“Ngakhalelego Hakhami”

GIFEZEGESELO GIA MVUAJI JIAMI

Tata nu mama akhalele gudihana muavula mu gikombelelo gia enya Katolike. Uvi tangua alongugile egi Biblia yana zuela egi jina dia Nzambi didi Yehowa, abuile Matemue a Yehowa nu asendesele gudihana muavula mu mudimo wenji. Hene, tata wabembele gutshita ifuanesa ya Yesu. Ha fundo dia gutshita mudimo wene, wakalegele ndunge jiene ha gulonda fundo diko dia inzo yetu muabonga hagula dibue Inzo ya Ufumu ya thomo ya gu San Jose del Monte, dimbo diene diana khala hehi nu Manille capitale ga Philippines.

Ngavualewe mu 1952, mvuaji jiami jiasendesele gungulongesa giamatshidia gifua luholo akhalele mulongesa aphangi’ami nguana a mala nu ako thathu a akhetu. Tangua ngakudile, tata wakhalele ngunguwambela ha gutanga mukapho umoshi wa Biblia lusugu nu lusugu, tualongugile n’enji mikanda yavula. Matangua ako, mvuaji jiami jiakhalele mutamega atadi awendji nu amoneshi a Betele ha guza mukhala gumbo dietu. Ndaga yene yakhalele gutusuanguluisa muavula nu tuakhalele muheta gikhesa ha gutegelela ba eksperianse a aphangi ene, handaga akhalele gutukuatesa ha guhaga mudimo wa gulongesa ha fundo dia thomo mu monyo wetu.

Ngalongugile ndaga jiavula gudi mvuaji jiami handaga jiakhalele muzumba Yehowa muavula. Gungima dia gufua gua mama, ame nu tata tuasendesele mudimo wa gipionye mu 1971. Uvi tata wafile mu 1973 tangua ngatagenesele ivo 20. Luholo mvuaji jiami jiagasue jiafile, ngakhalele gudivua hakhami. Felela “dia diago nu diakola” tuana khala nadio diangukuatesele ha gukhala nu gusuanguluga ha fundo dia guvua gikenene giavula nu gukolesa ufuta wami nu Yehowa. (Heb. 6:19) Matangua azonda gungima dia gufua gua tata, ngabuile pionye spesiale gu ga hongo ga Coron, mu provense ya Palawan.

MALAMBA NGATAGENELE NAWO MU MUDIMO WAMI

Tangua ngayile gu Coron ngakhalele nu ivo 21. Dimbo diene diakhalelego nu kura yabonga nu meya. Mioto nu tumiyo yakhalelego yavula. Aphangi a mala akhalelego avula guene, guakhalelego nji nga nu muvundji wa njila guene, hene matangua ako ngakhalele mulongesa hakhami. Mbeji ya thomo ngabalegesele guene, ngakhalele muvua uhote wa enya fami yami nu mafuta ami muavula diago. Masugu ako mu phipha, ngakhalele mutala dilu diazala pha nu themua nu ngakhalele mudila. Ngakhalele mutshigina gubemba mudimo wami ha guvutuga gu inzo.

Tangua ngakhalele gudivua ngenyi, ngakhalele muwambele Yehowa ndaga jiagasue ngakhalele mutangiza nu luholo ngakhalele gudivua. Ngakhalele muheta gikhesa tangua ngakhalele muwunguluga ndaga ngakhalele mutanga mu Biblia nu mu mikanda yetu. Ngakhalele muwunguluga muavula mukanda wa Ngimbo 19:14. Ngakotelesele egi Yehowa wakhalele ‘Seso diami nu muhuluishi wami,’ ngakhalele nji mutangigiza ndaga jiana gumusuanguluisa gifua, mudimo wenji nu makalegelo enji. Longo dia Inzo Yaleha ya Mutaledi diakhalele nu muto wa lumene egi: “Vous n’êtes jamais seul”a diangukuatesele muavula diago. Ngakhalele guditanga muavula diago. Mu matangue ene yakhalele gifua ngakhalele hakhami nu Yehowa, handaga ngakhalele nu luendu lua gutshita gisambu, gulonguga nu gutangingiza.

Matangua azonda gungima dia guheta gu Coron, angutombele ha gubua mukulu. Luholo ngakhalele hakhami mukulu, ngakhalele mutuameza gudibungisa mukunda nu Khalasa dia Mudimo wa Teokrasi, Gudibungisa gua Mudimo, Gulonguga gua Mukanda mu Hungu nu Gulonguga gua Inzo Yaleha ya Mutaledi. Ngakhalele nji mutshita badiskure phoso nu phoso. Gutshita ndaga eji jiagasue guangukuatesele ha gutuna gudivua hakhami!

