalegela ha guhana athu ako gikhesa mu hungu dihe-dihe.

2. Ukhadigo mufuanesa hungu dihe-dihe nu hungu dikulu. (Mulo. 7:10) Phangi Jules wakatugile gu Bénin ha guya gu États-Unis, wakhalele naye gutshita ngolo ha gujidila nu kutime jia gudisha. Wazuelele egi: “Ngakhalele muvua gifua ngukhala mutela muthu wagasue ngudi mutagana n’enji ndaga ngakhalele mutagana najio.” Luholo gakhalelego muheta okazio wa gutela athu ndaga jiakhalele muene mutagana najio, wasendesele gudikhalela hakhenji. Uvi hajiyile muene muabonga aphangi a mala nu a akhetu, wasombegesele luholo luenji lua gutangiza. Wazuelele egi: “Ngakotelesele egi ha mavu athu agasue ana khala luholo lumoshi. Uvi ana zuela nu ana kalagala ndaga jia gudisha. Idi nu ndando ha gubemba athu gifua luholo ana khala.” Hene, tukhadigo mufuanesa hungu dihe-dihe nu hungu dikulu. Phangi wa mukhetu Anne-Lise udi muvundji wa njila, wazuelele egi: “Ngasombegesele hungu handaga ngakhalele mutshigina gulonguga ndaga jihe-jihe, ngakhalelego mutangiza egi ndaga jiagasue jidi naye gukhala luholo lumoshi gifua jinyi ngabembele mu hungu dikulu.”

Akulu nji ashigo naye gufuanesa hungu dihe-dihe nu hungu dikulu. Gula aphangi adi mutshita ndaga jia gudisha mu hungu dihe-dihe, ishigo mukotelesa egi ndaga jiene jidi jiabola. Idi nu ndando ha gujiya ndaga jiavula jiatadila hungu diene gutuama dia guhana matangi. (Mulo. 3:1, 7b) Idi nji nu ndando ha guhana gifezegeselo giabonga gudi aphangi ha fundo dia guashinjiga ha gutshita ndaga gifua luholo udi mutshigina.​—2 Kol. 1:24.

3. Khala gudihana muavula mu midimo ya mu hungu dihe-dihe. (Fili. 1:27) Gula waheta fundo dihe-dihe, yana toga tangua nu ngolo jiavula ha guya mu gudibungisa gua mu hungu uvi idi nu ndando ha guyitshita muphushi. Idi yadiago egi gula aphangi a mu hungu dienu dihe-dihe ashigo gugumona, yajiya gukhala lamba gudi ene ha gugukuatesa. Phangi Lucinda nu an’enji a akhetu mbadi ayile mukhala mu dimbo dimoshi diakoma gu Afrique du Sud. Wazuelele egi: “Mafuta ami anguwambelele egi ngudi naye gudihana muavula mu midimo ya mu hungu, gulongesa hamoshi nu aphangi ako nu guhana mvutu mu gudibungisa. Tuatshiginyile nji egi aphangi akhale gudibungisa mukunda nu mudimo wa gulongesa gu inzo yetu.”

Gula udi “mutshita mudimo” hamoshi nu aphangi a mala nu a akhetu a mu hungu diaye dihe-dihe, mbawuheta gikhesa nu mbawukolesa athu ako. Akulu akuatesele phangi Anne-Lise tuazuelela gu thunda ha gulongesa nu athu agasue mu hungu. Gubonga gutshi gahetele? Wazuelele egi: “Ngakotelesele muphushi egi idi luholo luabonga lua gujidila mu hungu dihe-dihe.” Gula udi gudihana ha guwevua nu gulondega Inzo ya Ufumu, mbawumonesa gudi aphangi’aye a mala nu a akhetu egi udi diago mu hungu dienu. Gula udi gudihana muavula mu midimo ya mu hungu, aphangi a mala nu a akhetu mbaasuanguluga gukuata ufuta nu aye, mbawudivua nji egi udi diago mu fami yaye ya mu nyuma.

4. Kuata mafuta ahe-ahe. (2 Kol. 6:11-13) Gula udi gudisagesa mukunda nu athu ako, mbayikhala yaleba ha gukuata nawo ufuta. Hene, idi nu ndando ha guzula tangua dia guta maga nu athu gutuama nu gungima dia gudibungisa gua mu hungu, ngenyi mbawajiya muabonga. Tshita ngolo ha gukuata majina awo. Gula ushigo mujimbila majina awo nu ushigo ndaga jiakola-kola, mbaakamba gugujiya muabonga, aye nji mbawukhala futa diabonga mukunda nu ene.