Ngakhalele musuanguluga gutshita mudimo wa gulongesa gu hongo dia Coron. Athu ako ngakhalele mulonguga nawo Biblia guene, abatijiwe. Uvi ngataganele nji nu malamba. Masugu ako ngakhalele mutshita matangua avula ha guheta mu terituare, ngakhalelego nji mujiya fundo ngajiya gubanda gula ngaheta mu terituare yene. Terituare ya hungu dietu yakhalele nji nu tumahongo tuavula. Mbala jiavula ngakhalele muzula wato wana wenda nu moteur ha guheta mu terituare yene, kianga giakhalele nu matshipha-tshipha avula, uvi ngakhalelego mujiya guzua! Yehowa wangubambele nu wangukuatesele mu malamba ene agasue. Gungima ngakotesele egi Yehowa wakhalele gunguhana formasio. Formasio yene yangukuatesele mu malamba akola ngatagenele nawo mu mudimo ngahetele gungima.

GIFUTSHI GIA PAPOUASIE-NOUVELLE-GUINÉE

Mu 1978, angutumine gu Papouasie-Nouvelle-Guinée gu nord ya Australie. Gifutshi gia Papouasie-Nouvelle-Guinée giana khala nu milundu yavula, gifutshi giene gidi ndambu giakoma gubalega gifutshi gia Espagne. Ngadihudile ha gumona egi athu hehi nu 3 million a mu gifutshi giene ana zuela mazuelelo gubalega 800. Ndaga ya gusuanguluga idi egi athu avula akhalele muzuela zuelelo dia Pidgin mélanésien, diana tamegewa egi Tok Pisin.

Angutumine mu hungu dia zuelelo dia Anglais gu capitale ga Port-Moresby mukunda nu tangua diazonda. Gungima ngayile gu hungu dia Tok Pisin, ngakhalele mulonguga zuelelo diene hagula ngudijiye muabonga. Ngakhalele mukalegela ndaga ngakhalele mulonguga ha gujilongesa athu ako mu mudimo wa gulongesa. Gutshita ngenyi guangukuatesele ha gujiya zuelelo diene muphushi. Gungima dia tangua diazonda, ngasendesele gutshita badiskur a athu agasue mu zuelelo dia Tok Pisin. Givo gimoshi gungima dia guheta gu Papouasie-Nouvelle-Guinée, ngasuangulugile muavula luholo ngabuile mutadi muwendji mu mahungu a zuelelo dia Tok Pisin mu provense jiavula.

Luholo mahungu akhalele gualeha-leha, ngakhalele mutshita bavuayaje ha guya mutshitshisa ba asamble avula a lusugu lumoshi mu mafundo a gudisha. Thomo, ngakhalele gudivua hakhami handaga ngakhalele nu athu anyi ngakhalelego mujiya muabonga; yakotelesa egi gifutshi, zuelelo nu kutime jihe-jihe. Ngakhalelego nu luholo lua gutshita vuayaje ha malu ha guya mutala mahungu, handaga milundu yakhalele yavula nu njila jiakhalelego jiabonga. Phoso nu phoso ngakhalele mutshita vuayaje mu avion. Matangua ako ngakhalele mutshita vuayaje phamba ame hakhami nu pilotte mu avion akhalelego diago abonga. Vuayaje jiene jiakhalele gunguhana gikenene giavula gifua tangua ngakhalele muwenda mu wato!

Athu avula akhalelego nu telefone, hene ngakhalele musonegela mahungu mikanda. Matangua avula ngakhalele muheta gutuama egi mikanda yene ihete, hene ngakhalele muhuIa enya mu dimbo diene jinzo jia Matemue a Yehowa. Gula tuadimona nu aphangi, akhalele gunguyamba nu gusuanguluga nu guzumba guagasue, ngenyi ngakhalele mukotelesa egi vuayaje ngatshitshile ha guya guatala idi diago nu ndando. Yehowa wangukuatesele muavula diago, ufuta wami nu muene wakolele nji muavula.

Tangua tuakalegele gudibungisa gua thomo gu hongo diana tamegewa egi Bougainville, phangi mumoshi nu mukaji’enji akhalele mumuemueta, anguhudile egi: “Udi gutujiya luko ba?” Ngawungulugile egi ngalongesele phangi muene nu mukaji’enji tangua ngahetele mu mbala ya thomo gu Port-Moresby. Ngasendesele gulonguga nawo Biblia, uvi gungima ngatogele phangi mumoshi wa yala mu dimbo diene ha gulandula gulonguga nawo. Henyaha aphangi ene abatijiwe gale! Aphangi ene adi mukatshi dia ishimbigo yavula Yehowa wanguhanele mu ivo thathu ngatshitshile gu Papouasie-Nouvelle-Guinée.

FAMI YAZONDA UVI NDAGA JIAVULA JIA GUTSHITA

Gutuama dia gukatuga gu hongo dia Coron mu 1978, tuadijiyile nu phangi Adel, wakhalele mukhetu mumoshi wabonga nu wakhalele gudihana muavula mu mudimo wa Nzambi. Wakhalele muvundji wa njila wa tangua diagasue hakhalele muene musasa an’enji mbadi Samuel nu Shirley. Mu tangua diene wakhalele nji mukuatesa gin’enji wakhalele muthu wagukola. Mu Mai 1981, ngavutugile gu Philippines ha gudizula n’enji mu ulo. Gungima dia ulo wetu, tuabuile avundji a njila a tangua diagasue nu tuakhalele mukuatesa fami yetu.

Ngatshima ngakhalele nu fami, mu 1983 ngabuile luko pionye spesiale gu hongo dia Linapacan mu provense ya Palawan. Tuayile gu hongo diene nu fami yagasue uvi mu dimbo diene muakhalelego nu Matemue a Yehowa. Gungima dia givo gimoshi mama wa Adel wafile. Uvi gudihana muavula mu mudimo wa gulongesa guatukuatesele ha gukolesela mu lamba diene. Tuasendesele gulonguga Biblia nu athu avula akhalele mutshigina guza mu gudibungisa, hene tuakhalele nu funu ya Inzo ya Ufumu yazonda. Tuatungile Inzo ya Ufumu esue hakhetu. Tangua tuatagenesele ivo thathu gu hongo diene, tuasuangulugile ha gumona luholo athu 110 ajile mu gudibungisa gua Guwunguluga Gufua gua Yesu. Tangua tuakatugile athu avula mukatshi diawo abuile Matemue a Yehowa.

Mu 1986, angutumine mu hongo dia Culion, dimbo diene diakhalele nu athu avula akhalele nu misongo ya hute. Gungima, Adel wabuile nji pionye spesiale. Thomo tuakhalele muvua woma wa gulongesa athu akhalele nu hute. Uvi alongeshi a ha fundo diene atuwambelele egi ahuile athu ana kata misongo yene gihemba gimoshi, hene idi lamba hagula misongo yene ikuate athu ako. Athu ako mukatshi diawo, akhalele muza mu gudibungisa gu inzo ya phangi mumoshi wa mukhetu. Tuakhalele nu gusuanguluga guavula ha gulongesa felela dia Biblia gudi athu akhalele gudivua gifua Nzambi nu athu ako anago guazumba. Tuasuangulugile luko muavula ha gumona luholo athu akhalele nu misongo yakola, musuanguluga handaga ajiyile egi gudi nu lusugu misongo yawo mbayihua.​—Luka 5:12, 13.

Itshi yakuatesele an’etu ha gujidila nu lujingu gu Culion? Ame nu mukaji’ami tuatamegele aphangi a akhetu mbadi a mavuala a gu hongo dia Coron ha guza mukhala gumbo dietu, hagula an’etu akhale nu mafuta abonga. Samuel nu Shirley nu aphangi akhetu ene mbadi akhalele nu gusuanguluga ha gukuatesa athu ako ha gujiya giamatshidia, handaga akhalele mulonguga Biblia nu ana avula uvi ame nu Adel tuakhalele mulonguga Biblia nu mvuaji jia ana ene. Mu sungi imoshi ngenyi tuakhalele mulonguga Biblia nu fami 11. Uvi matangua azonda gungima, tuasendesele gulonguga Biblia nu athu avula akhalele mukula mu nyuma, hene tuakangudile hungu dihe-dihe!

Thomo, phamba ame hakhami ngakhalele mukulu ha fundo diene. Hene, Betele yanguwambelele ha gutshita gudibungisa nu alongeshi 8 a gu Culion, gungima ngakhalele muya mutshita gudibungisa guene nu aphangi 9 a gu dimbo diakhalele mutamegewa egi Marily. Tuakhalele mutshita matangua thathu mu wato ha guheta mu dimbo diene. Gungima dia gudibungisa, tuakhalele muya matangua avula nu aphangi ene gu khanda ya milundu ha gulongesa athu Biblia gu dimbo ana tamega egi Halsey.

Athu avula abuile Matemue a Yehowa gu Marily nu gu Halsey, hene tuatungile Jinzo jia Ufumu mu mafundo ene mbadi. Aphangi nu athu ako akhalele musuanguluga nu giamatshidia atukuatesele nu ima yavula ya gutungila gifua luholo aphangi a gu Linapacan atukuatesele. Inzo ya Ufumu ya gu Marily yakhalele naye gungina athu 200, yakhalelego nji lamba ha guyikomesa, hene tuakhalele mutshita ba asamble guene.