Ha fundo dia gusombegesa luholo wana khala hagula athu asuanguluge nu aye, bemba egi ene hakhawo ajiye luholo wana khala. Gifua luholo phangi Lucinda wazuelele, “tuajiya gukuata ufuta wakola nu athu ako mangino gula tudi guatamega ha gubalegesa nawo tangua hamoshi gumbodi’etu.”

‘KHALA MUTSHIGINA ATHU AKO’

Athu ako ana vua musonyi ha gungina mu Inzo ya Ufumu gula adi athu ahe-ahe mu hungu diene. Luholo lutshi wajiya gukuatesa athu ahe-ahe adi muza mu hungu dienu? Mupostolo Phaula wazuelele egi, ‘khala guatshigina’ ‘gifua luholo Klisto wamitshiginyile.’ (Roma 15:7) Akulu ajiya gulandula gifezegeselo gia Klisto gula adi mukuatesa athu ahe-ahe adi muza mu hungu ha gudivua muabonga. (Tala galuanda: “Ndaga Yajiya Gugukuatesa Gula Waya mu Hungu Dihe-Dihe.”) Uvi athu agasue mu hungu nu ene ana azonda, adi nu ginemo gia gukuatesa athu ahe-ahe ha gudivua muabonga.

Khadilo dia guyamba didi mukotelesa, gutamega athu ahe-ahe gumbodi’etu nu guakuatesa nu ima adi nayo funu. Ha gufezegesa, phangi mumoshi wa mukhetu wakuatesele phangi muko wa mukhetu wajile mu dimbo dihe-dihe hagujiya luholo lua guzula transport. Ndaga yene yakuatesele phangi muene wa mukhetu ha gujidila.

LUENDU LUA GUKULA MU NYUMA

Tangua tulu didi muya nu gukula, diana gudizulula (gudihuhula) mbala jiavula gutuama egi disendese guzuga. Luholo lumoshi nji gula waya mu hungu dihe-dihe, ubembigo egi nga ndaga imoshi igukange njila ha guzuga mudimo wa Yehowa mu luholo lua gifuanesa. Phangi Nicolas nu Céline azuelele egi: “Gukatuga mu hungu diko ha guya mu hungu dihe-dihe, gudi formasio yabonga. Gujidila nu athu ahe-ahe nu gukhala mu mafundo a gudisha, guatukuatesele ha gukudisa makalegelo ako.” Phangi Jean-Charles tuazuelela gu thunda, udi mumonesa luholo enya fami yenji ahetele gubonga tangua ayile mu hungu diko. Wazuelele egi: “Usombegeshi wene wakuatesele an’etu ha gukula mu nyuma nu gukolesa ufuta wawo nu Yehowa. Gungima dia mbeji jiazonda, mun’etu wa mukhetu wasendesele gutshita ba devuare mu gudibungisa gua mukatshi dia phoso, mun’etu wa yala wabuile mulongeshi udi khenji gabatijiwa galego.”

Itshi wajiya gutshita gula ndaga imoshi idi gugukanga njila ha guya fundo didi nu funu ya alongoshi avula? Gula udi mukalegela malongo tuamona mu longo edi, yajiya gugukuatesa ha gumona hungu diaye dikulu gifua dibua dihe-dihe. Gula udi nu ndaga jiavula jia gutshita mu hungu gifua gulongesa hamoshi nu aphangi, gukuata mafuta ahe-ahe, nga gukhala futa diabonga gudi athu wana jiya gale, mbawumonesa diago egi wana shila Yehowa mutshima. Nga ndo, wajiya gukamba luholo lua gukuatesa athu ahe-ahe adi muza mu hungu nga athu adi nu funu ya ukuateshi. Guzumba gudi khadilo diana monesa egi tudi Aklisto a giamatshidia, hene gula tudi mukuatesa athu ako mbatukolesa ufuta wetu nu Yehowa. (Yone 13:35) Tuajiya diago gutshigina egi: “Nzambi wana suanguluga nu milambu ya luholo elu.”​—Heb. 13:16.

Ikhale guya mu hungu diko guajiya gukhala lamba, uvi Aklisto avula abingile ha gubamba gusuanguluga mu mahungu awo ahe-ahe, aye nji wajiya gubinga. Phangi Anne-Lise wazuelele egi: “Gusombegesa hungu guangukuatesele ha gudijiya nu aphangi. Phangi Kazumi udi muzuele egi: “Yehowa mbawugukuatesa mu luholo wakhalelego mutangiza,” gula waya mu hungu diko. Luholo lutshi phangi Jules wadivile tangua diasombegele muene hungu? Wazuelele egi: “Mafuta angukuatesele ha gudivua gifua ngudi gumbodi’etu. Henyaha ngudi gudivua diago egi ngudi mu hungu diami, mbayikhala lamba gudi ame ha gukatuga luko.”