TUAVILE GIKENENE, TUAKHALELE HAKHETU UVI GUNGIMA TUASUANGULUGILE LUKO

Tangua an’etu akudile, tuasendesele gutshita mudimo wa mutadi muwendji nu Adel gu Philippines mu 1993. Mu givo 2000, ngazudile formasio gu École de formation ministérielle hagula ngubue mulongeshi gu khalasa diene. Ngakhalele gudivua gifua ngushigo ngatagana ha gulongesa mu khalasa diene, uvi Adel wakhalele gunguhana gikhesa. Wanguwambelele egi Yehowa mbawunguhana ngolo jia gutshita mudimo wene uhe-uhe. (Fili. 4:13) Adel wakhalele mujiya egi ndaga jiakhalele muzuela muene jiakhalele jia giamatshidia handaga wakhalele mutagenesa ginemo gienji uvi muene nu misongo mu muila.

Mu 2006 tangua ngakhalele mulongeshi, akuatele mukaji’ami Adel nu misongo yana tamegewa egi Parkinson. Tuadisagesele muavula diago! Tangua ngamuwambelele egi tubembe mudimo wetu hagula ngugukuatese, wanguwambelele egi: “Kamba munganga wajiya gungukuatesa gu misongo yami handaga ngudi mujiya egi Yehowa mbawutukuatesa ha gutagenesa ginemo gietu.” Phangi Adel walanduile gukalegela Yehowa ivo 6 gungima dia gusendesa gukata uvi gakhalelego muboguta (kunyema). Tangua gakhalelego luko nu luholo lua guwenda, wakhalele muya mu mudimo wa gulongesa holu dia gife gia ikata. Gula gashigo nu luholo lua guzuela, wakhalele muhana mvutu mu mbimbi imoshi nga mbadi phamba mu gudibungisa. Aphangi avula a mala nu akhetu akhalele mutumina Adel mikanda ha gumushimana mukunda nu khadilo dienji dia gukolesela uu nu tangua diafile muene mu 2013. Tuatshitshile mudimo nu mukaji’ami ivo 30 nu ndambu, uvi tangua diafile muene ngakhalele nu gikenene giavula, ngakhalele nji gudivua hakhami.

Adel wakhalele mutshigina egi ngulandule gukalagala mudimo wami, hene ngatshitshile ngenyi. Luholo ngakhalele gudihana muavula mu mudimo wa Yehowa, yangukuatesele ha gutuna gudivua hakhami. Mu 2014 uu nu mu 2017 angutumine gifua mutadi muwendji ha guya mutala mahungu a zuelelo dia Tagalog, mu ifutshi inyi mudimo wetu wakhalele mutunyishiwa. Gungima, ngayile mutala mahungu a zuelelo diene gu Taïwan, gu États-Unis nu gu Canada. Mu 2019, ngakhalele mulongeshi mu Khalasa dia Alongeshi a Ufumu mu zuelelo dia Anglais gu Inde nu gu Thaïlande. Ngahetele gusuanguluga mu midimo eyi yagasue. Ngana khala nu gusuanguluga guavula gula ngudi gudihana muavula mu mudimo wa Yehowa.

TUANA HETA UKUATESHI TUDI NAWO FUNU

Mafundo agasue ngakhalele muya, ngakhalele muzumba aphangi a mala nu a akhetu muavula, hene yakhalele lamba ha guabemba. Mu matangua ene, ngakotelesele egi ngudi naye gushila diago Yehowa mutshima. Gumona luholo Yehowa wakhalele gungukuatesa, yakhalele gungutuma ha gutshigina mudimo wagasue nu mutshima umoshi. Mangino ngudi pionye spesiale gu Philippines. Ngana gudivua muabonga mu hungu dihe-dihe handaga aphangi a mu hungu diene ana gungukuatesa nu abuile gale gifua enya fami yami. Ngudi nji nu gusuanguluga ha gumona luholo Samuel nu Shirley ana landula gifezegeselo gia gutshigina gua mama wawo.​—3 Yone 4.

Ngataganele nu malamba avula mu monyo wami, gifua luholo ngamonele mukaji’ami ngakhalele muzumba mukata nu gufua gu misongo imoshi yakola. Ngakhalele naye nji gutshita yagasue ha gujidila nu ndaga jihe-jihe ngakhalele mutagana najio mu monyo wami. Yadiago, ngakotelesele egi Yehowa “gashigo gualeha nu muthu wagasue mukatshi dietu.” (Makal. 17:27) Koko dia Yehowa ‘dishigo diahihia’ ha gukuatesa nu guhana akombeledi enji ngolo ikhale adi fundo ditshi. (Yesh. 59:1) Yehowa udi Seso diami, wakhalele gungukuatesa monyo wami wagasue, ngudi gumuhana mersi avula. Ngakhalelego hakhami.